Vejolaš seastit miljárddaid jos goaivu eará vugiid mielde goivvohagaid govdafierpmádahkii

- Bija boahttevaš fiberjohtasiidda bohcciid, ovttastahte goaivunbargguid ja ále bija nu alla gáibádusaid dasa man čiekŋalat goivvohagat galget leat.  Dainna lágiin servodat  sáhttá seastit miljárddaid seammás go nu olusat go vejolaš ožžot govdafierpmi. Dát leat áiddo ilbman raportta “buorit govdafierpmádat dábit” bohtosat. 

Olu sáhttá dahkat álkibun ja hálbbibun vai ássit ožžot buriid govdafierpmádat fálaldagaid. Muhtun báikkiin šaddá huksen nu divrras ja ovdamearkka dihtii báikkálaš roggandivadiid gáibádusaid geažil vuovdaleaddjit eai gille fállat govdafierpmádaga.

- 99,9% álbmogis oažžu dábálaš govdafierpmádat fálaldaga, muhto dárbbut lassánit hui johtilit.  Danne fertejit almmolaš eiseválddit, eanaeaiggádat ja fitnodagat ovttasbargat gávdnat čovdosiid mat unnidit beaktilis doaibmannávccalašneahtta huksengoluid. Lea dárbbašmeahttun geavahit áiggi ja ruđaid goaivut daid seammá geainnuid moatti jagi maŋŋil, dan sivas go oktage ii sáhttán einnostit ahte johtasiidda šaddá dárbu áiggi mielde. Surggiid  njuolggadusat fertejit maiddái heivehuvvot govdafierpmádat huksemiidda, dadjá ođasmahttinministtar Rigmor Aasrud.

- Johtileabbo govdafierpmádat lea erenoamáš dehálaš vai olbmot sáhttet ássat doppe gos sii háliidit, dadjá gielddalaš- ja guovlulašministtar Liv Signe Navarsete.  Danne son ávžžuha gielddaid ja fylkkagielddaid leat njunnošis ovddideamen siskkáldas struktuvrra ovttastahttin doaimmaid. Son čujuha ee. Davvi-Trøndeláhkii, gos fylkkagielda bidjá govdafierpmádat fiberbohcciid seammás go buoridit fylkkageainnuid.

- Mun ávžžuhan buot gielddaid ja fylkkagielddaid čuovvut buriid govdafierpmádatdábiid. Seammás áigu ráđđehus guorahallat maid mii sáhttit dahkat našuvnnalaš dásis vai dát bargu lihkostuvvá. Danne áiggun bovdet dán suorggi  govdafierpmádatpolitihkalaš gulahallamiidda, lohká ođasmahttinministtar Rigmor Aasrud.

Arvat gaskaoamit mat leat čadnon govdafierpmádat huksemiidda (goivvohagat, bohccit jna.) leat gieldda dásis.  Ovdamearkka dihtii leat olu gielddat bajidan gáibádusaid dasa man čiekŋalat roggamat galget leat, ja jos dát gáibádusat vuoliduvvojit de dat mielddis buktá ahte  beaktilis doaibmannávccalašneahtta huksengolut šaddet guhtta miljárdda unnit riikkamiehtásaččat.

Nexia, gii dán analysa lea čađahan, buktá ovdan ee. čuovvovaš dovdomearkkaid buriid gielddalaš govdafierpmádatdábiide:

• Gielddat fuolahit ahte fiberbohccit biddjojit go muđui goivojuvvo
• Gielddain lea ollislaš diehtu gokko goivojuvvo ja diktá earáid geavahit goivvohagaid  govttolaččat ja dainna lágiin ahte oktage ii vealahuvvo
• Gielddat bidjet govttolaš gáibádusaid dasa man čiekŋalassii fiberbohcciid galgá goaivut ja ođđasis asfalteremii.

Analysa Vei, vann og bredbånd (pdf) lea Nexia dahkan Ođasmahttin-, hálddahus- ja girkodepartemeantta dáhtu mielde.