Ráđđehus doarju gilvopolitihka guovddáža ásaheami Bergenii

- Mii doarjut riikkaviidosaš gilvopolitihka guovddáža ásaheami Bergenii. Dakkár riikkaviidosaš guovddáža huksemii leat hui buorit eavttut Bergenis. Doppe lea viiddis akademiijabiras, mas lea beroštupmi ja máhttu gilvoekonomiija ja gilvovuoigatvuođaid hárrái, ođasmahttinministtar Rigmor Aasrud dadjala.

Ođasmahttin-, hálddahus- ja girkodepartemeanta doarju guovddáža álggaheami 500.000 kruvnnuin.

Gilvopolitihka riikkaviidosaš guovddaža ásahanplána ovddidii gilvodirektevra Knut Eggum Johansen duorastaga njukčamánu 17. beaivvi semináras. Guovddáža ásaha Gilvobearráigeahčču ovttasbarggus Bergena universitehtain (UiB) ja Norgga gávpeallaskuvllain (NHH).

- Min áigumuš lea dahkat Bergena gilvopolitihka guovddážin – ii dušše Norggas, muhto Davviriikkain ja áiggi mielde kánske maiddái Eurohpás, gilvodirektevra Knut Eggum Johansen cealká.

Guovddáža ásaheapmi mielddisbuktá eanet ovttasdoaibmama fágaid gaskii:
- Gilvopolitihkka lea fágaidgaskasaš ja lea mávssolaš sihkkarastit juridihka ja ekonomiija fágasurggiid ovttasdoaibmama. Ođđa guovddáš bargagoahtá dan gealbbu vuođul, mii UiB, NHH ja Gilvobearráigeahčču vuogádagas jo lea, Eggum Johansen dadjala.

Bergen Centre for Competition Law and Economics (BECCLE) galgá earret eará fátmmastit UiB ja NHH bissovaš fágabargiid, postdoc-bargiid ja doavttirgrádastipendiáhtaid, geat barget gilvopolitihka gažaldagaiguin birrasis. Guovddážis galgá leat aktiiva rolla sihke dutkamis ja oahpahusas, ja dat galgá lágidit semináraid ja konferánssaid gilvopolitihka fágasuorggis.

Ođas guovddáža birra almmuhuvvui semináras, maid Gilvobearráigeahčču lágidii dan oktavuođas, ahte Knut Eggum Johansen heaitá gilvodirektevran njukčamánu loahpas.