Almmolaš oktavuođain galgá šaddat álkit geavahit sámegiela

- Almmolaš DT-vuogádagaid ođđa standardiseren gáibádusat dahket vejolažžan geavahit sámegiela olu almmolaš surggiin, cealká sámeministtar Rigmor Aasrud.

Nu gohčoduvvon čálastandárda UTF-8  lea čálastandárda mas leat olu eanet čálamearkkat go dálá  čálastandárddas maid almmolaš DT-vuogádagat geavahit, ja dát guoská ee. sámegiela erenoamáš čálamearkkaide. Leat olu registarat mat eai sáhte geavahit sámi čálamearkkaid iežaset vuogádagain, ja sámi geavaheddjiid gulahallamis čuohcá dát sámi namaid, čujuhusaid ja báikenamaid kvalitehtii. 

Buohkaide galget almmolaš bálvalusat olámuttus ja digitála geavaheapmi lassána ain eanet almmolaš oktavuođain. Danne lea dehálaš standárdiseret almmolaš vuogádagaid, vai lea vejolaš geavahit sámi čálamearkkaid ja čállit riekta sámi namaid ja čujuhusaid, lohká ođasmahttin-, hálddahus- ja girkoministtar Rigmor Aasrud.

Buot stáhtalaš doaimmahusat leat juo ovdalis geatnegahttojuvvon geavahit UTF-8 čálastandárdda  jos  nuppástuhttet  dahje ođasmahttet iežaset DT-vuogádagaid.  Rievdaduvvon standárdanjuolggadusaid mielde, maid  ráđđehus dohkkehii mannan bearjadaga, galget gielddat maiddái čuovvut dáid gáibádusaid.  Dan sivas go almmolaš DT-vuogádagaid doaibmanáigi lea guhki, de leat gielddat geatnegahttojuvvon gávdnat čovdosiid guđa davvisámegiel erenoamáš čálamerkii ovdal ođđajagimánu 1.b. 2013. Stáhtalaš doaimmahusain galget dáidda gávdnot čovdosat juo ovdal ođđajagimánu 1.b.2012.

Sámi oktavuođas mearkkaša dát ahte sámi čálamearkkaid galgá sáhttit geavahit neahttasiidduin, elektronalaš skoviin ja gulahaladettiin sámi geavaheddjiiguin.