Ođđa raporta: Govdaoalli viidu

Ođđa raporta čájeha, ahte Norgga alla leavttu govdaoallefálaldat viidu dađistaga.
- Jođánut govdaoalleoktavuođaid vehkiin olbmot sáhttet heivehit bargovugiid, árvoráhkadeapmi lassána ja biras seastášuvvá, ođasmahttinministtar Rigmor Aasrud cealká.

"Bredbåndsdekning 2011"-raporta čájeha, ahte hui ollugat leat maŋimuš jagi áigge ožžon vejolašvuođa diŋgot jođánut govdaoalleoktavuođa. Jagis 2011 sáhttá 94 proseantta ássiin diŋgot govdaoali, mainna dieđuid sáhttá viežžat unnimusat 4 Mbit/s leavttuin. Jagis 2010 sáhtte dan dahkat 89 proseantta mis. 67 proseanttas lea olámuttus 25 Mbit/s govdaoalleoktavuohta (ovdal 55 proseanttas), go fas 41 proseanttas lea olámuttus 50 Mbit/s govdaoalli (ovdal 19 proseanttas).

- Illudan dieđuin. Raporta čájeha ahte alla leavttu govdaoali viiddidit olles leavttuin min riikkas. Alla leavttu govdaoali mielde ovddidišgohtet neahttabálvalusaid, omd. neahtta-tv, neahttaspealuid ja filmmaid čájeheami njuolggorávdnjin. Dat addá ovttaskas olbmuide muni heivehit eallima dan láhkai, ahte sii sáhttet bargat gáiddusbargin. Dat maid seastá birrasa, go eanet gálvvuid sadjái bohtet neahttafálaldagat, ođasmahttinministtar dadjala.

Raporttas muitaluvvo, ahte ollu dállodoalut leat ožžon stuorát válljenvejolašvuođa ja sáhttet válljet máŋgga fálaldaga ja govdaoalleteknologiija gaskkas.

- Raporta cealká ahte ráđđehus lea leamaš jierbmái iežas govdaoallepolitihkain, mii lea neutrála teknologiija ektui, ja mii váldá vuhtii márkana. Mii oaidnit, ahte teknologiijat ovdánit ja ahte geavaheaddjit ožžot ain buoret govdaoallefálaldaga. Nu besset ain eambosat diŋgot govdaoali ja searvát diehtoservodahkii, Aasrud fuopmášuhttá.

99,7 prosenttas lea dán áigge olámuttos njoazimus govdaoalli, mii iskkadeamis lea guorahallojuvvon, 0,64 Mbit/s. Lohku lea seammá go 2010. Sullii 7000 norgga dállodoalus ii leat dán áigge govdaoallefálaldat. Lea sáhka dáluin, maidda govdaoali doaimmaheapmi mávssášii nu ollu, ahte fierpmádaga viiddideapmi daidda ii gánnet ruđalaččat.

Konsuleantasearvi Nexia lea čállán ”Bredbåndsdekning 2011”-raportta Ođasmahttin-, hálddahus- ja girkodepartemeantta ovddas.

Loga eanet:
Bredbåndsdekning 2011 (dárogillii)