Sihkkarastá Slettmeg.no šaddá bissovaš doaibman

Slettmeg.no addá rávvagiid ja bagadusaid olbmuide geat vásihit gutnehuhttimiid ja geat háliidit oažžut eret dieđuid iežaset birra neahtas. Sihkkunveahkkebálvalus lea gitta otnáža rádjái leamašan geahččalanprošeakta. – Dál sihkkarastit mii ahte Slettmeg.no šaddá bissovaš doaibman. Norgga informašuvdnasihkkarastin guovddáš váldá dál badjelasas doaimma, dadjá ođasmahttinministtar Rigmor Aasrud.

- Mun lean hui ilus go Norsis lea váldán badjelasas doaimmahit slettmeg.no. Slettmeg.no lea dehálaš bálvalus sidjiide geat vásihit gutnehuhttimiid neahtas. Dát guoská earenoamážit nuoraide. Nuorat gullet hearkkimusaide neahtas ja sis dávjá ii leat ekonomiija ja gelbbolašvuohta čoavdit dán áibbas okto, dadjá Rigmor Aasrud. 

Slettmeg.no lea 2009 čavčča rájes leamašan Databearráigeahču vuollásaš prošeaktan. Norsis váldá badjelasas ovddasvástádusa doaimmahit slettmeg.no bissovaččat iežaset bušeahttarámmaid siskkobealde ođđajagimánu 1.b.2012 rájes.

Slettmeg.no sirdin Databearráigeahčus NorSIS:i galgá dáhpáhuvvat nu ahte geavaheaddjit eai vásit boatkanemiid sihkkunveahkkebálvalusas.