Eanet ođđa báhpat – unnán buohcanjávkan

2011 loahpas ledje virgáduvvon 1,335 báhpa bismagottiide. Dat ledje 20 virggi eambbo go ovddit jagi ja leat šaddan eanet go 40 ođđa virggi 2009 čavčča rájes. Dán čájehit Ođasmahtti- ja girkodepartemeantta jahkásaš báhppagotti etáhttastatistihkka.

- Maŋemus jagiid leat bidjan eanet fuomášumi hástalusaide ahte rekrutteret doarvái báhpaid girku virggiide. Danin lean mun hui ilus dáinna ovdánemiin, dadjá girkoministtar Rigmor Aasrud. Su mielas lea maiddái movttiidahtti go eanet teologat dál ohcalit ruovttoluotta báhpavirggiide.

Statistihkka čájeha muđui ahte:

Eanet penšunerejuvvon báhpat barget muhtun áigodagaid searvegottiin
Lassin 1,335 dábálaš báhpavirggiide, de 2011 loahpas ledje lagabui 160 virggis registrerejuvvon penšunisttat gaskaboddosaš virgádandilálašvuođas. Dat lei 55 eambbo go jagi ovdal, ja mielddisbuktá ahte duohtavuođas barge measta 1,500 báhpa dan áigemuttus go statistihkka vižžojuvvui olggos. Penšunerejuvvon báhpat leat hui mávssolaš resursan dasa ahte sihkkarastit searvegottiide doarvái sadjásaččaid.

Rekrutterenhástalusat – eanet vuoras báhpat
Báhppagotti ahkečoahkádus mearkkaša ahte jagiin ovddasguvlui ferte árjjalaččabut bargat rekruttereme ođđa báhpaid. 2011 loahpageahčen ledje sullii njeallje logi báhpas geat aktiivvalaččat barge boarráset go 55 jagi.  Deavdin dihte vurdojuvvon agi geažil luohpamiid jagiin ovddasguvlui, de lea dárbu sihke čađahit doaimmaid maiguin oažžu eanet oahppan báhpaid, oažžut eambbo oahppan teologaid ohcan báhpavirggiide ja bisuhit eambbogiid báhpavirggiin.
Bismagotteráđi dieđut orrot čájeheame ahte álggahuvvon rekrutterendoaimmain lea leamašan vissis ávki. 2011:s rekrutterejuvvojedje 52 ođđa báhpa oahpuin dahje eará mállet fitnuin. Ledje 20 eambbo go jagi ovdal. Dušše 43 proseantta sis geat álge ođđa virggiide 2011:s bohte eará báhpavirggis, vástideaddji lei 2010:s dát lohku 61 proseantta.

Unnán buohcanjávkan
Báhpaid buohcanjávkan lea maŋemus guokte jagi leamašan dássedit 4,4 proseanttas. Doavttirdieđihuvvon jávkan dahká 4,2 proseantta. Báhpain lea gaskamearálaš buohcanjávkan vuolleleappos go mii muđui stáhtalaš suorggis gaskamearálaččat lea, ja dat čuovvu SB-šiehtadusa biddjojuvvon mihttomeriid dási. Doavttirdieđihuvvon buohcanjávkan lea nissonolbmuin badjelis (6.2%) go dievdduin (3,5%). 2011:s unnui nissonolbmuid buohcanjávkan 0,9 proseanttain, ja  dievdduin dat ges lassánii 0,2 proseanttain.

Lassi- ja joatkkaoahppu
Báhpat geavahit eanet áiggi oahpuide ja joatkkaoahpuide go ollu eará fidnojoavkkut. Gaskamearálaččat lei 2011:s várrejuvvon juohke báhppii 6,4 oahppobeaivvi. Dat lei sullii seamma go diibmá. 118 báhpa serve našunála Gelbbolašvuođaráđi olis kurssaide. Dát ledje veaháš unnit go ovddit jagi.

Buoret ekonomalaš dilli bismagottiin
Bismagotteráđiid ekonomalaš dilli lea eanasmuddui buorránan maŋemus guovtti jagis. Bismagottit šadde 2008-2009:s bidjat johtui ollu seastindoaimmaid vai bargoveaga heivehedje iežaset bušeahttarámmaide, 2011 ruhtajuolludeami ektui sii ges ledje seastán 6,8 miljovnna ruvnno rehketdoalus. Leat dattetge veaháš variašuvnnaid bismagottiid gaskkas, mii dahká ahte muhtun bismagottit ain dárbbašit seastit 2012:s. Virggiid logu lassáneapmi lea sihke dan geažil go 2011 stáhtabušeahtas juolluduvvui 5 miljovdna ođđa báhpavirggiid ásaheapmái ja ahte bismagotteráđiid obbalaččat leat ožžon buoret stivrejumi ekonomiija badjel.