Ráđđehus áigu ollásit digitaliseret hálddašeami

- Mii áigut digitála poastta dahkat dábálaš gulahallanvuohkin álbmoga ja hálddašeami gaskkas, celkkii stáhtaministtar Jens Stoltenberg go otne ovddidii ráđđehusa digitaliserenprográmma “På nett med innbyggerne».  Son almmuhii ahte ráđđehusa boahtte stuorra ođastus lea almmolaš suorggi ollásit digitaliseren.

Digitála gulahallan galgá leat dábálaš go hálddašemiin lea oktavuohta. Heivvolaš bálvalusat galget fállojuvvot digitálalaččat ja gulahaladettiin hálddašemiin galgá dát dábálaš gulahallanvuohki. Ássit sáhttet válljet báberčovdosiid jos dan háliidit.

- Mii galgat geavahit diehtoteknologiija buoridit, álkidahttit ja beavttálmahttit almmolaš bálvalusaid.  Mii háliidat deaivat olbmuid ja ealáhuseallima doppe gos sii leat ja goas sidjiide heive. Digitála hálddašemiin mii beavttálmahttit almmolaš suorggi bargovugiid ja luvvet resurssaid stuora čálgodoaimmaide, dajai stáhtaministtar Jens Stoltenberg otne almmuhettiin ráđđehusa ođđa digitaliserenprográmma.

Bargu álggahuvvo golmmain dehálaš doaibmabijuin: Rievdadit hálddašanlága ja geahčadit lágaid ja láhkaásahusaid ja jávkadit hehttehusaid mat heađuštit hálddašeami digitaliserema, ásahit sihkkaris digitála poastakássa nu ahte buot ássit ja fitnodagat ožžot hálddašeamis digitála poastta dihto sadjái, ja elektronalaš identifikašuvdna fálaldaga mas lea alla sihkkarvuođadássi.  Oktavuođadieđuide ásahuvvo maid oktasaš ortnet ja digitála poastta ektui várašupmi.  Olu bálvalusat leat juo digitaliserejuvvon, muhto ain lea buoridanmunni.

- Buorre ovdamearka ođđa ortnegiid ektui lea  go Geaidnodoaimmahat dál heaittiha biilaobláhtaid, ja baicce dárkkista jahkedivatmávssuid digitálalaččat, dajai stáhtaministtar.  

Váldonjuolggadussan lea ahte reivvet, skovit ja rehkegat galget vuostái váldojuvvot, meannuduvvot ja sáddejuvvot digitálalaččat. Automáhtalaš áššemeannudeapmi galgá geavahuvvot jos dat heive buoremusat.  Jos dán galggaš olahit, de ráđđehus háliida earret eará molsut báberpoastta digitála poasttain. 

- Okcilogi proseantta álbmogis geavaha interneahta beaivválaččat.  Dál háliidat ahte stáhta ollásit digitalisere bálvalusaidis ja gulahallá geavaheddjiiguin vuohkasit, doppe gos sii leat, namalassii neahtas.  Jáhkán ahte sii dán vurdet, logai ođasmahttinministtar Rigmor Aasrud.

Čuovvovaš prinsihpat galget vuođđun ráđđehusa boahtteáiggi hálddašeami digitaliseremis:

1. Digitála gulahallan galgá leat dábálaš go hálddašemiin lea oktavuohta
2. Hálddašeapmi galgá fállat dievaslaš ja áddehahtti digitála bálvalusaid
3. Goallosteapmi almmolaš neahttabáikkiide galgá leat álki ja sihkkar.
4. Buot ássit ja fitnodagat galget hálddašeamis oažžut poastta sihkkaris digitála poastakássii.
5. Ássit ja fitnodagat galget dieđihuvvot sms ja e-poastta bokte.
6. Ássit galget oažžut rávvagiid mo gávdnat ja geavahit digitála bálvalusaid.
7. DGT-čovdosiid ovddideapmi galgá gehččojuvvot  hálddašeami bargoproseassaid ja organiserema ektui.
8. Personsuodjalus ja diehtosihkkarvuohta galgá váldojuvvot vuhtii.
9. Digitaliserendoaibmabijut main lea mearkkašupmi eanet bálvalusaide galget ovttastahttojuvvot.

Ráđđehus lea maid bargamin DGT ja árvoháhkama strategiijain mii almmuhuvvo jagi 2012 mielde – “Digital agenda”.