Čielggadeaddjit árvalit gaikut billistuvvon ráđđehusvisttiid

Hálddahusministtar Rigmor Aasrud vuostáiválddii otne raportta “Konseaptaválljenčielggadeapmi ođđa ráđđehuskvartála birra”, maid sorjátkeahtes konsuleantajoavku lea ráhkadan ja mas leat mielde Metier, Opak ja LPO arkiteavttat. Čielggadeapmi rávve čohkket ráđđehuskvartála guvlui mii lea Akergata ja Møllergata gaskkas. Dat maiddái árvala gaikut ráđđehusvisttiid mat leat  billistuvvon ja hukset ođđa ráđđehusvisttiid.

-Lean ilus go mii dál leat ožžon vuđolaš árvvoštallama boahtteáiggi ráđđehuskvartála vejolašvuođaid birra gos galgá leat alla sihkkarvuohta ja mii láhčá dili buori ja beaktilis bargovugiide. Lean maid ilus go váikkuhusat gávpoga ektui leat árvvoštallojuvvon. Čielggadeami ferte vel kvalitehtasihkkarastit  ovdal go ráđđehus dahká iežas mearrádusa.  Sorjátkeahtes kvalitehtasihkkarastit leat válljejuvvon ja bargu álgá dallánaga, cealká hálddahusministtar Rigmor Aasrud.

Rávve sirdit ráđđehuskvartála Akersgata nuorttabeallái

Konsuleantajoavku lea čielggadan vihtta iešguđetlágan árvalusa ráđđehuskvartála huksemii. Čielggadeaddjit rávvejit Nuorta konseapta. Dat mearkkaša ahte ráđđehuskvartála čohkkejuvvo guvlui mii lea Akersgata ja Møllergata gaskkas ja ahte kvartálii gullá vel guovlu mii lea Grubbegata ja Møllergata gaskkas gitta Hammersborgii. Árvalus mearkkaša ahte ferte oastit opmodagaid gaskal Grubbegata ja Møllergata Hammersborg lahka, luobahit R5 ja R6 ja gaikut Y-geardevistti, H-geardevistti, R4 ja S-geardevistti ja hukset ođđa visttiid.

Árvalus lea okta dain hálbbimusain ja mielddisbuktá ahte ii dárbbaš giddet go dušše moadde gáhta. Čielggadeaddjit čujuhit ahte konseapta sisttisdoallá buriid sihkkarvuođačovdosiid, rievdadanmuni departemeantavisttiid ektui ja muđui vejolašvuođaid gávdnat buriid čovdosiid ja ovttasdoaibmama.  Muhto dat maid mearkkaša ahte oassi historjjálaš huksehusbirrasis jávká ráđđehuskvartálas.

Rávve gaikut Allageardevisti, muhto gáhttet dáidaga

Čielggadusas árvaluvvo gaikut ráđđehusvisttiid Y-geardevistti, H-geardevistti, R4 ja S-geardevistti  ja čáhkket saji ođđa visttiide. Raporttas boahtá ovdan ahte “lassigolut ođđasit váldit atnui Allageardevisti  (...) meroštallojuvvo máksit sullii 400 MNK analysaáigodagas jagi 2064 rádjái.”  Čielggadeaddjit rávvejit ahte ii gánnát geavahit dán vistti, muhto gáhttet dáidagiid mat gávdnojit visttis. Raportta mielde lea “áibbas vejolaš suodjalit dáidaga mii lea Allageardevisttis, ja dáidaga Y-geardevistti hárjji vuolde,” Golut čuohppat eret dáidaga Allageardevisttis, giehtadeapmái ja lágidit  daid fas ođđa vistái šaddet su. guokte ja vihtta miljovnna kruvnnu gaskka.

Árvala rabas kánturservodaga

Raporta čájeha ahte sáhttá olu seastit jos hukse rabas kánturservodaga ovdal go sierra kantuvrraid. Raporta rávve ahte 75 proseantta ráđđehuskvartála bargosajiin huksejuvvojit rabas kánturservodahkan gos bargiin ii leat fásta bargosadji.

Čielggadusas ii leat árvvoštallojuvvon gos boahtteáiggi muitobáiki galgá huksejuvvot ráđđehuskvartálas, muhto čujuhuvvo ahte dasa lea vejolaš gávdnat čovdosa.

Konseaptaválljenčielggadeapmi addá maid servodatekonomalaš analysa ráđđehuskvartála iešguđet konseapttaid birra.  Analysas leat mielde earret eará váikkuhusárvvoštallamat maidda ii sáhte bidjat hatti. Dat leat beaktilvuohta ja ovttasdoaibman, sihkkarvuohta, rievdadanmunni struktuvrra rievdadusaid ektui ja bargojuogadeapmi, gávpotbiras, ovddasteapmi, beasatlašvuohta ja huksehusaid ja dáidagiid gáhtten.

Metier, Opak ja LPO arkiteavttat leat ráhkadan konseaptaválljenčielggadeami Ođasmahttin-, hálddahus- ja girkodepartemeantta dáhtu mielde. Dovre Group ja Transportøkonomisk institutt galget kvalitehta sihkkarastit. Kvalitehta sihkkarastindoaibma álggahuvvo dallánaga.