Sárdnon ođđa sámi ofelaččaid

Dearvva buohkaide!

Lea álo stuorra illu almmuhit ođđa sámi ofelaččaid.
Nuorat geat galget bargat ofelažžan dán ođđa jagis, leat (nappo):

• Anne Cicilie Somby Westerfjell, Snåases
• Anne Margaretha Kuhmunen Oskal, Nordlánddas
• Ánde Trosten, Deanus

Giitu didjiide go háliideiddet bargat sámi ofelažžan. Din lea vuordimin gelddolaš ja hástaleaddji jahki!

Ferten dadjat ahte lean hui čeavlái bargguid hárrái maid sámi ofelaččat dahket.

Ofelaččat leat duođaid leamaš sámi servodaga ja sámi nuoraid buorit ovddasteaddjit. Sii leat bargan buriid bargguid gilvit dieđuid sámiid ja sámi servodaga birra nuoraide sierranas guovlluin riikkas.

Mun jáhkán lea leamaš hui mávssolaš ahte ofelaččat leat geavahan vuođđun sin iežaset vásáhusaid das ahte leat nuorra sápmelaš Norggas, ja ahte juohkehaš muitala iežas vásáhusaid.

Oaivvildan dán oktavuođas lea vuogas ahte dii bargabehtet joavkun, ja ahte dii boahtibehtet sierranas guovlluin Sámis, ja ahte dii gullabehtet sierranas osiide sámi servodateallimis. Dát han lea ge sámiid givrodahkan. Mis lea stuorra máŋggaláganvuohta ja lea deaŧalaš ahte earát bohtet dovdat sámi máŋggaláganvuođa.

Eanetlohkoráđđehusa oaidnu lea dat ahte máhttu sámiid, sámi giela ja kultuvrra ja servodatdili birra, dagaha positiiva guottuid sámiid ja sámi dilálašvuođaid birra. Oktavuohta man ofelaččat ožžot njuolgga nuoraiguin ja dieđuid gilvin sidjiide, leat hui deaŧalaččat dán oktavuođas.

Danne eanetlohkoráđđehus lea dahkan Ofelašprošeavtta bistevaš ortnegin. Ofelaččaid bargu lea lassin – iige dan barggu sajis mii dahkko skuvllas. Lea deaŧalaš dan diehtit. Skuvllat geat váldet vuostá ofelaččaid, ožžot stuorát ávkki sin galledeamis jos dain ovddalgihtii leat leamaš sámi fáttát diibmoplánas. Mun lean ilus go eanet ja eanet skuvllat geavahit searaid dasa. Eanetlohkoráđđehusa mihttomearrin lea dieđusge ahte buot oahppit Norggas galget oahppat sámiid birra.

Giittán Sámi allaskuvlla buori organiserema ovddas mii lea dahkkon sámi ofelaččaid várás. Lea deaŧalaš ahte olbmos lea fágalaš ja persovnnalaš oadjebasvuohta go galgá bargat ofelažžan.

Dáhtun erenoamážit giitit din geat dál heaitibehtet ofelažžan, Gry, Sagka ja Máret, dan barggu ovddas maid lehpet dahkan. Ja dáhtun seammás sávvat didjiide, geat álgibehtet ođđa ofelažžan, Anne Cicilie, Anne Margaretha ja Ánde, lihku dan deaŧalaš bargui man galgabehtet bargat!