Lagat davviriikkalaš ovttasbargguin vuosttildit kriminalitehta

– Davviriikalaš areastagohčus dahká jođáneabbon ja álkibun váldit gitta, addit iežas hálddus ja ráŋggáštančuovvolit láhkarihkkuid davviriikkain, dadjá Justiisa- ja gearggusvuođaministtar Grete Faremo. Disdaga rájes areastagohččosa davviriikkalaš oassi lea fámus.  

Davviriikalaš areastagohčus lea ovtta davviriikkalaš stáhta gohčus earái ahte váldit gitta ja addit iežas hálddus olbmo gean leat ohcame ráŋggáštahtti dilálašvuođaid geažil. Davviriikkalaš areastagohčus boahtá dálá davviriikkalaš addinvuogádaga sadjái.

– Davviriikkain mis leat buot eavttut sajis buori ja lagas ovttasbargui kriminalitehta vuosttildeapmái, ja davviriikkalaš areastagohččus addá beaktileappot vuogádaga ráŋggáštančuovvolit riikkarájiid rastá, dadjá Justiisa- ja gearggusvuođaministtar.

  

Ođđa njuolggadusat

• Stáhta mii vuostáiváldá areastagohččosa, galgá váldit gitta ja addit olbmo iežas hálddus, gean leat ohcame, dan stáhtii gii lea buktán areastagohččosa, jus fal eai leat earenoamáš sivat hilgut dan.
• Vejolašvuohta biehttalit addimis iežas hálddus boargáriid measta juo obbalohkái loahpahuvvo.
• Ásahuvvojit oanehis áigemearit doahttalit ja bidjat johtui davviriikkalaš areastagohččosa.
• Areastagohččosat galget sáddejuvvot njuolga gaskal nammaduvvon eiseválddiid (áššáskuhttineiseváldi Norggas). Duopmostuollu álgoálggus galgá váldot fárrui dalle go olmmoš, gean leat ohcame, ii mieđit sirdima.

Areastagohčusláhka čađaha earret eará konvenšuvnna ahte addit iežas hálddus ráŋggáštahtti dilálašvuođaid geažil gaskal davviriikkaid. Konvenšuvnna vuolláičálle buot davviriikkat juovlamánu 15.b.2005:s, ja dat lea otnáža rájes fámus.