Buorebut suddjen gálduin ja informánttain

Ráđđehus áigu nannet politiijaid ja áššáskuhttineiseválddi vejolašvuođa suddjet gálduid ja informánttaid.

– Rievdadusat bohtet leat dehálaš veahkkin bargui ahte vuosttildit duođalaš ja organiserejuvvon vearredaguid, dadjá justiisa- ja gearggusvuođaministtar Grete Faremo.

– Oslo politiijaguovlu duođašta ahte leat máŋga dáhpáhusa leamašan gos politiijain leat leamašan dieđut stuorát narkotihkkafierpmádagaid birra, muhto eai leat álggahuvvon dutkkalmasat áššáiduhttoma ja bealušteaddji rievtti geažil oažžut oaidninvuoigatvuođa ráŋggáštusáššedokumeanttaide. Dát ii leat dohkálaš, dadjá Faremo.

Lea dehálaš gálduid ja informánttaid dáhttui addit dieđuid politiijaide ahte sii sáhttet leat áibbas vissásat dasa ahte sin identitehta ii almmuhuvvo. Ráđđehus evttoha danin addit áššáskuhttineiseváldái mihá viidábut lobi dollat identitehta čiegusin ja viiddit vejolašvuođa anonyma vihtanuššamii. Rahppojuvvo maiddái dasa ahte suddjet vihtana identitehta máŋgga dikki oasseválddis, vai hehtte suođđamiid. Jus bealušteaddjái biehttaluvvo oaidninvuoigatvuohta, de sierranas advokáhtta nammaduvvo váldit vára áššáiduhttoma vuoigatvuođaid. – Vejolaš vihtaniidda fertejit addit einnostahttivuođa ja sii fertejit vissásat dasa ahte sin identitehta ii “almmustahttojuvvo viidát”, dadjá Faremo.

Evttohusat leat vuđolaččat árvvoštallojuvvon olmmošvuoigatvuođaid ektui ja bohtet váldit vuhtii riektesihkarvuođa beroštumiid. – Mun áiggun deattuhit ahte kriminálaeastadeami beroštumit leat hui dehálaččat dán áššis, dadjá Faremo.

Čiegus bággoomiid geavaheapmi mielddisbuktá ahte ollu materiálat, nugo jietna- ja govvabáddemat, čohkkejuvvojit sisa. Persovdnasuddjema geažil evttohan mun čielgaset njuolggadusaid dakkár materiálaid jávkkadeapmái, dadjá Faremo.

Ráđđehus evttoha maiddái viiddidit vejolašvuođa geavahit nu gohčoduvvon liigedieđuid gulahallandárkkistemiin ja suollemas latnjaguldalemiin duođaštussan, láhkii nannet jávohisvuođa geatnegasvuođa bealušteddjiide ja veahkkeadvokáhtaide ja nannet suddjema preassa anonyma gálduin.

Láhkaevttohus čuovvola osiid Metodadárkkistanlávdegotti čielggadeamis NÁČ 2009:15 Čiegus dieđut – rabas dárkkisteapmi.