Nanne politiija gáhččodoaibmaovttadagaid distrivttain

Ráđđehus nanne politiija vuođđogearggusvuođa. Eanet politiijaolbmot galget eambbo hárjehallama vearjuduvvon doaimmaid. Politiijaolbmot geat servet báikkálaš gáhččodoaibmaovttadagaide lasihuvvojit 800 rájes 1200 rádjái. Galgá árvvoštallojuvvot ahte Suodjalus  terrora oktavuođas addá eanet veahki.

– Lagaspolitiija lea vuođđun min gearggusvuhtii. Go oahpahit eanet politiijaolbmuid searvat báikkálaš gáhččodoaibmaovttadagaide, de nannet mii politiija návccaid nagodit hálddašit stuora dáhpáhusaid miehta riikka, dadjá justiisa- ja gearggusvuođaministtar Grete Faremo. 

Skuvlet eambbogiid gáhččodoaimmaide
Dál leat 800 politiijaolbmos oahppu ja gelbbolašvuohta searvat báikkálaš gáhččodoaibmaovttadagaide politiijaguovlluin. Politiija háliida skuvlet 200 politiijaolbmo lassin 2013:s ja 2014:s nu ahte lohku sis geat leat vásedin hárjehallan vearjuduvvon doaimmaide lassána1200 rádjái.

Hárjehallet eambbo «báhčin dáhpáhuvvá»
Politiijadirektoráhtta fuolaha maiddái ahte politiijaolbmot obbalaččat vel buorebut hárjehallet sáhttit searvat vearjuduvvon dilálašvuođaide. Sihkkarastin dihte dan, lasihuvvo hárjehallan politiija stuorámus jovkui mas lea vearjolohpi gávcci diimmuin várrejuvvon gieđahallat “báhčin dáhpáhuvvá”dilálašvuođaid. Dasto lasihuvvo dán joavkku jahkásaš hárjehallanáigi 40 diimmus 48 diibmui.

Terrorveahkki suodjalusas
Go kriisa dahje terrorfalleheapmi dáhpáhuvvá, de fertejit báikkálaš politiijas maiddái leat  olámuttos veahkkeresurssat.

– Mii fertet sihkkarastit ahte bargit geain lea doarvái gelbbolašvuohta ja resurssat sáhttet joavdat eanas ássiid lusa Norggas oalle muttolaš áiggis. Dat gáibida buori ovttasdoaibmama gaskal politiija ja Suodjalusa, dadjá Faremo.

Ráđđehus áigu danin árvvoštallat addimis Suodjalusa spesialistaveagaide eanet bargguid veahkehit justiisasuorggi hehttemis terrora. Árvvoštallan gusto sihke Suodjalusa spesiálakommándoi, soahteveaga bissostallikommándoi ja Mariinna bissostallankommándoi.