Politiijabiillaide biddjojit neahttabreahtat

Ráđđehus várre logi millijovnna ruvnno vai politiijabiillat ožžot neahttabreahtaid main lea njuolggo beassan politiija IT-vuogádagaide. Dan bokte sáhttet eambbo barggut čovdojuvvot njuolga joavkobiillain. 

­– Lea stuora lávki rievttes guvlui go eambbo barggut sáhttet čovdojuvvot go leat fealttas.  Ulbmil dás lea oažžut politiija mii beaktilit geavaha DGT-reaidduid integrerejuvvon oassin bargovugiin, lohká justis- ja gearggusvuođaministtar Grete Faremo.

Ná viidásetfievrriduvvo Follo politiijaguovllu pilohtaprošeakta, mas leat leamaš buorit bohtosat go leat váldán atnui neahttabreahtaid ja eará mobiila ovttadagaid joavkobiillain go leat barggus. Áŋgiruššan lea dehálaš oassi politiija Mobiliti prošeavttas, ođđa bálvalus man bokte bargit geat leat fealtabarggus besset politiija IT- vuogádagaide mobiila ovttadagaiguin.

Politiija sáhttá dál, ođđa ruđaiguin maid ráđđehusas ožžot, oastit eambbo neahttabreahtaid ja eará mobiila ovttadagaid joavkobiillaide vai politiija barggut šaddet eambbo beaktilat. 

Dát sáhttá ovdamearkka dihte leat ávkin politiijadárkkistemiid ja dutkamušbargguid oktavuođas.

– Go mobiila ovttadagat váldojit atnui, de dat geahpida operašuvdnaguovddážiid barggu, mat de sáhttet geavahit unnit áiggi addit dieđuid joavkobiillaide. Dasa lassin sáhttet dieđut jođánit sáddejuvvot operašuvdnaguovddážiidda viidáset čuovvoleami váste, juogo eastadandoaimmaid dihte dahje dutkamušaid dáfus, lohká Faremo.