Almmuhus – Geahččalanortnet, mas dorjot kulturealáhusaktevrraid fierpmádagaid ja oktasaš doaibmalanjaid gávpogiin ja guovlluguovddážiin

Kulturdepartemeanta, Ealáhus- ja gávpedepartemeanta ja Gielda- ja guovlodepartemeanta barget ovttas kultuvrra ja ealáhusa ođđa doaibmaplánain, maid sii áigot gárvet 2012. 

Máŋga kulturealáhusaktevrra čujuhit dasa, ahte dárbbašuvvojit inkubáhtorat, deaivvadansajit ja fierpmádagat, namalassii sajit, main bođubargit, ovttaolbmofitnodagat ja unna kulturfitnodagažat, main leat ráddjejuvvon resurssat, sáhttet deaivvadit ja ovdánit fágalaččat, oažžut movtta ja ođđa jurdagiid ja viiddidit fierpmádagaset.

Gaskaoapmeapparáhtas leat máŋga doarjaga, maiguin sáhttá láhčit dilálašvuođaid ođđaráhkadeapmái ja fitnodagaid ovttasbargui, earret eará oktasaš lanjaid doarjagat ja inkubáhtorfálaldagat, maiguin geahččalit movttiidahttit eanebuid álggahit fitnodagaid ja ovddidit birrasa kulturealáhusaid várás.

Doaibmaplána olis departemeanttat lágidit máŋga oaivilseminára. Departemeanttat leat ožžon ollu árvalusaid ja oaiviliid, ja ollugat leat jearran leago oktasašlanjain dakkár ávki kulturealáhusaide, go mii dárbbašuvvo. Leat ovddiduvvon ollu oktasašlanjat kulturealáhusaid várás nu, ahte kulturealáhusaktevrrat leat ieža leamaš álggaheamen barggu. Nu šaddet birrasat ja fierpmádagat, mat geasuhit kulturealáhusaid, muhto dain váilot dávjá doaimmat ja reaiddut, mat dorjjošedje daid nu ahte dat sáhttet ovdánit ekonomalaččat nana kulturealáhussan. 

Dakkár doaimmat sáhttet leat earret eará:

• seminárat ja bargobájit fitnodagaide relevánta hástalusaid hárrái
• mentorat mat sáhttet bagadit ođđa, aiddo álggahuvvon fitnodagaid
• prošeaktajođihanveahkki, mainna ovddidit ealáhusaid ovttasbargoprošeavttaid, main omd. ovddidit ođđa buvttadanvugiid, buktagiid ja bálvalusaid
• rehketdoallo- ja juridihkkaveahkki

 

Dáinna duogážiin ásahuvvo geahččalanortnet, man ulbmilin lea bargat dáid hástalusaiguin, maid kulturealáhusaktevrrat leat ovdanbuktán. Kulturdepartemeanta háliida leat mielde ovddideamen fierpmádagaid ja oktasaš lanjaid kulturealáhusaktevrraide, main leat stuorra ovdánanvejolašvuođat gávpogiin  ja guovlluguovddážiin, ja seammás geahčadit mo gávpogat doibmet guovlluid ovdáneami mohtorin.

Kulturdepartemeanta áigu 2012 čađahit geahččalanortnega, mas juolludit doarjjaruđaid dakkár doaimmaide ja reaidduide, mat ovddidit kulturealáhusaid oktasaš lanjaid gávpogiin ja guovlluguovddážiin.

Ohcanáigemearri: Čakčamánu 23. b. 2012

Ohcansubmi: Eanemusat 1,5 miljovnna kruvnno

Gii sáhttá ohcat:

Oktasašlanjaid lágideaddjit ja fierpmádagat (doarjja ii juolluduvvo ovttaskas olbmuide iige ovttaskas doaimmaide) gávpogiin dahje guovlluguovddážiin. 

Doarjjaohcamušas galgá leat:

• Prošeaktačilgehus, mas muitaluvvo prošeavtta duogáža ja ulbmiliid birra
• Prošeavtta bušeahtta
• Prošeavtta ovdánanplána
• Kontonummir, gosa doarjja máksojuvvo

 

Doarjja ii juolluduvvo:

• Investeremiidda
• Doaibmadoarjjan
• Dutkamii ja ovdánahttimii (DuO)

 

Ohcamuš sáddejuvvo elektrovnnalaččat čujuhussii postmottak@kud.dep.no dahje Kulturdepartementet, Postboks 8030 Dep, 0030 Oslo.