Helge Brekke oaččui jagi 2012 Eaktodáhtolašvuođabálkkašumi

Eaktodáhtolašvuođabálkkašumi 2012 vuoiti, Helge Brekke, lea Knarvikmila primus mohtor Hordalánddas. Viehkangilvvuid ja eará olgodoaimmaid bokte lea son leamaš mielde buorideamen álbmotdearvvašvuođa, ja čoaggán ruđa vai Etiopia oarbbes mánát ožžot oahpu.  Kulturministtar Hadia Tajik geigii bálkkašumi Frivillighet Norge ovddasTV2 God Morgen Norge njuolggosáddagis, juovlamánu 5.b.2012.

- Otná beaivi lea dehálaš beaivi: ON eaktodáhtolašbeaivi.  Mun háliidan hui olu giitit dan golbma evttohasa barggu ovddas maid sii iešguđetge láhkai čađahit ávkin ollusiidda. Sin áŋgiruššamat leat sakka movttiidahtti, celkkii kulturministtar Tajik ovdal go geigii bálkkašumi vuoitái Helge Brekkii. 

  

Eaktodáhtolašvuođabálkkašumi 2012 vuoiti, Helge Brekke ja kulturministtar Hadia Tajik. (Govven: nyebilder.no)

-Mun ferte dušše cealkit duhát giitu! Háliidan erenoamážit giitit sin geat munnje leat oahpahan miellaguottuid. Dat mii munnje addá fámuid jođihit dán barggu lea ahte beassat earáiguin ovttas dahkat juoidá, ja juogadit sihke heajos- ja buriidvásáhusaid. Dál dušše háliidivččen ahte bisošin dearvvasin vai beasan ain joatkit vel moadde jagi, logai Helge Brekke go oaččui bálkkašumi gaskavahku iđit.

Jienasteami olahus
Ii goassige ovdal leat Eaktodáhtolašvuođabálkkašupmái leamaš nu stuora beroštupmi gehččiid gaskkas go dál. Olles 40.000 geahči leat jienastan iežas evttohasa.  Jury fertii válljet ovtta vuoiti golmma gaskkas geat gehččiin ožžo eanemus jienaid.  

Nominašuvdnaproseassa
Frivillighet Norge lea ožžon árvalusaid buot fylkkain. Jury válljii 5 evttohasa. Buohkat leat beassan vuoruid mielde searvat God Morgen Norge prográmmii gos sin birra lea muitaluvvon.  Geahččit leat jienastan 3 finalistta TV2 neahta badjel. Jury lea válljen finalisttaid gaskkas.

Jury vuođuštus dán jagi Eaktodáhtolašvuođabálkkašumi vuoiti ektui:
Helge Brekke lea lassin Knarvikmila doaimmaid vástidan viehkangilvvuid ja iešguđetlágan olgodoaimmaid juohke vahku miehtá jagi.  Dáid doaimmaid bokte besset buot ahkásaččat olggos, gávdnet ustibiid ja gullevašvuođa, ja buot deháleamos- sii bissot dearvvasin. Dán lea Helge Brekke ovddidan jahkeviissaid iežas báikkálaš birrasis. Jahkásaš dáhpáhus ja mii máŋgasa lea movttiidahttán hárjehallat lea Knarvikmila, Norgga stuorimus viehkangilvu. Dán jagi gilvvus oassálaste 6622 olbmo.  Helge Brekke lea leamaš Knarvikmila primus mohtor – eanet go golbmalogi jagi. Helge Brekke lea hui buorre ovdamearka movt olbmot oskkáldasvuođas ja áŋgirvuođas ovddidit servodaga, ja son lea  erenoamážit leamaš mielde  buorideamen álbmotdearvvašvuođa ja báikkálaš eallindili. Knarvikmila lea buktán lassiváikkuhusaid sihke báikkálaččat ja riikkaidgaskasaččat. Báikkálaččat lea Knarvikmila álbmotfeasta seammás go geaidnoviehkan. Ja ovttasbarggus etiopialaš vihkkiiguin ja Unicef vehkiin vai oarbbes mánát Addis Abebas ožžot oahpu, lea dás maiddái veahkehandimenšuvdna.

Dán jagi golbma evttohasa   

Eaktodáhtolašvuođabálkkašumi 2012 finalisttat. Oanehisnjunat čuotnjága birgejupmi, Jo Kristian Kvernland (gurotbealde) ja Håvar Haugan, Helge Brekke ja su eamit Kristin, ja vuođđudus Nytt  Osebergskip, Børge Knutsen  bokte (maŋábealde) ja Geir Røvik. (Govven: nyebilder.no)

Go jienasteapmi loahpahuvvui vuossárgga juovlamánu 3.b. de ledje čuovvovaš golbma evttohasa ožžon eanemus jienaid:

 

• Oanehisnjunat čuotnjága birgejupmi Beitstad báikkis Steinkjer gielddas, Davvi-Trøndelagas
  Sii háliidit nuoraid fuomášahttit ahte sii bohtet bivnnut ja čáppa gilis mainna sii ožžot čevllohallat. Vuolggaheaddjit leaba Håvard Haugen ja Jo Kristin Kvernland.  Soai atniba jáhku, buorre miela, jallodaga ja veaháš vel duođalašvuođa oažžut nuoraid beroštišgohtet eanet iežaset gilis.  Searvi lea váikkuhan dasa ahte Beitstad gilis Steinkjer gielddas leat doaimmat lassánan ja loaktin buorránan. Báikkálaš servodat lea ožžon fuomášumi ja searvi lea álggahan fáttarortnega buot ođđa Beitstalaččaide. Jahkásaš Oanehisnjunat čuonjáfestivála, nuoraid doaimmat ja hutkkálaš čurvestagat nu go “Gjess we can!” ja “Trækk te Beistad du å” leat muhtun ovdamearkkat.

 

• Vuođđudus Nytt Osebergskip Tønsbergas, Vestfoldas
  Dát lea stuora joavku mii lea huksegoahtán ođđa Osebergskiippa Tønsbergas. Ulbmil lea oaččuhit áigái arkeologalaš kopiija Osebergskiippas nu go dat álggos lei dalle go lei ođas jagi 820.  Prošeavtta nuoramus almmái lei 13 jagi go son álggii, ja boarráseamos lei 75 jagi.  Huksenbarggut leat dahkkon olgun Tønsberg hámmanis, ja hui olusat beroštit dán barggus. Máŋga čuođi eaktodáhtolaččat leat searvan prošektii. Tekstiilajoavku lea gorron biktasiid, earát leat gođđán borjasiid, ja muhtumat fas huksen skiippa. Duháhiid mielde mánáidgárdemánát ja oahppit leat nuvttá beassan oahpásmuvvat skiipii ja ožžon dieđuid vikiŋgaáiggi birra. Ieš huksenprošeakta lea ovttasbargu Kulturhistorjjálaš Museain ja Vikingskipshuset ásahusain.

 

Eaktodáhtolašvuođabálkkašupmi
Frivillighet Norge juohká jahkásaččat Eaktodáhtolašvuođabálkkašumi. Bálkkašupmi addojuvvo čalmmustahttin dihtii eaktodáhtolašvuođa, fuomášahttit ja čalmmustahttit eaktodáhtolaččaid ja eaktodáhtolaš doaimmaid ja ovddidit eaktodáhtolaš beroštumi.

Eaktodáhtolašvuođabálkkašumis leat sierra neahttasiiddut. Eanet dieđut bálkkašumis, historjjás ja movt don sáhtát árvalit evttohasaid gávnnat dáppe: http://www.frivillighetsprisen.no/

Eaktodáhtolašvuođabálkkašumi gulahallanolmmoš lea Bente Myhre Haast (bente@frivillighetnorge.no)