Oskoservodagat eai galgga adnojuvvot friddjabáikin: Mánáid illásteapmi galgá váidojuvvot politiijii

- Ráđđehus atná maŋimuš áiggi mánáid illástemiid gávnnahallamiid katolihkalaš girkus hui duođalažžan. Danne áigot čavget ja čielggasmahttit buohkaid geatnegasvuođa geahččalit caggat fasttes vearredaguid dan láhkai ahte váidet dakkáriid politiijii.

Dát dáhpáhuvvá buot daid doaibmabijuid lassin maid ráđđehus lea jo čađahan eastadan dihtii mánáid illásteami. Oskoservodagat eai galgga adnojuvvot friddjabáikin dakkár áššiid dáfus, celket mánáid-, dásseárvo- ja servodahttinministtar Audun Lysbakken, kulturministtar Anniken Huitfeldt ja justiisaministtar Storberget.  

-Norga ii galgga dohkkehit ahte mánát gillájit makkárge veahkaválddi ja seksuálalaš illásteami. Rávesolbmuin lea ovddasvástádus váidit politiijii jus sii vávjet dakkár illástemiid, deattastit golbma stáhtaráđi čielgasit.  

- Mun oainnán ahte lea dárbu aiddostahttit lágas ahte eastadangeatnegasvuohta lea dehálat go jávohisvuođabággu, vaikko vel jávohisvuođabággu lea mearriduvvon lágas, cealká Storberget. Láhkaevttohus ovddiduvvo nu johtilit ahte Stuorradiggi geargá meannudit dan ovdal geasi, ja ahte dat sáhttá fámuidahttojuvvot nu fargga go dat lea dohkkehuvvon.  

- Mis buohkain lea geatnegasvuohta oaidnit mánáid birasteamet, ja váldit oktavuođa mánidsuodjalussii, politiijii dahje eará veahkkeásahusaide jus mii ballat ahte mánná gillá veahkaválddi dahje eaáralágan illásteami. Mánát galget leat oadjebasat juohke sajiin main dal ležžet, mánáidgárddis ja skuvllas, astoáiggis ja ruovttus. Mun vuorddán ahte buohkat, oskoservodagat ge, váldet dán duođas, dadjá mánáid-, dásseárvo- ja searvadahttinministtar Audun Lysbakken.

- Geatnegasvuohta eastadit seksuálalaš illásteami lea dehálat go jávohisvuođabággu. Dat guoská oskoservodagaide ge, ja áiggun aiddostahttit oskoservodagaide ahte dán vuođđojurdaga ii galgga giige eahpidit. Mii háliidit maiddái ahte gáibiduvvo meannudusduođaštus dain guđet leat bálkáhuvvon bargit ja dain guđet barget eaktodáhtolaččat osko- ja eallinoaidnoservodagain mat barget mánáiguin ja nuoraiguin, dadjá  Anniken Huitfeldt.

Eanet dieđuid olbmuide ja pressii sáhttet dát virgehasat addit:

Gulahallanhoavda Maria Brit Espinoza, Mánáid-, dásseárvo- ja searvadahttindepartemeanta, gean ságaide beasat go riŋget mobiilanummirii: 91 55 96 73

Gulahallanhoavda Hanne Gjørtz, Kulturdepartemeanta, gean ságaide beasat go riŋget mobiilanummirii: 95755213

Gulahallanhoavda Gunnar Johansen, Justiisadepartemeanta, gean ságaide beasat go riŋget mobiilanummirii: 97553747