Stuorit valljivuođa resursajoavku nammaduvvon

Kulturministtar Anniken Huitfeldt lea nammadan joavkku mii galgá ovttasbargat kulturásahusaiguin govdadit valljivuođa ektui.

Joavkkus leat vihtta olbmo ja sii válljejit ieža makkár ásahusaid sii galledit. Ulbmiliin lea olahit stuorit sosiála searvama go dagahit ahte stáhta kulturdoarjaga vuostáiváldiid dan barggus šaddet eanet  dihtomielalaččat iežaset strategiijaid ektui.

- Joavkku ferte geahččat departemeanta bajitdási mihttomeari ektui: dagahit kultuvrralaš valljivuođa diehttelassan ja čađačuovvun ásahusa doaimmas, lohká kulturministtar Anniken Huitfeldt.

Ásahusat dál juo raporterejit prográmmadoaimma kultuvrralaš valljivuođa barggu, gehččiiddivššu ja bargiidpolitihka birra.  Joavku galgá válljejuvvon ásahusaid raporttaid vuođul ja njuolga gulahallamis ásahusaiguin, árvvoštallat movt ásahusaid strategiijaid ja bargovugiid bakte vuhtiiváldet kultuvrralaš valljivuođa raporterengáibádusaid ektui.  Joavku galgá ovddidit árvalusaid departementii das maid ásahusat ja departemeanta sáhttet bargat vai ollašuhttet mihttomeari.

Sihke prográmma-, gehččiid- ja bargiidprofiila leat bealit maid joavku geahčadit go  barget. Gažaldagat mat šaddet digaštallojuvvot joavkkus lea earret eará dat movt ásahusat barget vai olahit unnitálbmotgehččiide, movt sii barget vai sáhttet viidát guovllus rekruhttet bargiid ja movt dát váikkuha ásahusa dáiddalaš buvttadeami.

Joavkku lahttut:

• Liv Hege Skagestad (joavkojođiheaddji):  Oslo Boanddanuoraidsearvvi plána- ja ovdánahttinjođiheaddji. Skagestad dat lea vuolggahan prošeaktajurdaga “Dat girjás lávdi”, man son ain jođiha. Son lea ovdal earret eará bargan kulturmuitogeavahemiin Birasgáhttendepartemeantas.
• Sampda ”Samsaya” Sharma lea India-norgga lávlu ja neavttár guhte bures lea sajáiduvvan Norgii.  Son lea erret eará leamašan mielde Nuoraid Kulturdeaivvadeamis, ja rocka NM-gilvvus  son čuojahanjoavkkuinis šadde nubbin buoremus dalle go serve. Son lea almmuhan moanaid skearruid ja lea neavttáriin leamašan mielde máŋgga filmmain. Samsaya lea maiddái bargan tv´s ja radio´s.
• Mostafa Pourbayat: Ráđđeaddi Hedemárkku fylkkasuohkana máŋggakultuvrralaš  áŋgiruššamis 1998 rájes. 20 jagi vásáhus máŋggakultuvrralaš barggus. Pourbayat duogáš lea servodatdiehtti ja váldán jođihanoahpu. Son lea erret eará leamašan mielde huksemis Glomdal dávvirvuorkká máŋggakultuvrralaš gealboguovddáža. Son lea maiddái leamašan Hedemárkku fylkkasuohkana kulturplána, máŋggakultuvrralaš Hedemárku, áššejođiheaddji. Son lei miellahttun girjáivuođajagi referánsajoavkkus. Ássá Hedemárkkus.
• Nefise Özkal Lorentzen, filbmadahkki. Son lea dahkan máŋga dokumentárafilmmaid máŋggakultuvrralašvuođa birra, earret eará ”Gender me”- isláma ja homofiliija birra, ”Dat dáhpáhuvai dalle, dat dáhpáhuvvá odne”- norgga soahteveteránaid ja dálá báhtareaddjit, ja tv-buvttadeapmi mánáide máŋggakultuvrralaš birrasis Nesoddenis. Özkal Lorentzen lea bargan oahpaheaddjin filbmasuorggis ja lea máŋgii bargan Kultuvrralaš skuvlalávkka ovddas. Ássá Nesoddenis.
• Kjell Magne Mælen, Romssa Universitehta dáiddafágalaš fakultehta dekána. Kjell Magne Mælenis lea Norgga áidna doavttirgráda gehččiidovdánahttimis. Sus lea viiddis fidnovásáhus, sihke vuođđoskuvlla oahpaheaddjin, journalistan, allaskuvlla- ja universitehtalektorin ja moanat virggi almmolaš hálddašeamis fylkkadásis.