Dáidda ja kultuvra galgá buohkaide ávkin

-Maŋimuš jagiid lea kultuvra vásihan historjjálaš áŋggirdeami.  Boahttevaš jagiid hástalus lea movt oažžut eambbosiid geavahit dáidda- ja kulturfálaldagaid mat juo gávdnojit, dadjá kulturministtar Anniken Huitfeldt. –Mun sakka beroštan das ahte buohkat galget oažžut kulturfálaldagaid, erenoamáš sii geat hárvenaš servet kultureallimii otne, cealká Huitfeldt.

Kulturministtar Anniken Huitfeldt ovdanbuvttii otne Meld. St.10 (2011-2012) Kultur, inkludering og deltaking (ođđadárogiella). Dieđáhusa váldoulbmilin lea buohkaide addit seammá vejolašvuođaid oassálastit kultureallimii. Kultureallin galgá speadjalastit girjáivuođa ja ovddidit ođđa jienaid. Almmolaš ruhtaduvvon kulturásahusaid  váldodoaibma lea ollašuhttit dáid ulbmiliid, ovttas eaktodáhtolaš kultursurggiin.  Kultursuorgi galgá bargat árjjálaččat ja systemáhtalaččat fátmmastahttin áššiiguin.

Muhtun doaibmabijut dieđáhusas:

-ásahit kulturgaskkustanortnega bargoeallimii,  Kultuvrralaš niestepáhkka
-ásahit kulturprográmma mánáid- ja nuoraiddoaimmaid doarjjaortnegiidda (stuorragávpotortnet)
- oaččuhit áigái vásáhuskoarta geahččalanortnega mánáide ja nuoraide dakkár bearrašiin geain leat heajos ruhtavárit 
-ásahit kulturskuvlafálaldat geahččalanortnega mánáidskuvladássái
-movttiidahttit girjerádjosiid ja eaktodáhtolaš suorggi ovttasbargat
-láhčit dili systemáhtalaš geavaheaddjiovddideapmái  
-dáiddaásahusaid aspirántaortnet
-digitála neavvuid geavahit olahan dihtii eambbosiid
-eanet ruđaid juolludit eaktodáhtolašguovddážiidda dakkár guovlluin gos ásset erenoamáš olu sisafárrejeaddjit