Momsabuhtadusa evalueren – eaktodáhtolaš suorgi lea duhtavaš ortnegiin

Kulturdepartemeanta lea čađahan plánejuvvon evaluerema momsabuhtadusortnegis eaktodáhtolaš organisašuvnnaide. 136 organisašuvnna leat searvan jearahallaniskkadeapmái.

Evaluerenraporta (girjegillii) (.pdf)

- Lea erenoamáš positiivvalaš ahte nu ollu smávva organisašuvnnat leat searvan iskkadeapmái, measta 50 proseanttas organisašuvnnain mat leat vástidan leat vuollel 5000 miellahtu, dadjá kulturministtar Hadia Tajik.

Raporta čájeha ahte organisašuvnnat leat duhtavaččat ortnegiin ja 67 proseanta dadjá sii vásihit ortnega leat ii-byrokráhtalažžan. – Dát leat buorit ruovttoluottadieđut ja ortnega áigumušaid mielde. Mii áigut joatkit álkidahttimiin eaktodáhtolaš organisašuvnnaide ja áigot geahčadit mot ortnega sáhttá vel eanet álkidahttit. Evalueren lea dehálaš oassin dán proseassas ja čuovvoluvvo lagas ovttasbarggus eaktodáhtolaš surggiin, nugo Frivillighet Norgiin, cealká kulturministtar Tajik.

- Sáhttá nu ahte mánáid- ja nuoraidorganisašuvnnat ja sisafárrejeddjiidorganisašuvnnat doivot ahte ortnet lea váddáseappot go dan maid dat lea. Mun sávan ahte sii oidnet ahte ii leat nu váttis ohcat, ja ahte eambbogat sis ohcet boahtte háve, dadjá Tajik.

Momsabuhtadusortnet lea dat stuorámus árjjaid bidjan eaktodáhtolaš suorgái stáhtabušeahta bokte mii goassege lea leamašan. Eambbo go 16 000 searvvi ja joavkku vuostáiváldet 619,6 miljovnna ruvnno momsabuhtadusa 2012:s, ja lea evttohuvvon dán lasihit 230 miljovdna ruvnnuin 2013:s.

Evaluerema lea čađahan PricewaterhouseCoopers (PwC). Árvvoštallamii lea dehálaš vuođđun iskkadeapmi mas jearahalle eaktodáhtolaš organisašuvnnaid, mii čađahuvvui čakčamánus.