Siri Hatlen nammaduvvo nuoraid OG-stivrajođiheaddjin
Historjjálaš arkiiva
Almmustahttináigodat Regjeringen Stoltenberg II
Almmustahtti: Kulturdepartemeanta
Preassadieđáhus | Nr: 05/12 | Almmustahtton: 16.01.2012
Siri Hatlen lea odne nammaduvvon nuoraid - OG 2016 ráhkkaneami ja čađaheami organisašuvdnalávdegotti stivrajođiheaddjin.
Siri Hatlen lea odne nammaduvvon nuoraid - OG 2016 ráhkkaneami ja čađaheami organisašuvdnalávdegotti stivrajođiheaddjin.
Gurut bealde: Norgga falástallanlihtu váldočálli Inge Andersen, Lillehammer sátnejođiheaddji Espen Granberg Johnsen, falástallanpresideanta Børre Rognlien, aitto nammaduvvon nuoraid-OG stivrajođiheaddji Siri Hatlen, kulturministtar Anniken Huitfeldt ja Gaskariikkalaš olympialaš lávdegotti márkanhoavda Gerhard Heiberg. (Govven: Wenche Stadven Nybo/Kulturdepartemeanta)
Siri Hatlen lea leamašan Oslo universitehtabuohcceviesu hálddahuslaš direktevra ja Statkraft konsearnadirektevra, sus leat leamašan Statoilas máŋggalágan jođiheaddjivirggit ja sus leat leamašan iešguđetlágan jođihanbarggut sihke priváhta ja almmolaš suorggi rievdadusaid ja nuppástuhttimiid oktavuođas. Hatlen lea leamašan Helse Øst, Det Norske Samlaget, Vinmonopolet, SIVA, Blom ASA, Undervisningsbygg ja Stáhta oahppoloatnakássa stivrajođiheaddji, ja iešguđetge fitnodagain nugo SMEDVIG ASA:s, PGS ASA:s ja Kongsbergruppen ASA:s leamašan stivralahttun.
- Lean hui duhtavaš go Siri Hatlen háliida leat YOGOC stivrajođiheaddji, dadjá kulturministtar Anniken Huitfeldt. - Šaddá hástaleaddji bargu jođihit nuoraid - OG stivrra. Siri Hatlenas lea hui buorre stivrajođiheaddji gelbbolašvuohta iežas viiddis ja nanu vásáhusaid geažil almmolaš ja priváhta doaimmain, dadjá Huitfeldt.
Stáhta lea addán stáhtadáhkádusa meroštallojuvvon 409 miljovnna ruvdnui ja 232 miljovnna ruvnno doarjaga lágidit 2016 nuoraid dálve-OG Lillehammeris.
Stuoradiggi lea mearridan ahte organisašuvdnalávdegoddi 2016 nuoraid – OG (YOGOC) ráhkkaneapmái ja čađaheapmái ásahuvvo oasusfitnodahkan mas stáhtalaš eaiggátvuohta ja stivraoassálastin dahká eambbo go 50%. Dát dahkkojuvvo vai sihkkarastá ahte sihke stáhtadáhkádus ja stáhtadoarjja fuolahuvvo rievttes lági mielde.
Vuosttaš nuoraid dálve-OG historjjás álgá dán vahkku bearjadaga Innsbruckas. Danin gártet unnán vásáhusat vuođđun go 2016 nuoraid - OG galgá plánet.
Duogáš
Nuoraid - OG lea olympialaš falástallanlágideapmi nuoraide ahkejoavkkus 14-18 jahkái, ovttas kultur- ja oahppoprográmmain dat guovdilastá olympialaš ovdagovaid nugo ustitvuođa, oktiigullevašvuođa ja albma gilvvohallamiid. Olympialaš prográmmas gilvohallet čieža dálvefalástallansuorggis: Čierastallan, bob ja skeleton, curling, jiekŋahockey, čuoigan, čuoiganbáhčin, luisten ja snowboard. Lillehammer lágida 2016 nuoraid - OG ovttas suohkaniiguin Øyer, Gjøvik ja Hamar. Lágideapmi bistá logi beaivvi ja dasa servet sullii 1000 falástalli ja 500 jođiheaddji ja hárjeheaddji. Vuosttaš nuoraid geasse – OG lágiduvvui Singaporas 2010:s, ja vuosttaš dálvegilvvut lágiduvvojit Innsbruckas, Nuortariikkas 2012 ođđajagimánus. Viidáset lea mearriduvvon ahte 2014 geassegilvvut galget lágiduvvot Nanjingas, Kiinás.