Suoidnemánu 22.beaivvi 2011 jahkebeaivvi čalmmusteapmi

Utøya ja ráđđehuskvartála fallehemiid jahkebeaivi čalmmustuvvo iešguđet lágan doaluiguin miehtá riikka.  Ráđđehus lea mearridan láhčit dilálašvuođaid našunála čalmmustemiide suoidnemánu 22.beaivvi 2011 jahkebeaivvi oktavuođas. Dát leat:

 

• Lieđđebidjamat ráđđehuskvartálas
• Eahketdoalut olgun Rådhusplassen nammasaš báikkis Oslos sártniiguin ja musihkain.  Doalut sáddejuvvojit njuolggosáttan  TV bokte.

Dasa lassin lágiduvvojit muitoipmilbálvalusat Norgga girkus, earret eará Oslo duopmogirkus ja Hole girkus.

Ráđđehus áigu maid praktihkalaččat veahkehit doaluid oapmahaččaid lágidemiid oktavuođas  Utøyas iđđedis suoidnemánu 22. beaivvi  ja AUF doaluin Utøyas maŋŋelis seamma beaivvi. 

-Suoidnemánu 22.beaivvi dáhpáhusat leat čuohcan midjiide buohkaide, ja ráđđehus háliida veahkehit vai olles álbmot beassá searvat čalmmustemiide jagi maŋŋil, dadjala kulturministtar Anniken Huitfeldt.