Álkiduvvon lassiárvovearu buhtadusortnet eaktodáhtolaččaide

Kulturdepartemeanta lea otne rievdadan láhkaásahusa lassiárvovearu buhtadusa birra, vai smávva eaktodáhtolaš organisašuvnnat buorebut sáhttet geavahit ortnega. Ortnega ulbmilin lea ovddidit eaktodáhtolaš doaimmaid lassiárvovearu buhtadusaid bokte.

-Dát rievdadusat álkkásmahttet ja vuolidit revišuvdnagoluid eaktodáhtolaš suorggis, ja smávva organisašuvnnat ožžot maid lassiárvovearu buhtadusa. Dat lea Ráđđehusa ulbmiliid mielde ahte geavahit unnimus áiggi skoviid deavdit ja eanemus áiggi doaimmaide, cealká kulturministtar Hadia Tajik.

Lassiárvovearu buhtadusa rievdadusat leat čuovvovaččat:

• Vuolimusmearri ohcat buhtadusa lea rievdaduvvon 300 000 kruvnnus 200 000 kruvdnui álkiduvvon málles ja 21 000 kruvnnus 14 000 kruvdnui duođaštahtti málles
• Mearri gáibidit registrerejuvvon-/stáhtaautoriserejuvvon- dahje gielddarevisora ovttaskas ohcciin, váldoorganisašuvnnain ja oasusservviin álkiduvvon málles lea lasihuvvon 5 miljovdnii seammá go vuolleorganisašuvnnain
• Mearri gáibidit registrerejuvvon-/stáhtaautoriserejuvvon- dahje gielddarevisora ovttaskas ohcciin, váldo- guovllu-, báikkálašorganisašuvnnain ja oasusservviin duođaštahtti málles lea lasihuvvon 3 miljovdnii
• Gáibádus vurkkodit dokumeanttaid lea vuoliduvvon 10 jagis 3 jahkái duođaštuvvon málles, váldoorganisašuvnnas, guovloorganisašuvnnas ja ovttaskas ohcciin, ja báikkálašorganisašuvnnas fas 3 jagis 1 jahkái
• Gáibádus vurkkodit dokumeanttaid lea vuoliduvvon 10 jagis 3 jahkái álkiduvvon málles, váldoorganisašuvnnas, guovloorganisašuvnnas ja ovttaskas ohcciin