Árvalus rievdadit tihppenruđaid juogadanvuogi servodatberošteaddji ja humanitára organisašuvnnaide sáddejuvvo gulaskuddamii

Árvalus rievdadit ruhtaspeallolága ja láhkaásahusa Norsk Tipping badjebáhcaga juogadeami birra servodatberošteaddji ja humanitára organisašuvnnaide sáddejuvvo otne viiddis gulaskuddamii.

-Badjel 600 miljovnna kruvnnu Norsk Tipping badjebáhcagis juogaduvvo servodahkii ávkkálaš ja humanitára organisašuvnnaide. Dál juogaduvvojit ruđat dušše organisašuvnnaide mat tinejedje spealloautomáhtaiguin jagi 2001, ovdal go dat šadde lobiheamit. Guhkit áiggi vuollái ii leat doallevaš juogadit badjebáhcaga dákkár ákkaid vuođul. Ulbmilin árvalusain maid mii dál sáddet lea hábmet nanu objektiivvalaš juogadančovdosiid mat searvadahttet  eaktodáhtolaš suorggi buorebut, cealká kulturministtar Hadia Tajik.

Árvaluvvon rievdadusaid ulbmil:

-sihkkarastit guhkitáigásaš ja nanu vuogi movt juogadit tihppenruđaid servodatberošteaddji ja humanitára organisašuvnnaide,

-joatkit dehálaš servodatdoaimmaid maid servodatberošteaddji ja humanitára organisašuvnnat čađahit.

Árvalus lea ráhkaduvvon guorahallama vuođul maid Oxford Research lea čađahan departemeantta dáhtu mielde.

Gulaskuddamis leat čuovvovaš váldooasit:

-Gaskaboddosašortnet árvaluvvo dálá vuostáiválddiide

-Ođđa eavttut árvaluvvojit mat mearridit makkár organisašuvnnat galget oažžut tihppenruđaid

Ođđa juogadanvuohkái biddjo vuođđun ahte Rukses Ruossa, Gádjunvuođđudus ja Norgga Álbmotveahkki galget oažžut oasi ruđain joatkit gearggusvuođadoaimmaid maid dát organisašuvnnat doaimmahit.

-Dát eaktodáhtolaš organisašuvnnat čađahit dehálaš gearggusvuođadoaimmaid, ja mii eat hálit geanohuhttit sin, dadjá kulturministtar.

Departemeanta bivdá oaiviliid boahtteáiggi tihppenruđaid juogadančovdosii, ja čujuha modeallaide mat divaštallojuvvojit Oxford Research guorahallamis.

Dan oktavuođas go mearriduvvui čielggadit tihppenruđaid juogadeami humanitára ja servodatberošteaddji organisašuvnnaide, de dieđihuvvui ahte ođđa spealloohcamušat eai meannuduvvo ovdal go čielggadeapmi dahkko. Departemeanta lea árvvoštallan Fairchance ja Postkodelotteriet ohcamušaid ja mearridan ahte sidjiide ii addo lohpi ásahit dáid vuorbádemiid.

-Láidestus min speallopolitihkkii lea ovddasvástádus. Danne mii háliidat bisuhit oktovuoigatvuođamodealla mas Norsk Tipping hálddaša ruhtaspealuid. Dat sáhttá  buoremusat ráddjet váttis speallomeanuid, ovdalgo priváhta aktevrrat, lohká Tajik.

Departemeanta áigu maid addit lobi álggahit spealu Nabolaget mii lea okta Norsk Tipping dábálaš spealuin. Sisaboađut galget gaskaboddasaččat mannat humanitára ja servodatberošteaddji organisašuvnnaide.

 

Gulaskuddanáigemearri lea geassemánu 4.b.2013, dáppe gávnnat gulaskuddandokumeanttaid (girjedárogiella)

Oxford Research guorahallan (girjedárogiella)