Buvttadandoarjjarievdadusat sáddejuvvon gulaskuddamii

Kulturdepartemeanta sádde beaiveaviissaid buvttadandoarjjarievdadusaid gulaskuddamii. Departemeanta árvala gulaskuddamis buhtadit dálá tinengildosa muddejuvvon tienasmálliin.

-Nugo tinengielddus dál doaibmá, de lea eanet gánnáhahtti bidjat ruđaid báŋkui go aviisadoibmii. Muddejuvvon tienasvuohki mielddisbuvttášii ahte šaddá eanet geasuheaddjin investeret smávva mediafitnodagain, cealká kulturministtar Hadia Tajik.

Duogáš árvalussii lea ahte departemeanta ádde ahte sáhttá šaddat váttisin ođasmediaásahusaide – erenoamáš smávva ásahusaide – oažžut riskakapitála, ja tinengielddus dáinna vugiin hehtte dárbbašlaš ovdáneami ja ođasteami dán suorggis.

Dasto árvala departemeanta ásahit eanet ja čielgasit ráddjemiid mat gusket vuođđudusaid gávpedoaimmaide konsearnavuođđudusaiguin ja sullasaččaiguin. Dat lea áibbas mearrideaddjin ortnega lobálašvuhtii ahte doarjja geavahuvvo doarjjavuoigaduvvon doaimmaide.

Loahpas árvala departemeanta rievdadit nu gohčoduvvon “Oslo-máksomeari” nummar guokte-mediaid várás “riikamáksomearrin”. Departemeanta dáinna lágiin hehtte ahte doarjjamáksomearit  sávatkeahttá váikkuhit dasa ahte ođasmediat fárrehit váldokantuvrraset Osloi.