Ođđa kulturlokten

Eanet kultuvrii, mánáid ja nuoraid áŋgiruššamiidda ja báikkálaš kulturfápmoguovddážiidda ledje  váldoáššit go ráđđehus ovddidii iežas ođđa kulturloktema. – Kultuvra duddjo buriid vásáhusaid ja eallinkvalitehta. Kulturdoaimmat mielddisbuktet searvama, máhtolašvuođa ja áddejumi. Danne ovddida ráđđehus ođđa Kulturloktema mas leat ollu viiddis áŋgiruššamat, cealká stáhtaministtar Jens Stoltenberg.

Stáhtaministtar Jens Stoltenberg, stáhtaráđđi Liv Signe Navarsete, SG-jođiheaddji Audun Lysbakken ja stáhtaráđđi Hadia Tajik ovddidedje sotnabeaivvi Kulturloktema. Das lea ráđđehus deattuhan boahtteáiggi kulturpolitihkalaš váldomihttomeriid.  

Jagi 2005 rájes lea Stoltenberg II ráđđehus ovddidan juo guokte kulturloktema, jagi 2005 ja 2009.

-Mii leat duppalastán kulturbušeahta. Dát addá kulturvásáhusaid ja searvanvejolašvuođaid miehtá riikka. Dál joatkit mii. Boahtte stuora kulturloktemiin áigut mii vuoruhit kultuvrralaš geađgejuolggi, eanet kultuvrralaš fápmoguovddážiid mat hástalit guđet guimmiideaset ja kvalitehta ja ovddidit ođđa kulturčehpiid, cealká kulturministtar Hadia Tajik.

Kulturloktema čuoggás “Kultuvrra geađgejuolgi” lohpida ráđđehus buoridit ovttastahttima stáhta, fylkka ja gielddaid gaskka. Ráđđehus áigu maid álggahit doaimmaid ovddidit nationála strategiija girjerájussuorgái ja nannet álbmotgirjeráju gaskkustandoaimmaid.

-Rikkis ja máŋggabealat kulturfálaldagat leat dehálaččat duddjot geasuheaddji báikegottiid. Ovddit áiggiid kulturloktendoaimmat čájehit ahte dál lea dárbu ođđa kulturloktemii. Mis lea dárbu dássedit juogadit kulturruđaid geográfalaččat ja nannet báikkálaš kulturásahusaid, muitala gielda- ja guovloministtar Liv Signe Navarsete.

Ráđđehus áigu Kulturloktema bokte láhčit dili buriid kulturvásáhusaide olles eallimii, earret eare dahkat kulturskuvladiimmu láhkageatnegahtton doaibman.

-Kulturlokten lea addán máŋga duhát mánnái vejolašvuođa čuovvut kulturskuvlla fálaldagaid. Dál háliidat viidásat. Čakčat ožžot buohkat nuvttá kulturskuvladiibmofálaldaga ja boahtteáiggis áigut mii addit stáhtadoarjaga gielddaide vai sosiáladilit dássejuvvojit ja nu ahte kulturskuvlla fágalaš fálaldagat nannejuvvojit, dadjá Audun Lysbakken.

Kulturlokten