Ráđđehus bidjá ođđa áŋgiruššamiid kulturealáhusaide

Ráđđehusa ođđa doaibmaplána kulturealáhusaide láhčá dili dasa ahte galgá leat lagas ovttasbargu gaskal Innovašuvnna Norgga ja Norgga kulturráđi. Kulturealáhusaide galgá maiddái ásahuvvot suorgeráđđi. Mihttomearri plánain “ fitnodatálggaheaddjis kulturfitnodahkii” lea oažžut eanet árvoháhkama ja olgoriikii fievrredeami kulturealáhusain, ja ahte eambbogat galget birget sáhttit iežaset doaimmain.

- Kulturloktema bokte lea juolluduvvon eambbo ruhta buot kultursuorggi osiide. Ráđđehus lea bidjan vuođđoinvesterema kultuvrii. Dát galgá addit kulturealáhusaide vuođu gánnáhahtti ovdáneapmái. Danin mii dál ovttasbargat golmma departemeanttas dahkat geainnu fitnodatálggaheaddjis gánnáhahtti kulturfitnodahkii álkibun, dadjá kulturministtar Hadia Tajik.

Plána lea ásahuvvon ovttasbarggus gaskal Kulturdepartemeantta, Ealáhus- ja gávpedepartemeantta ja Gielda- ja guovlodepartemeantta, ja  ovdanbuktojuvvui gaskavahkku, miessemánu 29.beaivvi

­–Kulturáŋgiruššan addá báikkálaš liigeváikkuhusaid. Lassin dasa ahte kulturealáhus buktá ođđa bargosajiid, dat movttiidahttá olbmuid orrut boaittobeale báikkiin. Valljugas kultureallin dahká min riikka bivnnuhin ja ealasin, ja dat movttiidahttá ođđahutkamii. Barggolašvuođa ovdáneapmi ja kulturfitnodagaid lohku lea stuorámus guovlluin gos lea bieđggus ássan  Doaibmaplána galgá fuolahit ahte kulturfitnodatálggaheaddjit ožžot buriid eavttuid viidáset ovddideapmái, dadjá gielda- ja guovloministtar Liv Signe Navarsete.

Váikkuhangaskaoapmeapparáhtas ođđa áŋgiruššan
Dehálaš doaibma plánas lea Norgga kulturráđi ja Innovašuvnna Norgga kulturealáhusáŋgiruššan. Áŋgiruššan galgá váikkuhit eanet profešonaliseremii, innovašuvdnii ja gávppálašvuhtii kulturealáhusain. Dat golbma departemeantta juolludit juohkehaš 5 miljovnna ruvnno (2013:s).

- Lea gáibidahkes ovddidit iežas buvtta- ja bálvalusidéaid  vuovdima várás gávpemárkanii.   Kulturfitnodatálggaheaddjit vásihit máŋggalágan hástalusaid ea.ea. gávpegelbbolašvuođa, ruhtadeami ja fierpmádathuksema ja riikkaidgaskasaš márkaniidda beassama dáfus. Danin mii láhčit dál dili gelbbolašvuođaovddideapmái, bagadallanbálvalusaide, doarjjajuolludeapmi fitnodatfierpmádagaide ja ovtta báikái bidjama kulturealáhusovddasteddjiid, dadjá ealáhus- ja gávpeministtar Trond Giske.

Plánas ovdanbuktojuvvojit maiddái doaimmat eanet ovttasdoaibmama váste gaskal kultuvrra ja mátkeealáhusa.

Eanet máhttu kulturealáhusaid birra- suorgeráđđi ja máhttoguovddáš
Ain eanet kultuvrra buvttadeamis, juohkašumis ja geavahusas sirdašuvvá digitála gaskaomiide. Dát buktá dárbbu relevánta ja ođasmahttojuvvon máhttui kulturealáhusaid birra. Máhttu lea dehálaš ealáhusaid gaskkas, váikkuhangaskaoapmeapparáhtas ja sin gaskkas geat galget ovddidit politihka dán suorggis. Plánas leat dán suorggis máŋga doaimma.

Ráđđehus ásaha kulturealáhusaide suorgeráđi divaštallan dihte suorggis oktasaš áššečuolmmaid ja politihkkahábmema. Dát addá ealáhusaide jahkásaš deaivvadanbáikki dan golmma departemeantta politihkkáriiguin mat ovdanbidjet kulturealáhusplána, gos sáhttá divaštallat kulturealáhusa hástalusaid ja vejolašvuođaid.

Ráđđehus danin dieđiha plánas ahte dat áigu ásahit kulturealáhusaide máhttoguovddáža, guorahallat digitála hástalusaid musihkkasuorggis ja ásahit mediadutkanguovddáža. Dasa lassin áigu ráđđehus ráhkadit ođasmahttojuvvon statistihka das makkár mearkkašupmi kulturealáhusain lea norgga ekonomiijai.