Ruhtaalmmuheapmi ovttasbargoprošeavttaide gaskal kulturaktevrraid ja mátkeealáhusa

Kulturdepartemeanta almmuha ruđaid mat galget váikkuhit dasa ahte kulturealáhusaktevrrat ovttas mátkeealáhusain ovdánahttet ođđa hutkojuvvon prošeavttaid.

Doaibmaplána ”Fitnodatálggaheaddjis kulturfitnodahkii" (girjedárogiella)

- Norggas lea sihke ealli kultureallin ja máŋggabealat kulturhistorjá mii addá sisdoalu mátkeealáhusbuktagiidda. Buorre ovttasdoaibman  gaskkal osolaččat sáhttá leat mielde dagaheames ahte kulturaktevrraid guosselohku ja gálvojohtu lassána. Dasa lassin sáhttá kulturfálaldat leat dehálaš go galgá sihke sis- ja olgoriikka guosseloguid lassánit, maiddái dain áigodagain go dábálaččat leat unnán guossit, lohká kulturminister Hadia Tajik.

Kulturdepartemeanta juolluda dál 1,8 miljovnna ruvnno ovttasbargoorganisašuvnnaide. Ohcanáigemearri lea borgemánu 12.b.2013:s ja ohcansubmi sáhttá leat gitta 0,5 miljovnna ruvnno stuoru. Kulturealáhusaktevrrat geat ovttasbarget mátkeealáhusain sáhttet ohcat.  

Kulturdepartemeanta, Ealáhus- ja gávpedepartemeanta ja Gielda- ja guovlodepartemeanta leat ovttasbargan kulturealáhusa doaibmaplánain mii ovdanbuktui 2013 miessemánus. Plánas leat ollu doaimmat biddjon ealáhuseallima kulturheivehuvvon vásáhusaide. Ráđđehus áigu ahte mátkeealáhus galgá eambbo aktiivvalaččat ovttaiduhttit kultuvrra iežaset buktagiidda ja ahte kulturaktevrrat atnet ávkki dain vejolašvuođaid mat gávdnojit turismmas ja mátkeealáhusas.    

-------

Almmuhanteaksta:

Almmuheapmi: Ovttasbargu gaskkal kulturealáhusaid ja mátkeealáhusaid

Kulturdepartemeanta, Ealáhus- ja gávpedepartemeanta ja Gielda- ja guovlodepartemeanta leat ovttasbargan kulturealáhusa doaibmaplánain mii ovdanbuktui 2013 miessemánus. Plánas leat ollu doaimmat biddjon mátkeealáhusa kulturheivehuvvon vásáhusaide. Mii áigut ahte mátkeealáhus galgá eambbo aktiivvalaččat ovttaiduhttit kultuvrra iežaset buktagiidda ja ahte kulturaktevrrat atnet ávkki dain vejolašvuođain mat mátkeealáhusas gávdnojit. Buorre ovttasbargu osolaččaid gaskkas sáhttá leat mielde viidásetovddideame ja nanneme kulturvuđot buktagiid ja bálvalusaid, seammás go kulturaktevrrain sáhttá guosselohku ja gálvojohtu lassánit.  

Norggas lea sihke ealli kultureallin ja máŋggabealat kulturhistorjá mii iešguđet ládje sáhttá mielde addime sisdoalu mátkebuktagiidda: Kulturlágideamit nugo feastačuojaheamit Bergenis, Øya- festivála Oslos ja Riddu Riđđu festivála Gáivuonas leat ovdamearkkat lágidemiide mat geasuhit sihke sisriikka ja olgoriikka turisttaid, ja main lea stuora mearkkašupmi báikkálaš mátkeealáhussii. Riikkaidgaskasaš dovddus dáiddáriid nugo Ibsena, Griega ja Muncha muittut leat áimmahuššojuvvon sierra museaid bokte. Ollu dáidda- ja kulturhistorjjálaš museat sáhttet addit erenoamáš vásáhusaid, ja ollu dakkár museain fitnet oalle ollu turisttat geassemánuin. Ođđa kulturviesuin, nugo Oslo operavisttis, Kristiansunda teáhter- ja konseartavisttis dahje Stavangera konseartavisttis, lea potensiála geasuhit eará báikki olbmuid johtit dohko. Kulturhistorjjálaš visttit, nugo stáhpegirkut ja eará visttit gaskkaáiggis, sáhttet iešalddis juo leat mátkemihtut. 

Kulturfálaldat sáhttá leat dehálaš doaibma mainna lasiha eará báikki olbmuid johtima, maiddái áigodagain go dábálaččat leat unnán guossit. Lea dehálaš ahte mátkeealáhus ja kultursuorgi ovttas identifiserejit kultursuorggi vejolaš buktosiid mátkeealáhusa oktavuođas, nu ahte kulturelemeanttat sáhttet šaddat oassin mátkeealáhusbuktagiid ja –vásáhusaid ollislaš ovdáneamis.

Eaktun dasa lea ahte ásahuvvojit rutiinnat ja fierpmádagat mat laktet ja ožžot gulahallama gaskkal mátkeealáhusaktevrraid ja kommersiála ja ii- kommersiála kulturaktevrraid. Buriin gulahallamiin ja láhčimiin sáhttet báikkálaš konsearttat, čájáhusat, čájálmasat ja museat addit dehálaš buktosiid ollislaš mátkevásáhusaid ovdáneapmái. 

Mátkeealáhuspolitihka bajitdási ulbmil lea oažžut daid iešguđetge aktevrraid mátkeealáhusas ja mátkeealáhusa birra ovttasbargat ja seamma guvlui bargat. 

Kulturdepartemeanta almmuha dál ruđaid mat galget váikkuhit dasa ahte kulturealáhusat ovttas mátkeealáhusain ovdánahttet ođđa hutkojuvvon prošeavttaid. Ulbmil dainna lea oažžut ovdánahttojuvvot ođđa ovttasbargovugiid gaskkal kulturealáhusaid ja -aktevrraid ja mátkeealáhusa. Prošeavttain berre leat sirdinárvu ja eaktuduvvo ahte prošeavttas lea rabas vásáhuslonohallan.  

Ohcanáigemearri: borgemánu 12.beaivi 2013

Ohcansubmi: Gitta 0,5 mill. ruvnno

Gii sáhttá ohcat:

Kulturealáhusaktevrrat geat ovttasbarget mátkeealáhusaktevrraiguin.

Doarjjaohcamis galgá leat mielde:

• Prošeaktačilgehus dieđuiguin prošeavtta duogáža ja ulbmiliid birra
• Prošeavtta bušeahta
• Prošeavtta ovdánanplána
• Kontu nummar gosa doarjja galgá máksot

Doarjja ii addo:

• Doibmii
• Investeremiidda
• DjO

Ohcan sáddejuvvo elektrovnnalaččat postmottak@kud.dep.no dahje Kulturdepartementii, Boastaboksa 8030 Dep, 0030 Oslo.