Spealloruđaid juogadanvuogi ođđa eavttut servodatberošteaddji ja humanitára organisašuvnnaide

Ráđđehus lea mearridan ođđa eavttuid movt juohkit spealloruđaid erenoamážit servodatberošteaddji ja humanitára organisašuvnnaide. Ulbmil rievdadusaiguin lea láhčit diliid nu ahte dát organisašuvnnat besset joatkit iežaset dehálaš servodatberošteaddji doaimmaid, ja tihppenruđaide sihkkarastit guhkesáigásaš juogadanmálle.

18 proseantta Norsk Tipping badjebáhcagis, badjel 600 miljovnna kruvnnu, juogaduvvo servodatberošteaddji ja humanitára organisašuvnnaide. Dál juogaduvvojit ruđat dan ektui maid organisašuvnnat dinejedje spealloautomáhtaiguin (2001:s), ovdal go dat šadde lobiheamit.

- Guhkit áiggi vuollái ii leat dohkálaš juogadit ruđaid dušše daid organisašuvnnaide mat badjel logi jagi dás ovdal dinejedje spealloautomáhtaiguin. Ráđđehus lea dál mearridan eavttuid mat leat vuohkkaseappot ja rievttálaččat, ja mat doibmet guhkit áiggi, cealká kulturministtar Hadia Tajik. 

Ođđa eavttut leat mearriduvvon departemeantta gulaskuddanárvalusa vuođul. Eavttut leat čadnon organisašuvnnaid doaibmasuorgái. Doaibmasuorgái gullet sosiála bálvalusat jna., eará dearvvašvuođabálvalusat, luondu, birasgáhtten, elliidsuodjalus ja iešguđetlágan berošteaddjiorganisašuvnnat. Ruhtadoarjaga sáhttet oažžut riikaviidosaš organisašuvnnat mat deattuhit eaktodáhtolaš doaimmaid.  Organisašuvnnat galget leat registrerejuvvon Vuorberegistaris  ja Eaktodáhtolašregistaris.  Organisašuvnnat mat doibmet dušše riikkaidgaskasaččat, mánáid- ja nuoraidorganisašuvnnat ja politihkalaš bellodagat eai gula dán ođđa ortnegii. Mánáid- ja nuoraidorganisašuvnnat ožžot lihkká doarjaga iežaset váldoorganisašuvnnaid bokte dahje eará doarjjaortnegiid bokte, ovdamearkka dihte álbmotoasseruđa, momsabuhtadusortnega ja Frifond bokte. 

Ráđđehus lea maid mearridan gaskaboddosaš ortnega áigodahkii 2014 – 2017. Dat sihkkarastá ahte organisašuvnnat mat boahtteáiggis eai leat šat mielde dán ortnegis ožžot áiggi gávdnat eará čovdosiid. Seammás ožžot dat organisašuvnnat maid ođđa ortnet fátmmasta áiggi searvat dán ortnegii. Dasa lassin lea ráđđehus mearridan ahte golbma gearggusvuođaorganisašuvnna  (Gádjunvuođđudus, Rukses Ruossa ja Norgga Álbmotveahkki) galget oažžut dihto meari tihppenruđain  joatkit dehálaš servodatdoaimmaid. Dat addá dáid organisašuvnnaide einnostahtti rámmaeavttuid. Kulturdepartemeanta mearrida čakčat movt báhccán ruđaid juogadit.

Ráđđehusa mearridan eavttut ja gaskaboddosašortnet čađahuvvo láhkaásahusa bokte dán jagi mielde.