Johtučálus Sámediggeválggaid láhkaásahusa rievdadusaid birra – diehtu jienasteddjiide geat besset duššefal ovddalgihtii jienastit Sámediggeválggas

• Julevsáme jårggålibme (PDF)
• Åarjelsaemien jarkoestimmie (PDF)

Láhkaásahusa § 39 a nuppi lađđasis lea lasihuvvon mearrádus ahte sámeválgastivrrat galget dain gielddain gos jienastuslohku lea unnit go 30, ovdal go ovddalgihtiijietnaaddin álggahuvvo, dieđihit jienasteddjiide ahte sii besset duššefal ovddalgihtii jienastit sámediggeválggas. Dieđiheapmi galgá leat čálalaš ja čállosis galget dušše dieđut láhkavuođu birra das ahte jienasteaddji duššefal beassá ovddalgihtii jienastit, makkár gieldda jienastuslohkui jienasteaddji lea čálihuvvon, ovddalgihtiijietnaaddináigodat, makkár báikkiin gielddas vuostáiváldet ovddalgihtiijienaid, vejolašvuođa birra  ovddalgihtii jienastit eará gielddain ja movt beassat jienastit olgoriikkas, Svalbárddas ja Jan Mayenis.

Juovlamánu 19.b. 2008 nr 1480 Sámediggeválgga láhkaásahusa gávnnat dáppe: www.lovdata.no. Johtučálus sihke dárogillii ja sámegillii gávdno Ođasmahttin-, hálddahus- ja girkodepartemeantta neahttasiidduin www.regjeringen.no/fad ja Sámedikki neahttasiidduin www.samediggi.no.

Duogáš
Sámelága § 2-3 goalmmát lađđasa mielde besset jienasteaddjit guđet leat čálihuvvon Sámedikki jienastuslohkui dakkár gielddain main leat unnit go golbmalogis čálihuvvon jienastuslohkui, duššefal jienastit ovddalgihtii sámediggeválggas. Mearridan dihtii guđemuš gielddaide dat guoská, galgá Sámedikki jienastuslohku geassemánu 30.b. dan jagi go maŋemuš lágiduvvui gielddastivrra- ja fylkkadiggeválga adnojuvvot vuođđun, gč. juovlamánu 19.b. 2008 nr. 1480 Sámediggeválgga láhkaásahusa § 39 a vuosttas lađđasa.

Sámi válgadutkanprográmma (2008-2011) lea jagi 2009 sámediggeválgga oktavuođas almmustahttán ahte válgaoassálastin mealgadii njiejai dain válgabiirriin gos eanasoasi gielddain besse dušše ovddalgihtii jienastit.  Loahppaárvvoštallan lea ahte sivva válgaoassálastima njiedjamii soaitá leat ahte jienasteaddjit beare maŋŋit fuobmájit ahte sii dušše besset ovddalgihtii jienastit. Láhkaásahusa § 39 a nuppi lađđasa ulbmil lea ahte lasihit válgaoassálastima dakkár gielddain gos jienasteaddjit  duššefal besset ovddalgihtii jienastit.

Gulaskuddamis bođii ovdan ahte guoskevaš gielddaide šaddet unnán ekonomalaš ja hálddahuslaš váikkuhusat.

Juovlamánu 19.b. 2008 nr 1480 Sámediggeválgga láhkaásahusa rievdadusat
§ 39 a ođđa nubbi lađas čuodjá ná:

(2) Dakkár gielddain main leat unnit go golbmalogis jienastuslogus, gč. vuosttas lađđasa nuppi čuoggá, galgá sámeválgastivra ovdal go ovddalgihtiijietnaaddin álggahuvvo dieđihit jienasteddjiide ahte sii duššefal besset jienastit sámediggeválggas ovddalgihtiijietnaaddináigodagas. Dieđiheapmi galgá leat čálalaš, ja galgá dušše sisttisdoallat dieđuid

a)     láhkavuođu birra das ahte jienasteaddji dušše beassá ovddalgihtii jienastit,

b)     makkár gieldda jienastuslohkui jienasteaddji lea čálihuvvon,

c)     ovddalgihtiijietnaaddináigodat,

d)     makkár báikkiin gielddas vuostáiváldet ovddalgihtiijienaid,

e)     vejolašvuođa birra ovddalgihtii jienastit eará gielddain, ja

f)       movt beassat jienastit olgoriikkas, Svalbárddas ja Jan Mayenis.

 

Dearvuođat                                                                           

Kristin Ryan	Eirik Larsen
ossodatdirektevra	ráđđeaddi