1 Láhkaproposišuvnna váldosisdoallu

Guovlo- ja gieldadepartemeanta ovddida dán proposišuvnnas Finnmárkkulága rievdadusevttohusa. Finnmárkkuláhka gusto Finnmárkku eatnamiid ja luondduvalljodagaid hálddašeapmái ja sisttisdoallá sierra ortnega mii lea earálágan go hálddašeapmi eará fylkkain riikkas.

Stuoradikki mearrádusa olis geassemánu 14. b. 2022 (Prop. 113 LS (2021–2022) S-oassi, Evtt. 452 S (2021–2022)) galgá Romssa ja Finnmárkku fylka juhkkojuvvot ođđajagemánu 1. beaivvi 2024 rájes. Finnmárku šaddá fas sierra fylkan.

Romssa ja Finnmárkku fylkkaid ovttastahttima oktavuođas mearridii Stuoradiggi lága juovlamánu 20. b. 2019 nr. 108 finnmárkkulága rievdadusaid birra (rievdadusat dan geažil go Romssa ja Finnmárkku fylkkat ovttastahttojuvvojit). Dás ledje mearrádusat lága geográfalaš doaibmaviidodaga birra, stivralahtuid válljema birra Finnmárkkuopmodahkii ja badjebáhcaga juohkima birra. Dát rievdadusat ledje dárbbašlaččat danne go lágas rievddai «Finnmárkku» namahusa sisdoallu.

Go Finnmárku dál fas šaddá sierra fylkan, de ferte láhka fas rievdaduvvot.

Go departemeanta árvvoštallá Finnmárkkulága rievdadit, de lea departemeanttas geatnegasvuohta konsulteret Sámedikki dan oktavuođas. Sámediggi ii leat háliidan konsulteremiid dáid rievdadusaid hárrái, muhto čujuha daid oaiviliidda mat sis ledje Finnmárkkulága rievdadeami konsulteremiin dalle go fylkkat ovttastahttojuvvojedje (Prop. 134 L (2018–2019)).

Sámediggi háliida ieš stivret man vuogi mielde stivra- ja várrelahtut Finnmárkkuopmodahkii galget válljejuvvot. Danne dáhttu Sámediggi Finnmárkkulága § 7 ja § 8 rievdaduvvot. Sámediggi oaivvilda ahte dát čoavddus doahttalivččii sámiid iešmearrideami ja Sámedikki iešheanalaš sajádaga. Sámediggi bivdá departemeantta árvvoštallat čađahit sierra proseassa dáid osiid rievdadeami hárrái Finnmárkkulágas. Sámediggi atná deaŧalažžan ahte departemeanta boahttevuođas čuovvola dán áššečuolmma.

Romssa ja Finnmárkku fylkkagielda lea ožžon vejolašvuođa ovddidit oaiviliid evttohussii. Sii eai atnán dan dárbbašlažžan.