Kyrkjeminister Valgerd Svarstad Haugland deler tysdag kl. 11.00 ut Olav- og Sunnivastipend for 2005 under ei markering i Kultur- og kyrkjedepartementet på statsrådens møterom.

- Det er ein merkedag for samisk og norsk kyrkjeliv når eg har gleda av å gje Olavstipendet 2005 til Tore Johnsen, sokneprest i Tana og Nesseby, seier kultur- og kyrkjeminister Valgerd Svarstad Haugland.

Olavstipendet er i år utlyst som ein idékonkurranse om å laga ein moderne katekisme til bruk i trusopplæringa i Den norske kyrkja. Johnsen får stipendet for å skrive ein samisk katekisme. Stipendet inneber eit års stipendiatstilling med løn, samt dekking av utgifter på inntil 100 000 kroner.

- Utkastet er eit originalt, moderne teologisk arbeid, som byggjer på samisk historie og kultur. Det er ei glede for meg både som kyrkje- og kulturminister å dela ut eit stipend som stimulerer til refleksjon over samisk kultur, arv og kristentru i dag, seier Svarstad Haugland. Kyrkjestatsråden understrekar at det er viktig at trusopplæringa speglar ulike livssamanhengar.

Sunnivastipend

Statsråd Svarstad Haugland deler ut Sunnivastipend på 25 000 kroner til Brit Lundby Hilde, Bjørgvin bispedømme, Tellef Raustøl, Oslo bispedømme og Nina Lind, Borg bispedømme.

Lundby Hilde skal utarbeida materiale for pilegrimar som ønskjer å gå i St. Sunniva sine fotspor på Selja. – Pilgrimsrørsla er styrka i Noreg dei siste åra, og det er viktig at tradisjonane rundt St. Sunniva vert utvikla vidare, seier statsråden.

Raustøl får støtte til sitt prosjekt med utvikling av samarbeidet mellom kyrkja og bydelane i Oslo. Lind skal finne arbeidsformer som gjer bruk av frivillige medarbeidarar i den lokale kyrkjelyden i Årnes.

– Det er også fint å dela ut stipend til prosjekt som følgjer opp Kyrkemøtet si satsing på kyrkjeleg samarbeid med frivillige og offentlege instansar, seier kyrkjeminister Svarstad Haugland.

Statsrådens taler ved utdelingen