Kyrkje-, utdannings- og forskingsdepartementet har no bestemt at vaksne med rett til vidaregåande opplæring skal få fullføre utdanninga på grunnlag av realkompetanse, dvs. summen av formell og uformell kompetanse. Opplæringa skal vere smidig når det gjeld tid, stad, lengde og progresjon, og skal såleis kunne tilpassast vaksne som t. d ønskjer å kombinere opplæringa med jobb og familieliv. Endringane i forskrifta til Opplæringslova tar til å gjelde 1. februar i år.

Ednringane i Opplæringslova blei vedtatt i fjor sommar og slår fast at vaksne fødd før 1978 skal ha rett til vidaregåande opplæring. I endringar til forskrifta for Opplæringslova som KUF no har vedtatt vil fylkeskommunen få ei plikt til å sørgje for at vaksne søkjarar med rett til vidaregåande opplæring får kartlagt og vurdert sin realkompetanse og får eit tilbod om opplæring i samsvar med den sluttkompetansen dei ønskjer. I vurderinga skal det leggjast avgjerande vekt på kva mogelegheiter den einskilde har for å oppnå yrkes- eller studiekompetanse.

Vaksne som tar vidaregåande opplæring skal ha rett til standpunktkarakterar i modular eller fag som dei følgjer og har avslutta opplæringa i. Dersom vaksne ønskjer det kan fylkeskommunen tilby opplæring som blir avslutta med eksamen som privatist.

Fylkeskommunen har ansvaret for at vurderinga av realkompetansen blir gjort på forsvarleg grunnlag. Vaksne som får godkjent realkompetanse i eitt eller fleire fag, treng ikkje opplæring i faget. Fylkeskommunen kan nytte studieforbund, fjernundervisningsinstitusjonar og andre for å oppfylle plikta til å gi opplæring for vaksne.

Vaksne sin rett til vidaregåande opplæring er ein del av Kompetansereforma.

Endringar i forskrifta til opplæringslova

Brosjyra "Voksne har rett til videregående opplæring"