Pressemelding

Nr.: 05106
Dato: 25.10.05

Ski blei Årets barne- og ungdomskommune 2005

Likestillings‑ og forbrukarminister Karita Bekkemellem kåra tysdag 25. oktober Ski til Årets barne‑ og ungdomskommune. Kommunen fekk utmerkinga for sitt breie tilbod til born og ungdom og det gode samarbeidet som er etablert mellom frivillige organisasjonar, foreldre og kommunen om eit trygt og godt oppvekstmiljø. Kommunen har eit godt organisert førebyggjande arbeid, samtidig som ein satsar på born og ungdom som ressursar.

Prisen blir delt ut for tredje gong i år. 25 kommunar er blitt nominerte eller har søkt om å få utmerkinga. Ein eigen jury sett ned av Barne‑ og familiedepartementet har stått for utveljinga av ein kommune.

I grunngivinga trekkjer juryen fram den innsatsen Ski kommune har gjort for å få born og ungdom til å delta i lokalpolitikken. Kommunen har både ungdomsråd og kommunestyre for born og unge. I tillegg skal det opprettast eit kommunalt elevråd.

Juryen har også lagt vekt på det arbeidet kommunen gjer når det gjeld å integrere born og ungdom med innvandrarbakgrunn. For å gi born med minoritetsbakgrunn ein god start i livet har kommunen innført eit lågterskeltilbod retta mot mødrer med minoritetsbakgrunn. Kommunen har også eigen helsestasjon og grunnskule for ungdom med flyktning‑ og innvandrarbakgrunn.

Det arbeidet kommunen gjer med inkluderande foreiningsliv, kan vere eit føredøme for andre. Det skjer eit utstrekt samarbeid med frivillige lag og organisasjonar gjennom frivilligsentralen, kultur og idrett, næringslivet og det kriminalitetsførebyggjande arbeidet (SLT).

Kåringa av Årets barne‑ og ungdomskommune er eit ledd i oppfølginga av Stortingsmelding nr. 39 (2001‑2002) Oppvekst‑ og levekår for barn og ungdom i Norge.

Juryens begrunnelse