Bu betre og lenger i universelt utforma bustader

Artikkelen sto i bilaget Universell utforming som blei utgitt 04.06.2009 av Barne- og likestillingsdepartementet, Kommunal- og regionaldepartementet, Miljøverndepartementet og Samferdselsdepartementet.

• Universell utforming 04.06.2009 (pdf). 

Forbetringar kostar gjerne pengar, men det vil kunne liggje god økonomi i at bygg og bustad blir bygd med god tilgjengelegheit og universell utforming. Jo betre og meir funksjonell kvalitet, jo høgare verdi får bustaden både i marknaden og i bruk, seier statsråd Magnhild Meltveit Kleppa.

- Informasjonskampanjen ”Din feil” er eit ledd i Regjeringa sitt informasjonsprogram for universell utforming i byggsektoren. Kva er målet med kampanjen?
- For Regjeringa er det eit satsingsområde å sikre økt tilgjengelegheit for alle gjennom universell utforming. I dag er det krav om tilgjengelegheit i publikumsbygg og arbeidsbygg. Undersøkingar syner samstundes at berre eit lite mindretal av bustadane våre er universelt utforma. Trinn, tersklar og smale dører er nokre eksempel på hindringar ein kan møte. Regjeringa ynskjer difor både å informere om universell utforming og å utfordre folk til å tenkje på brukbarheit, tilgjengelegheit og universell utforming når dei kjøper eller bygger om ein bustad. Målet med kampanjen er å auke folk sitt medvit om universell utforming av bustader.

- Blir ikkje desse krava til bustadkvalitet tekne vare på gjennom lover og forskrifter?
- Universell utforming er sentralt i departementet sitt arbeid med oppfølging av ny plan- og bygningslov. Eg kan nemna at det blir arbeide med forskrifter om skjerpa krav til tilgjenge og universell utforming. Krav til universell utforming gjeld både publikumsbygg og arbeidsbygg. Vidare vurderer vi å skjerpa krava til heis og tilgjengelegheit i bustader. Krava skal og ta vare på branntryggleik og trygge løysingar ved rømming av bygg. Men vi treng fleire verkemiddel enn lov og forskrift for å betre kvaliteten på bustadane våre. Informasjon som ”Din feil”-kampanjen er difor viktig. Regjeringa ynskjer eit samfunn der alle er inkluderte og har like moglegheiter. Vi treng bustader, bygningar og uteområde som er utforma soleis at dei kan brukast av alle.

- Vil ikkje desse kvalitetane føre til ekstra kostnader?
- Tek ein omsyn til UU ved prosjektering og bygging av nye bygg, er meirkostnaden liten. La meg seie det slik: Forbetringar kostar gjerne pengar, men det vil kunne liggje god økonomi i at bygg og bustad blir bygd med god tilgjengelegheit og universell utforming. Jo betre og meir funksjonell kvalitet, jo høgare verdi får bustaden både i marknaden og i bruk! Tilgjengelege bustader betyr og at fleire kan bli buande lenger i eigen bustad. For dei fleste vil eit heimeliv i eigen bustad gi betre livskvalitet og blir verdsett høgare enn å bu i institusjon. Eg vil nemne at Husbanken har låne- og tilskotsordningar som stimulerer til universell utforming og tiltak for tilgjengelegheit.

”Ei svale gjer ingen sommar”?
- Nei, her har vi eit langt lerret å bleike. Regjeringa har eit langsiktig perspektiv på dette arbeidet. Dette vil vere den andre store forbrukarkampanjen om universell utforming, og vi legg vi opp til ei vidareføring av informasjons- og opplæringstiltaka. I tillegg har informasjonsprogrammet dei siste åra gjennomført ei rekke tiltak for å styrke kjennskap, kunnskap og kompetanse om universell utforming i byggebransjen og i kommunane.

- Kva verkemiddel tek kampanjen i bruk?
- Kampanjen er i stor grad nettbasert – www.dinfeil.no -, men og trykte media takast i bruk. På nettstaden kan ein få teste kor funksjonell eigen bustad er og sjå kva endringar som skal til for å skape ein betre bustad. Nettstaden gir deg gode råd og anbefalingar om du tenkjer på å pusse opp, eller om du skal kjøpe ein ny eller brukt bustad.