Lågare lufthamnavgifter i 2012

- Det samla avgiftsnivået ved lufthamnene til Avinor blir lågare i 2012. Samanlikna med forventa prisstigning blir lufthamnavgiftene redusert med 1,3 prosent. Dette er med på å dempa prisane for flyreiser. Dette seier samferdselsminister Magnhild Meltveit Kleppa i samband med at Samferdselsdepartementet i dag har vedteke nye avgiftsreglar for Avinor i 2012.

Vedtaket som er gjort i dag gjeld avgifter for lufthamntenester. Avgiftene for flysikring (luftromstenester) blir fastsett gjennom ei eiga forskrift.

Tryggleiksavgifta får ein reduksjon på heile 6,9 prosent. Avgifta dekkjer kostnadene ved tryggleikskontrollen (security).

Fleire høyringsinstansar har reagert på forslaget om å auka start- og passasjeravgiftene med 6,4 prosent. Det blei mellom anna vist til at trafikkauken, og dermed inntektene til Avinor ,  ser ut til å bli høgare enn tidlegare rekna med. Samferdselsdepartementet har valt å koma selskapa i møte på dette:

Startavgifta og passasjeravgifta for utanlandspassasjerar blir difor auka i tråd med forventa prisstiging, det vil seia om lag 1,5 prosent, og blir dermed høvesvis  70 kroner og  60 kroner. 

Passasjeravgifta for innanlandspassasjerar blir auka med 4,5 prosent,  til 46 kroner, for å redusera gapet mellom avgiftene for innanlands- og utanlandsreiser.

Alt i alt blir passasjer- og startavgiftene auka med 2,5 prosent. Samanstilt med reduksjonen i tryggleiksavgifta blir avgiftene auka med 0,2 prosent.

Dei nye avgiftsreglene tek til å gjelda 1. januar 2012.

For fleire opplysningar – sjå:
•  Brev av 4. november 2011 frå Samferdselsdepartementet til Avinor AS (pdf)
• Forskrift om avgifter på lufthamnene til Avinor i 2012, fastsett 3. november 2011 av Samferdselsdepartementet (pdf)
• Høyring om forslag til lufthamnavgifter for Avinor i 2012.