Del 4
Fisket etter avtalane i 2011 og 2012

5 Fisket etter avtalane i 2011 og 2012

5.1 Den felles forvaltninga

I omtalen av fisket etter avtalane for 2011 og 2012 er hovudvekta lagt på i kva grad Noreg og dei partane som får tildelt kvotar i norske område, faktisk utnyttar desse kvotane. Først presenterer vi dei norske kvotane i sonene til andre statar og utnyttinga av desse, jf. pkt. 5.2 nedanfor. Deretter, i punkt 5.3, presenterer vi kvotane andre statar har i norske område og utnyttinga av desse. Kommentarane til kvoteutnyttinga omfattar berre åra 2011 og 2012.

I dei neste avsnitta vert omgrepet «felles forvaltning» nytta om ein del sentrale fiskebestandar. Felles forvaltning tyder at to eller fleire land/samanslutningar av land har avtala å forvalte ein bestand saman, fordi bestanden finst i sonene til fleire land. Dette inneber at det i dei årlege kvoteforhandlingane vert avtalt ein totalkvote for bestanden, som vert fordelt på dei aktuelle avtalepartane.

5.2 Norsk utnytting av kvotar

I avsnitt 5.2 og 5.3 er kvotane henta frå dei årlege kvoteavtalane, med eventuelle oppdateringar. Fangsttala er baserte på landings- og sluttsetelregisteret i Fiskeridirektoratet eller på dei fartøya som har rapportert fiska frå dei ulike jurisdiksjonsområda. Dette er anten til Fiskeridirektoratet eller til ansvarlege i tredjeland, det vil seie styresmaktene i kyststaten. Rapporterte fangsttal frå fiskefelta kan avvike frå tala i landings- og sluttsetelstatistikken som viser utlossa kvanta. Symbolet (–) i tabellane tyder anten ingen fangst eller ingen kvote.

Noreg – Russland

Fellesbestandane

Noreg og Russland har felles forvaltning av artane torsk, hyse, blåkveite og lodde. Noreg sine kvotar (etter overføringar til tredjeland) og fangstar av desse bestandane går fram av tabell 5.1. Delar av dei norske kvotane for desse bestandane kan fiskast i russisk økonomisk sone, sjå tabell 5.2.

Kommentarar til oversikta

Kvotetala inneheld kvotar avsett til forsking. For åra 2011 og 2012 vart det avsett 7 000 tonn torsk til forskings- og forvaltningsformål. Avtalen for 2011 og 2012 opna vidare for å avsetje 4000 tonn hyse til forskings- og forvaltningsformål. Noreg avsette 2000 tonn hyse og 2000 tonn gjekk såleis inn i disponibel kvote for norske fartøy. I 2011 og 2012 vart det overført 48 000 tonn og 30 000 tonn lodde frå Russland til Noreg i byte mot 15 000 tonn og 10 000 tonn norsk vårgytande sild.

Som fylgje av at Noreg ikkje inngjekk bilateral avtale med Færøyane i 2011 og 2012, og sidan EU ikkje har noko interessant å bytte mot torsk og hyse frå Barentshavet, vart det i både 2011 og 2012 tilbakeført torsk og hyse frå kvota avsett til tredjeland i norsk-russisk fiskerikommisjon til nasjonal kvote. Det vart tilbakeført 18 016 tonn og 17 399 tonn torsk i høvesvis 2011 og 2012, og 6720 tonn og 5200 tonnhyse i 2011 0g 2012til nasjonal kvote. Torskekvoten nord om 62°N vart ikkje oppfiska i 2012. Den uregistrerte delen av rekreasjonsfisket er lagt til tala og ein legg vidare til grunn at heile avsetninga på 7000 tonn vert teken og dermed enda utnyttingsgraden på 100,4 og 99,3 prosent.

Utnyttingsgraden for hyse var på om lag 101,8 prosent i 2011, medan den i 2012 var på 100,4 prosent. Kvoten vart altså noko overfiska i 2011. Bakgrunnen var at hysa var lettare tilgjengeleg enn venta sommaren 2011 for havfiskeflåten, og overfisket skuldast uunngåeleg bifangst i andre fiskerier etter at direktefisket etter hyse vart stoppa hausten 2011. Loddekvoten vart godt nytta i 2011 og 2012.

Den blanda norsk-russiske fiskerikommisjonen vart i 2009 einige om ein totalkvote på 15 000 tonn blåkveite i tre år framover og ein fordelingsnøkkel som gav Noreg ein kvote på 7650 tonn blåkveite. I 2011 vart partane einige om ein totalkvote på 18 000 tonn for 2012, der Noreg fekk ein kvote på 9165 tonn. Av dette skulle 750 tonn brukast til forsking. Denne kvoten vart overfiska med 9,1 og 0,5 prosent i 2011 og 2012.

Generelt har trålarane og andre havfiskefartøy fastsette kvotar praktisk talt utan overregulering, og dei held seg stort sett innanfor desse kvotane. Kystfiskeflåten består av mange fartøy som stadig vert meir effektive. Varierande grad av deltaking i fisket i kystflåten gjer det nødvendig å regulere fisket med såkalla overregulering. Overregulering er differansen mellom summen av maksimal-/fartøykvotane og gruppekvoten. Overreguleringa vert uttrykt i prosent av gruppekvoten, differansen vert omtalt som overregulering. Dersom summen av maksimal-/fartøykvotane er 13 000 tonn og gruppekvoten er 10 000 tonn, er overreguleringa 30 prosent. Tilgangen på fisk kan variere frå år til år, mellom anna på grunn av vêrforhold langs kysten. Dersom fiskeristyresmaktene bommar med graden av overregulering for kystfiskeflåten og ikkje greier å korrigere dette i tide, kan det føre til at dei fastsette kvotane vert overfiska. Ulike forhold kan òg føre til at kvotane ikkje vert fiska eller utnytta fullt ut.

Kommentarar til oversikta

Norske kvotar og fangstar i russisk økonomisk sone (RØS) går fram av tabell 5.2. Med unntak av lodde i 2011 og reker i 2012 nytta Noreg lite av sonetilgangen i RØS i 2011 og 2012. Noreg kunne fiske heile loddekvoten i RØS.

Noreg – EU

Fellesbestandane

Noreg og EU har felles forvaltning av artane torsk, hyse, sei, kviting, raudspette og sild i Nordsjøen, sjå tabell 5.3. Delar av dei norske kvotane for konsumfiskbestandane kan fiskast i EU si sone av Nordsjøen, sjå tabell 5.4. Makrell er forvalta i eigen avtale mellom partane.

Kommentarar til oversikta

Norsk kvote og fangst inneheld kvantum relatert til forsking. Fangsttala inneheld ikkje norsk bifangst frå industritrålfisket. Bifangstane varierer frå år til år i storleik og art.

Norske kvotar i EU sitt farvatn og tildelte kvotar frå EU i grønlandske farvatn (EUGRL), med tilhøyrande fangstar

Noreg fekk i 2011 og 2012 tildelt kvotar av blåkveite og kveite for fiske i grønlandsk sone både av EU og Grønland.

For desse artane er det i denne meldinga berekna at kvoten frå Grønland vert utnytta først (sjå tabell 5.7). Eventuelle fangstar ut over Grønlandskvotane vert avrekna mot Noreg sine kvotar tildelte av EU (sjå tabell 5.4).

Kommentarar til oversikta

Noreg sine kvotar i EU-farvatn og tildelte kvotar frå EU i grønlandske farvatn, med tilhøyrande fangstar, går fram av tabell 5.4. Sidan 2009 har Noreg fiska tobis i EU-sona i byte mot torskekvote i Barentshavet.

I 2011 og 2012 kunne Noreg fiske 68 % av totalkvoten på kolmule ut frå kyststatsavtalen i EU-sona, samt eit kvantum framforhandla i den bilaterale avtalen mellom Noreg og EU.

Frå og med 2011 fekk Noreg høve til å fiske heile sin makrellkvote i EU-sona.

Blålange, lange, brosme, pigghå, brugde og håbrann kunne fiskas i Nordsjøen og vest av 4°V. Kombinertkvoten gjaldt linefiske etter havmus, mora, skjelbrosme, isgalt og skolest.

Kvoten «andre artar» i område IV og IIa omfattar fiske på artar det ikkje er fastsett kvotar for til Noreg i EU-sona.

Når det gjeld dei tildelte kvotane i grønlandske farvatn, vert desse slått saman med kvotane som Noreg får tildelt av Grønland. I denne meldinga vert den norske fangsten kvoteavrekna kvoten tildelt frå EU sist.

Inntil 2005 har eit element i den årlige kvoteavtalen mellom Noreg og EU vore ei overføring av lodde i den grønlandske fiskerisona til Noreg. Kvoten måtte fiskast innan kalenderåret, og vart i 2004 fastsett til 15 000 tonn. Dette loddekvantumet har referanse til Grønland sin del i trepartsavtalen for lodde ved Island, Grønland og Jan Mayen. På grunn av den spesielle biologiske situasjonen i 2004 var det vanskeleg å berekne bestanden og TAC vart sett til 335 000 tonn lodde. Dermed vart det ikkje samsvar mellom loddekvoten til Grønland på 36 850 tonn og kvantum overført til EU. EU hadde dermed ikkje stor nok loddekvote for å oppfylle si plikt overfor Noreg. Dette førte til at Noreg og EU vart einig om ei løysing der overføringa av lodde i den grønlandske fiskerisona vart redusert til 7 035 tonn i 2004. Noreg har sidan då hatt 7 965 tonn lodde til gode. I 2011 vart det igjen opna for eit sommarloddefiske, og Noreg fekk då overført 7965 tonn lodde frå EU.

Noreg – EU (Sverige – Danmark), om fisket i Skagerrak/Kattegat

Torsk, raudspette og reker kan fiskast i Skagerrak. Dei andre artane i Skagerrakavtalen kan fiskast både i Skagerrak og Kattegat.

Kommentarar til oversikta

Norske kvotar og fangstar i Skagerrak/Kattegat går fram av tabell 5.5. Dei viktigaste fiskeria for Noreg i Skagerrak er fisket etter reker. Fangstane av torsk i tabellen omfattar berre fisket utanfor grunnlinja.

Desse kvotane vart fastsette i den bilaterale kvoteavtalen mellom Noreg og EU. I 2011 og 2012 var det høve for norske fartøy til å fiske inntil 3000 tonn makrell i Skagerrak.

Noreg – Færøyane

Kommentarar til oversikta

Norske kvotar og fangstar i færøysk sone går fram av tabell 5.6.

Grunna usemje i makrellforvaltninga vart det ikkje inngått ein bilaterale avtale mellom Noreg og Færøyane i 2011 og 2012. Det vart inngått kyststatsavtale om forvaltning av kolmule. Noreg fikk høve til å fiske 1672 tonn kolmule i 2011 og 16 302 tonn kolmule i færøysk sone i 2012.

Norske fartøy fiska ikkje kolmule i færøysk sone i 2011 og 2012.

Noreg – Grønland

Kommentarar til oversikta

Noreg sine kvotar og fangstar i grønlandsk sone i 2011 og 2012 går fram av tabell 5.7. I tillegg kan norske fartøy fiske i grønlandsk sone på kvote tildelt av EU (sjå tabell 5.4).

Det deltok tre trålarar og eitt linefartøy i fisket etter blåkveite på Vest-Grønland både i 2011 og 2012. I fisket etter blåkveite ved Aust-Grønland deltok to linefartøy og tre trålarar i 2011, medan to linefartøy og to trålarar deltok i 2012.

Noreg fekk rekekvote frå EU i 2011 og 2012, men kvoteutnyttingsgraden vart svært liten (sjå tabell 5.4). I 2012 fekk Noreg også uer- og torskekvote.

Kvoten på uer er delt i botnlevande og pelagisk uer. Den pelagiske uerkvoten frå Grønland og EU kan fiskast i internasjonalt farvatn. Denne kvoten vart godt utnytta (sjå tabell 5.16).

I fisket etter kveite ved Aust-Grønland er det berre høve til å fiske med line. To fartøy deltok i både 2011 og 2012.

Før 2003 har det ikkje vore mogleg å utnytte torskekvoten som følgje av den dårlege bestandssituasjonen for torsk ved Grønland, men dei to siste åra vart torskekvoten godt utnytta.

Noreg – Island, om fisket etter botnfisk og lodde i islandsk sone

Kommentarar til oversikta

Noreg sine kvotar og fangstar i islandsk sone går fram av tabell 5.8. I tillegg til kvoten på 500 tonn botnfisk hadde norske fartøy òg høve til å ha inntil 25 prosent bifangst av andre artar. Noreg utnytta botnfiskkvotane ved Island godt i både 2011 og 2012.

Forvaltninga av norsk vårgytande sild

Noreg sine kvotar og fangstar av norsk vårgytande sild går fram av tabell 5.9 og 5.10.

Kommentarar til oversikta (tabellane 5.9, 5.10, 5.11 og 5.12)

November 2008 vart kyststatane EU, Færøyane, Island, Noreg og Russland einige om å innføre kvotefleksibilitet over årsskiftet for 2008. Det vart høve til å føre over inntil 10 prosent av ubrukt kvote til neste år. Det vart òg høve til å forskottere inntil 10 prosent på neste års kvote. Alt fiske utover kvote skulle trekkjast frå kvoten neste år. Denne ordninga har seinare vorte ført vidare.

Færøyane fiska i 2011 og 2012 eit vesentleg høgre kvantum i si eiga sone enn tidligare år. I 2012 fiska dei kun 3368 tonn i NØS.

Den same trenden ser man hos islendingane. I 2012 fiska islandske farty inga sild i norske farvatn.

Noreg fiska i 2011 heile 25 624 tonn meir enn den norske kvoten på 546 614 tonn (etter overføring og fleksibilitet). Dette kvantumet vart trekt frå norsk kvote for 2012. Både i 2011 og 2012 vart kvoten fiska i NØS, i internasjonalt farvatn og ved Jan Mayen. I 2012 vart det òg fiska 655 tonn sild til agn i færøysk sone. I 2011 fiska Noreg heile 47 314 tonn sild i internasjonalt farvatn, mot 4 315 tonn i 2012.

I 2011 og 2012 fiska russarane eit betydeleg kvantum norsk vårgytande sild i internasjonalt farvatn og i vernesona rundt Svalbard. Det russiske hovudfisket føregjekk i vernesona rundt Svalbard i 2012.

EU, Island og Russland har overført unytta kvote til 2012 og 2013, medan Færøyane og Noreg begge åra fiska på forskot.

Forvaltninga av lodde ved Island, Grønland og Jan Mayen

I følgje den gjeldande trepartsavtalen for lodde ved Island, Grønland og Jan Mayen varer sesongen for loddefisket frå 20. juni til 30. april. Det er likevel ikkje tillete for norske fartøy å drive fiske etter 15. februar i islandsk sone.

Kommentarar til oversikta

Noreg sine kvotar og fangstar på lodde i sesongane 2011/2012 og 2012/2013 går fram av tabell 5.13.

For sesongen 2011/2012 vart førebels TAC fastsett til 732 000 tonn i juli 2011. Norsk kvote var samansett av 58 560 tonn frå trepartsavtalen, der 20 496 tonn kunne fiskast i IØS og 24 411 tonn frå avtalen mellom Noreg og Island om fisket i Barentshavet. I tillegg fikk Noreg eit kompensasjonstillegg på 11 700 tonn frå førre sesong, der 4095 tonn kunne fiskast i IØS. Noreg hadde og eit kvantum på 7965 tonn lodde til gode frå EU frå loddesesongen i 2004 som utelukkande kunne fiskast i Grønlands fiskerisone og fiskerisona ved Jan Mayen. Til saman kunne Noreg fiske 102 636 tonn lodde, der 49 002 kunne fiskast i IØS.

Loddefisket ved Grønland og Jan Mayen starta 8. juli medan loddefisket ved Island opna 1. oktober. 26. januar 2012 vart TAC auka frå 732 000 tonn til 765 000 tonn lodde. Norsk kvote auka då med totalt med 2640 tonn der 924 tonn kunne fiskast i IØS.

43 fartøy deltok i fisket i Grønland si sone sommaren 2011, medan 61 fartøy deltok i fisket i IØS i januar og februar 2012. Det vart fiska totalt 104 664 tonn lodde sesongen 2011/2012.

For sesongen 2012/2013 vart førebels TAC fastsett til 300 000 tonn 2. november 2012. Norsk kvote var samansett av 24 000 tonn frå trepartsavtalen, der 8400 tonn kunne fiskast i IØS, og 26 111 tonn frå avtalen mellom Noreg og Island om fisket i Barentshavet.

8. februar 2013 vart TAC auka frå 300 000 tonn til 450 000 tonn. Den norske totalkvoten vart då auka med 12 000 tonn der 4200 tonn kunne fiskast i IØS. 11. februar 2013 vart TAC auka ytterligare, frå 450 000 tonn til 570 000 tonn. Den norske totalkvoten vart då auka med 9600 tonn der 3360 tonn kunne fiskast i IØS.

Til saman vart det fiska 40 603 tonn av totalt 76 ringnotfartøy. Norsk kvote vart sesongen 2012/2013 totalt 71 711 tonn lodde, der 42 071 tonn kunne fiskast i IØS.

Forvaltninga av kolmule

Noreg sine kvotar og fangstar av kolmule går fram av tabell 5.14.

Kommentarar til oversikta

I 2011 og 2012 fiska norske fartøy kolmule i EU-sona, internasjonalt farvatn og i NØS. Noreg kan overføre 10 % av Noregs kyststatsandel inkludert ein overføring på 0,5 % frå EU. For 2011 utgjorde dette 969 tonn.

Forvaltninga av makrell

Noreg sine kvotar og fangstar av makrell går fram av tabell 5.15.

Kommentarar til oversikta

I 2011 og 2012 vart kyststatane ikkje einige om forvalting av makrell. Noreg og EU vart difor einige om ein bilateral avtale om forvaltning av makrell desse åra. Noreg kunne overføre eit ufisket kvantum på 14 500 tonn frå 2010 til 2011. Frå og med 2011 er det innført kvotefleksibilitet over årsskiftet i fisket etter makrell.

Norsk fiske i Irmingerhavet

Kommentarar til oversikta

Oversikta inkluderer kvotar og fangst på kvotar tildelt av EU og Grønland, jf. tabell 5.4 og 5.7. Noreg sine kvotar og fangstar i Irmingerhavet går fram av tabell 5.16. Tala inkluderer ikkje norsk fiske i Smotthavet (internasjonalt farvatn i ICES-område IIa). Fisket etter uer i Irmingerhavet var ikkje kvoteregulert før i 1996. Ved berekning av fangstuttak på uer i Irmingerhavet nytta norske fiskarar i 2007 norske omrekningsfaktorar som låg noko høgre enn det andre land i NEAFC nytta. For 2008 vedtok NEAFC ein felles faktor på 1,7.

Norsk fiske i det nordvestlege Atlanterhavet

Kommentarar til oversikta

Noreg sine kvotar og fangstar i det nordvestlege Atlanterhavet går fram av tabell 5.17. Etter elleve års moratorium vart det i 2010 opna for torskefiske i underområde 3M. I 2011 og 2012 vart torskekvoten sett til 925 og 859 tonn. I 2000 fiska norske fartøy for første gong uer i NAFO-underområde 1F. Det er ikkje fastsett uerkvote i dette området. Noreg har òg høve til å fiske mellom anna blåkveite i NAFO-underområde 3LMNO under «others-kvoten».

Rekefisket i NAFO tok til våren 1993, då norske reketrålarar saman med reketrålarar frå Færøyane og Grønland starta fiske på rekefelta ved Flemish Cap. Rekefisket ved Flemish Cap utvikla seg på 1990-talet til å verte eit viktig driftsalternativ for rekeflåten ved sida av fisket ved Grønland. Rekefisket vart innsatsregulert i 1996. Omfanget av dette fisket har vorte mindre då tal på norske trålarar med reketråling som einaste driftsalternativ i mellomtida har gått sterkt attende. På grunnlag av bestandssituasjonen vart det i 2011 innført forbod mot å fiske reker i NAFO-underområde 3M. Dette forbodet gjeld framleis.

I 2011 vart den norske rekekvoten i 3L satt til 214 tonn, i 2012 vart rekekvoten redusert til 133 tonn. Ingen fartøy har fiska reker i 3L i 2011 og 2012.

5.3 Utanlandsk utnytting av kvotar i norske havområde i 2011 og 2012

Russland – Noreg

Fellesbestandane

Noreg og Russland har felles forvaltning av torsk, hyse, blåkveite og lodde i Barentshavet. Oversikta for 2011 og 2012 viser Russland sine kvotar og fangstar av desse bestandane etter overføring frå Russland til Noreg, men før kvotetildeling frå Russland til tredjeland (sjå tabell 5.18).

Kommentarar til oversikta

Tala i tabell 5.18 inneheld murmansktorsk, kvote disponibel for forskings- og forvaltningsformål og overført tredjelandskvote. For åra 2011 og 2012 vart det avsett ein kvote på 21 000 tonn murmansktorsk og 7000 tonn torsk til forskings- og forvaltningsformål. I tillegg overførte Russland i 2012 3763 tonn torsk og 914 tonn hyse frå avsett tredjelandskvote til nasjonal kvote. Fangsttala er førebelse og rapporterte frå russiske styresmakter til norske styresmakter. Blåkveitebestanden vart fordelt i 2010, her manglar fangsttal for 2012.

Kommentarar til oversikta

Russland sine kvotar og fangstar i norske havområde går fram av tabell 5.19. Av torskekvoten i NØS i 2011 og 2012 vart høvesvis 64 prosent og 72 prosent fiska. I 2011 fiska Russland 88 prosent av hysekvoten sin, medan dei i 2012 hadde ei utnytting på 90 prosent.

Kvoten for snabeluer og uer kunne berre nyttast til bifangst i 2011 og 2012, medan steinbitkvoten skulle dekkje både direktefiske og bifangst. Av totalkvoten på 14 250 tonn sei kunne inntil 8000 tonn fiskast i eit direktefiske i 2012. Russland hadde i 2012 høve til å fiske 106 791 tonn sild i NØS nord for 62°N. I tillegg kom 10 000 tonn i kvotebytte mellom Noreg og Russland og 1843 tonn i unytta kvantum frå 2011. Kolmulekvoten og sildekvoten i NØS nord for 62°N kunne òg fiskast i fiskerisona ved Jan Mayen.

Kvoten av andre artar for 2011 og 2012 er ikkje spesifisert.

EU – Noreg

Fellesbestandane

I Nordsjøen har Noreg og EU felles forvaltning av torsk, hyse, sei, kviting, raudspette, sild og makrell. Delar av EU sine kvotar på konsumartane kan fiskast i NØS, sjå tabell 5.20. EU sine kvotar og fangstar av desse bestandane etter overføring frå Noreg til EU, men før kvotetildeling frå EU til tredjeland i 2011 og 2012, går fram av tabell 5.20.

Kvoten for sild og makrell omfattar Nordsjøen og Skagerrak.

Kommentarar til oversikta

EU sine kvotar og fangstar i norske jurisdiksjonsområde går fram av tabell 5.21. I åra 2011 og 2012 har EU nytta torske-, sei- og hysekvotane nord for 62°N godt. EU fiska 99 % av torskekvota i 2012. I 2011 vart torskekvota overfiska med 10,5 prosent. Forklaringa på dette er samansett. I 2011 var det ein del problem knytt til at enkelte EU-fartøy gav opp feil sone ved fangst. I fangsttala ovanfor er difor fangsten plassert på den kalkulerte sona til fartøyet ved fisket. Det er òg observert tilfelle av dobbelrapportering av fangst frå nokre av EU-fartøya. Det reelle fangsttalet for EU-fartøy kan difor vere noko lågare enn det som kjem fram i tabellen ovanfor, men det må likevel leggast til grunn at EU overfiska torskekvoten i 2011.

EU sin sildekvote nord for 62°N kunne fiskast i område under norsk jurisdiksjon nord for 62°N.

EU sin makrellkvote nord for 62°N kunne òg fiskast sør for 62°N i ICES-område IVa i Nordsjøen i 2012. EU sine kvotar av uer, blåkveite og samlekvoten for andre artar nord for 62°N er bifangstkvotar.

I 2012 kunne EU fiske 73 416 tonn kolmule i NØS og i fiskerisona ved Jan Mayen gjennom kolmuleavtalen. I tillegg kunne EU (Sverige) fiske 800 tonn industrifisk sør for 62°N.

EU sine fangstar i NØS sør for 62°N som del av deira samla fangstar i høve til kvote, utgjer i 2011 og 2012 desse prosentane: for torsk 27 og 31 prosent, for hyse 17 og 20 prosent, for sei 37 og 30 prosent, for kviting 5 prosent i begge åra og for raudspette 9 og 13 prosent.

EU utnytta 77 prosent av kvoten på andre artar i Nordsjøen i både 2011 og 2012.

Færøyane – Noreg

Kommentarar til oversikta

Færøyane sine kvotar og fangstar i norske havområde går fram av tabell 5.22. På grunn av usemje om makrell vart det ikkje inngått kvoteavtalar mellom Færøyane og Noreg for 2011 og 2012. Færøyane har like fullt høve til å fiske kolmule og sild gjennom fempartsavtalen og «kolmuleavtalen».

Færøyane kunne gjennom fempartsavtalen fiske totalt 25 380 tonn sild i Noregs jurisdiksjonsområde nord for 62°N i 2012. Av dette kunne 18 873 tonn fiskast i Noregs økonomiske sone nord for 62°N. For 2011 var desse kvotane på høvesvis 30 103 og 22 384 tonn.

Gjennom «kolmuleavtalen» kunne Færøyane i 2012 fiske 8151 tonn i heile NØS og i fiskerisona ved Jan Mayen. I 2011 var denne kvota på 836 tonn.

Grønland – Noreg

Kommentarar til oversikta

Grønland sine kvotar og fangstar i norske havområde går fram av tabell 5.23. Grønland nytta kvotane sine godt i 2011 og 2012.

Grønland overførte torske- og hysekvotar tildelte frå Russland til NØS tilsvarande høvesvis 5000 tonn og 1500 tonn i 2011. I 2012 overførte Grønland 5300 tonn torsk og 1500 tonn hyse frå Russland til NØS. Grønland fikk høve til å fiske 2350 tonn sild nord for 62°N i 2012 etter å ha fått kvote overført frå Færøyane.

Island – Noreg

Island fekk ein torskekvote i NØS nord for 62°N på 6388 tonn i 2011 og 6835 tonn i 2012 som eit resultat av Smottholsavtalen. Sjå tabell 5.24.

Kommentarar til oversikta

Island kunne fiske til saman 143 359 tonn og 120 868 tonn sild i 2011 og 2012 i fiskerisona ved Jan Mayen. Av desse kunne 26 676 tonn og 22 491 tonn fiskast i NØS nord for 62°N. Island fiska ikkje sild i fiskerisona ved Jan Mayen eller i NØS i 2012. Av sildekvoten i NØS i 2011 vart 36 prosent nytta.

I 2012 og 2011 nytta Island høvesvis 100 og 99 prosent av torskekvoten i NØS. Bifangst av hyse er auka noko i 2012 samanlikna med 2011.

EU (Sverige – Danmark) – Noreg, om fisket i Skagerrak/Kattegat

Torsk, raudspette og reker kan berre fiskast i Skagerrak. For dei andre artane gjeld kvotane både i Skagerrak og den nordlege delen av Kattegat.

Kommentarar til oversikta

EU sine kvotar og fangstar i Skagerrak/Kattegat går fram av tabell 5.25. Det er i hovudsak Danmark og Sverige som fiskar på desse kvotane, men for enkelte artar har òg andre EU-land mindre kvotar.

Tabell 5.25 syner at EU nyttar kvotane på torsk, hyse, nordsjøsild og raudspette best. På autonomt grunnlag kvoteregulerer EU òg andre bestandar enn dei det er fastsett kvotar på gjennom avtalen om regulering av fiskebestandane i Skagerrak/Kattegat.

Sverige – Noreg

Kommentarar til oversikta

Sverige sine kvotar og fangstar i norske havområde går fram av tabell 5.26. Industrifiskkvoten til Sverige omfatta kolmule, augepål, tobis, brisling og hestmakrell. Av dette kunne det fiskast maksimalt 400 tonn hestmakrell. I tabellen er fangstane av augepål, kolmule, tobis og hestmakrell samla under industrifisk. I 2011 fiska svenske fartøy 671 tonn industrifisk, medan dei i 2012 fiska 749 tonn.

I samband med at Sverige vart medlem i EU frå 1. januar 1995, fekk svenske fartøy høve til å fiske i NØS i Nordsjøen på EU sine kvotar av torsk, hyse, sei, kviting, makrell og sild i medhald av avtalen mellom EU og Sverige.

I hovudsak er det svenske fisket retta mot kvotane deira av torsk, sei, makrell, sild og reker.

Rekefisket ved Svalbard

I 1996 vart rekefisket ved Svalbard regulert ved å setje grenser for innsatsen i fisket. Etter forskriftene kan berre nasjonar som har drive eit tradisjonelt fiske etter reker ved Svalbard delta i dette fisket med eit avgrensa tal på fartøy (Canada, Færøyane, Grønland, Island, EU, Noreg og Russland). For å motverke at rekefisket ekspanderer, vart rekefisket frå 1997 for dei aktuelle landa òg regulert med fiskedøgn. Av same årsak vart maksimalt tal tilletne fiskedøgn redusert med 30 prosent frå 1. januar 2006.