Kap. 1312 Oslo Lufthavn AS

For 1997 er det til Oslo Lufthavn AS løyvd eit lån på 3 400 mill. kr. I tillegg er det løyvd eit lån i 1997 til kommersielle tilleggsprosjekt på 320 mill. kr, jf. St.prp. nr. 37/Innst. S. nr. 167 (1996-97), slik at den totale løyvinga til lån til Oslo Lufthavn AS i 1997 er 3 720 mill. kr. Oslo Lufthavn AS har gjennomført ein budsjettrevisjon og periodisering av kostnader som viser at lånebehovet i 1997 er 600 mill. kr lågare enn opphaveleg løyvd. Tilsvarande er lånebehovet i 1998, som tidlegare vart rekna til 1 400 mill. kr, no auka til 2 000 mill. kr. På denne bakgrunn foreslår Samferdselsdepartementet for 1997 å redusere lånet på kap. 1312 Oslo Lufthavn AS, post 90 Lån, med 600 mill kr. Selskapet si totale låneramme for 1997 vil dermed utgjere 3 120 mill. kr. Luftfartsverket har i tillegg tilført Oslo Lufthavn AS 350 mill. kr i ansvarleg lånekapital i 1997.

Kap. 1352 NSB Gardermobanen AS

Investeringsramma for utbygging av Gardermobanen (kjørevegen) er i St.prp. nr. 90 (1991-92) Utbygging og finansiering av hovedflyplass for Oslo-området på Gardermoen med tilhørende tilbringersystem og konsekvenser for Forsvaret, utrekna til 4 600 mill. 1992-kr, med ei uvisse på +/- 20 pst. Omrekna til 1998-kr og tillagt 20 pst. for den uvisse som låg til grunn for Stortingets utbyggingsvedtak, utgjer dette ei ramme for utbygginga av Gardermobanen på 6 000 mill. 1998-kr, ekskl. grunnerverv.

NSB Gardermobanen AS har gjennomført risikoanalysar i samband med sin budsjettrevisjon nr. 5 i juni 1997. Desse viser ein mest sannsynleg sluttverdi på om lag 6 000 mill. 1998-kr. Denne verdien ligg innafor den opphavlege investeringsramma tillagt 20 pst. for uvisse. Gjeldande låneramme for utbygginga er på 5 670 mill. 1998-kr. Det vil såleis vere behov for å auke låneramma. Behovet for auka låneramme har m.a. si årsak i tilleggsarbeid i Romeriksporten og kostnadsauke ved grunnarbeid. Det vil bli gjort nærare greie for utbygginga, m.a. av kostnadsramme, lån og eigenkapital, i budsjettproposisjon 1998 for Samferdselsdepartementet.

For 1997 er det løyvd 1 830 mill. kr. i lån til NSB Gardermobanen AS, inkl. 405 mill. kr i ansvarleg lån. Det er vidare løyvd 215 mill. kr i refusjon for auka meirverdiavgift. Pga. auken i den totale låneramma, endra framdrift og dermed endring av utbetalingar frå 1996 og 1998 til 1997, samt utbetaling av likviditetslån til Scandinavian Rock Group i samband med at drifta i Romeriksporten starta opp på nytt, vil det vere eit større lånebehov i 1997 enn dei løyvingane over kap. 1352 som tidlegare er vedtekne av Stortinget. På denne bakgrunn foreslår Samferdselsdepartementet for 1997 å auke lånet på kap. 1352 NSB Gardermobanen AS, post 90 Lån, med 440 mill kr til 1 865 mill. kr og post 91 Ansvarleg lån, med 130 mill. kr til 535 mill. kr. Til saman inneber dette ein auke med 570 mill. kr til 2 400 mill. kr. Samstundes foreslår Samferdselsdepartementet å auke kap. 1352 NSB Gardermobanen AS, post 70 Refusjon av meirverdiavgift, med 62 mill. kr til 277 mill. kr.