200,6 millionar kroner til næringsretta utviklingstiltak i Nordland

Regjeringa har løyvd 200,6 millionar kroner til næringsretta utviklingstiltak i Nordland for 2005. Totalt er det sett av 795 millionar kroner i 2005 til ein særskilt næringsretta innsats i områda av landet som er omfatta av omlegginga av arbeidsgjevaravgifta frå 01.01.2004.

- Næringslivet og regionane har sjølve laga handlingsplanar for korleis midlane skal brukast, seier kommunal- og regionalminister Erna Solberg. - Eg er særleg nøgd med at næringslivet har tatt den førande rolla i å lage planane, og det er næringslivet sine prioriteringar som ligg til grunn for bruken av midlane.

- Helst ville vi behalde den differensierte arbeidsgjevaravgifta. Når det ikkje gjekk, har Regjeringa lagt vekt på å føre tilbake midlane til den einskilde region på best mogleg måte og etter innspel frå regionane, seier statsråd Erna Solberg.

I Nordland er det særleg lagt vekt på at tiltak skal gjennomførast nær opp til brukarane. Handsaming av saker og prioritering mellom tiltaka er derfor lagt ut til dei sju regionane i fylket. Tiltaka som er ført opp i handlingsplanen for Nordland er i hovudsak innanfor bedriftsutvikling/lokal næringsutvikling, innovasjon/nyskaping, infrastruktur/samferdsle, digital infrastruktur/breiband og FoU/kompetanse. 20 prosent av råma er satt av til bransjetiltak innanfor bygg og anlegg, reiselivsnæringa, transportsektoren, mediebransjen, bilbransjen, kraft- og nettverksbransjen og Abelia-kunnskapsbedriftane.

Regjeringa vil også for 2006 følgje opp innsatsen med løyvingar til næringsretta utviklingstiltak.

• Fylkesvis oversikt
• Temaside om differensiert arbeidsgjevaravgift