Gielda- ja guovlludepartemeanta juolluda liige 1 miljovnna kruvnno dán jahkái Norgga Dutkanráđi sámi prográmmii vai sámegiella dutkama vuođđogiellan nannejuvvo.

-Fágasurggiid nugomat luonddu, birrasa, dálkkádaga ja boazodoalu lea váttis dutkat almmá vuođđogiela atnima haga, lohka stáhtačálli Ellen Inga O. Hætta. Ráđđehusa ulbmil lea ahte sámegiella galga leat oidnosis ja adnot eanet, maiddai dutkamis. Eanas sámi dutkan lea dán rádjái čađahuvvon eará gielaid go sámegiela bokte.

Dutkanbirrasat ja ovttaskas dutkit berrejit movttiidahttojuvvot atnit vuođđogiela dutkamis ja baicca geavahit eará vugiid dutkanbohtosiid ovdanbuktimis sámegielagiidda. Sáhtášii omd atnit video/DVD, filmma, semináraid jna; mas sámegiella lea váldogiellan.

Dása lassin Ráđđehus 2005 stáhtabušeahtas evttoha lasihit Gieldda- ja guovlludepartemeantta jahkasáš juolludeami Norgga dutkanráđi sámi dutkanprográmmaide.

Stáhtačálli Ellen Inga O. Hætta: 901 02 055.