1 Álggahus

Sámediggi lea addán iežas jahkedieđáhusa departementii Sámedikki barggu birra jagi 2009. Jahkedieđáhus čilge Sámedikki politihkalaš barggu, daid doaibmamušaid maid Sámediggi galgá hálddašit ja ekonomalaš ja hálddahuslaš hástalusaid.

Sámelága vuođul galgá Sámedikki jahkedieđáhus sáddejuvvot Ráđđehussii ja ovddiduvvot Stuorradiggái juohke jagi, gč. árvalusa justiisalávdegoddái sámelága mearrideami oktavuođas (Innst. O. nr. 79 (1986–87)). Dát dieđáhus ollašuhttá daid eavttuid.

Dán stuorradiggedieđáhusas addá Ráđđehus ruovttoluodda cealkámuša daid áššiid hárrái maid Sámediggi lea váldán ovdan jagi 2009 jahkedieđáhusas. Dat sisttisdoallá maiddái čilgehus das mo dat áššit mat leat váldojuvvon ovdan dieđáhusas, galget čuovvoluvvot. Sámedikki jahkedieđáhus lea biddjojuvvon stuorradiggedieđáhussii kapihtalin 2.

Sámedikki jagi 2009 rehketdoallu čuovvu dán dieđáhusa mielddusin.

Stuorradiggeválgga maŋŋá čakčat 2009 mearriduvvojedje muhtun nuppástusat departemeantastruktuvrii mat doaibmagohte ođđajagemánu 1. b. 2010. Dan oktavuođas sirdojuvvui ovddasvástádus Sámi- ja unnitlohkopolitihkalaš áššiin ovddeš Bargo- ja searvadahttindepartemeanttas ođđa Ođasmahttin-, hálddahus- ja girkodepartementii.