Mihttu 1: Bajidit bonjuolbmuid eallinkvalitehta

Oassemihtut:

• Buoridit bonjuolbmuid psyhkalaš dearvvašvuođa
• Nannet eaktodáhtolaš organisašuvnnaid, mat ovddidit sohkabealle- ja seksualitehtamáŋggabealatvuođa
• Guhkesáiggi ja vuogádatlaš barggu bokte ovddidit buori gelbbolašvuođa sohkabealle- ja seksualitehtamáŋggabealatvuođas almmolaš sektoris sihkkarastin dihte ovttaárvosaš almmolaš bálvalusaid

Doaibmabidju 1: Lasihit juolludemiid eaktodáhtolaš organisašuvnnaide

Mánáid-, nuoraid- ja bearašdirektoráhtta (Bufdir) hálddaša doarjjaortnega, mainna galget nannet sohkabealle- ja seksualitehtamáŋggabealatvuođa Norggas ja maid váikkuhit dasa ahte bonjuolbmuid eallindilli ja eallinkvalitehta buorrána. 2023:s nanne ráđđehus juolludanortnega, mainna dorjot organisašuvnnaid barggu sohkabealle- ja seksualitehtamáŋggabealatvuođa ovddas.

Doaibmabidju 2: Ásahit doarjjaortnega psyhkalaš dearvvašvuođa várás

Sierra doarjjaortnet ásahuvvo nannen dihte áŋgiruššama bonjuolbmuid psyhkalaš dearvvašvuođa ovdii. Doarjjaortnet oaivvilduvvo earret eará psyhkalaš dearvvašvuođa ja gárrensuorggi geavaheaddji- ja oapmahašorganisašuvnnaide.

Doaibmabidju 3: Joatkit barggu buohkaid fátmmasteaddji sátnegeavaheami ovdii dearvvašvuođa- ja fuolahusbálvalusas ja bátnedearvvašvuođabálvalusas

Dearvvašvuođahálddahus ođasmahttá ain viidáseappot diehtojuohkima, njuolggadusaid ja eará norpmaid biddji buktagiid, mat láhččojuvvojit iešguđet bálvalusaid várás ja álbmogii Helsenorge.no ja Helfo bokte, nu ahte dain lea buot sohkabeliid ja seksualitehtamáŋggabealatvuođa fátmmasteaddji sátnegeavaheapmi.

Doaibmabidju 4: Sohkabealle- ja seksualitehtamáŋggabealatvuohta galgá vuhtiiváldot go ovddidit ovttaárvosaš almmolaš bálvalusaid

Ráđđehus galgá ovttaárvosaš almmolaš bálvalusaid ovddideames fuolahit ahte sohkabealle- ja seksualitehtamáŋggabealatvuohta vuhtiiváldojuvvo.

Doaibmabidju 5: Doalahit jeavddalaš gulahallama KS:in bonjuolbmuid dásseárvobarggus

Kultur- ja dásseárvoministtar áigu bilaterála ráđđádallančoahkkimis Suohkansektora organisašuvnnain (KS) ságaškuššat mo stáhta ja suohkansektor sáhttet ovttasráđiid ovddidit dásseárvvu servvodagas, ja dan oktavuođas maiddái bonjuolbmuid dásseárvvu.

Doaibmabidju 6: Nannet suohkaniid dásseárvobarggu bargoaddin

Kultur- ja dásseárvoministara bilaterála ráđđádallančoahkkimis Suohkansektora organisašuvnnain (KS) galgá suohkaniid bargu dásseárvvu ovdii ja ii-vealaheaddji bargoaddin leat erenoamáš fáddán.

Doaibmabidju 7: Árvvoštallat man muddui skuvllain dárbbašit eanet gelbbolašvuođa sohkabealle- ja seksualitehtamáŋggabealatvuođas

Ráđđehus áigu árvvoštallat man muddui oahpaheaddjit dárbbašit lasi gelbbolašvuođa lhbt+ fáttáin ja vejolaččat maid nannet gelbbolašvuođafálaldaga dán suorggis.

Doaibmabidju 8: Geavahit eksplisihtta sohkabealleperspektiivva stuoradiggedieđáhusas universitehta- ja allaskuvlasektora profešuvdnaoahpuid hárrái

Ráđđehus áigu ovttas universitehta- ja allaskuvlasektoriin árvvoštallat doaibmabijuid, maiguin sáhttet váikkuhit ahte studeanttat olahit suorggi oahppanjoksosiid, nu mo dat bohtet ovdan oahpuid rámmaplánain ja nationála njuolggadusain. Dieđáhusas Stuoradiggái universitehta- ja allaskuvlasektora profešuvdnaoahpuid birra galgá leat eksplisihtta sohkabealle- ja máŋggabealatvuođaperspektiiva oahpuide rekrutteremis.

Doaibmabidju 9: Fuolahit buriid diehtogaskkustemiid ung.no neahttasiiddus

Mánáid-, nuoraid- ja bearašdirektoráhtta (Bufdir) ja Dearvvašvuođadirektoráhtta (Hdir) galget ung.no-neahttaresurssa bokte juohkit dieđuid seksuála soju, sohkabealleidentitehta, sohkabealledovddaheami ja sohkabealledovdomearkkaid birra Norgga mánáide ja nuoraide, nu ahte dat sisdoallá maid dieđuid bonjuolbmuid seksuála ja psyhkalaš dearvvašvuođa birra.

Doaibmabidju 10: Ásahit digitála “arvedávgeportála”

Ráđđehus áigu ásahit neahttasiiddu, mii čohkke resurssaid, mat leat olámuttus ja mat bajidit gelbbolašvuođa sohkabealle- ja seksualitehtamáŋggabealatvuođa hárrái. Neahttasiidu ráhkaduvvo suohkaniidda ja fylkasuohkaniidda bargoaddin ja almmolaš eiseváldin ja maid earáide, geat fállet almmolaš bálvalusaid báikkálaš ja regiovnnalaš dásis.

Doaibmabidju 11: Nannet bolesiid gelbbolašvuođa

Lea dárbu bajidit gelbbolašvuođa ja máhtu sohkabealle- ja seksualitehtamáŋggabealatvuođas sihke bolesiid siskkáldas barggus ja maid olgguldas barggus, man olis bolesat doaimmahit bargguid ja deaividit álbmogiin iešguđet arenain. Bolesat galget gulahallat ja dasto ovttasbarggus lhbt+-organisašuvnnaiguin vuolggahit johtui gelbbolašvuođadoaimmaid (ovdamearkka dihte webináraid, kurssaid, e-oahpahusa), maid dat fállet bolesbargiide.