Samferdselsminister Liv Signe Navarsete: Prøveordning med "modulvogntog" kan gje meir effektiv og miljøvennleg godstransport

- Eg ønskjer å leggje til rette for meir effektiv og miljømessig godstransport på norske vegar. Bruk av lengre vogntog kan - på visse delar av vegnettet - vere med på å redusere transportkostnadene og miljøbelastninga ved godstransport med lastebil. Utanlandske erfaringar viser oss dette. Eg vil difor opne for ei prøveordning der godstransport på visse vegstrekningar kan skje med såkalla modulvogntog, med inntil 25,25 meter lengde, seier samferdselsminister Liv Signe Navarsete.

- Det er viktig at vi går stegvis fram, og ser om dette er noko som kan nyttast på delar av vegnettet vårt og i det trafikkbiletet vi har. Ordninga vil difor i første omgang både avgrensast i tid og til nokre få strekningar. Erfaringane i denne prøveperioden skal vurderast mellom anna med omsyn til verknader for effektivitet, trafikktryggleik og miljø, før eg tek stilling til om dette er noko det er grunn til å satse vidare på.

- Eg har difor skrive til Vegdirektoratet og bede direktoratet om å utgreie saka vidare og gjennomføre ei høyring av eit slikt forslag. Valet av kva for strekningar som skal vere med i forslaget er ikkje endeleg tatt. Vi må ta omsyn til behova til næringslivet, og vi må sjå på om vegen toler så store og tunge bilar, når vi no skal peike ut prøvestrekningar som kan gi oss erfaringar med bruk av lengre vogntog.

- E6 frå Svinesund til Alnabru, riksveg 2 frå Charlottenberg mot Kongsvinger, E12 frå svenskegrensa til Mo i Rana og E8 frå finskegrensa til Skibotn er nokre strekningar som kan vere aktuelle, seier samferdselsminister Liv Signe Navarsete.

"Vogntogkombinasjonar" tilpassa norske forhold

Det er særlege utfordringar med å drive godstransport i Noreg, på grunn av topografiske og klimatiske tilhøve. Vi har difor i dag ei overgangsordning som tillet vanlige vogntog å vere inntil 19 meter lange og semitrailervogntog å vere 17 meter lange, slik at godstrafikken kan skje med vogntogkombinasjonar som er tilpassa norske tilhøve, med svingete og bratte vegar og køyring av og på ferjer.

Denne overgangsordninga går ut 31. desember i år, og styresmaktene har saman med transportbransjen i lengre tid arbeidd for å få til ei ordning som gjer at slike særskilt tilpassa vogntog framleis kan køyre på norske veger.

Eg har i dag sendt brev til EU-kommisjonen der eg gjer greie for dei særskilte tilhøva i Noreg som gjer at det er behov for desse vogntoga, og at vi difor bør få høve til å fråvike krava til lengde som elles gjeld i EØS-området. Eg har og peikt på at ei slik regulering bør vere mogeleg innanfor gjeldande regelverk, seier samferdselsminister Liv Signe Navarsete.

Brev fra Samferdselsdepartementet til Vegdirektoratet av 12.10.06 (pdf)

Brev fra Samferdselsdepartementet til EU-kommisjonen av 12.10.06 (pdf)

Vedlegg 1 (pdf)

Vedlegg 2 (pdf)

Vedlegg 3 (pdf)

Til redaksjonen:

Samferdselsministeren er tilgjengeleg for kommentar via

informasjonssjef Ivar Torvik, tlf. 90 51 08 86 og

informasjonsrådgivar Melita Ringvold Hasle, tlf. 95 12 19 83