Del 4
Fisket etter avtalane i 2012 og 2013

5 Fisket etter avtalane i 2012 og 2013

5.1 Den felles forvaltninga

I omtalen av fisket etter avtalane for 2012 og 2013 ligg hovudvekta på i kva grad Noreg og dei partane som får tildelt kvotar i norske område, faktisk utnyttar desse kvotane. Først presenterer vi dei norske kvotane i sonene til andre statar og utnyttinga av desse, jf. pkt. 5.2 nedanfor. Deretter, i punkt 5.3, presenterer vi kvotane andre statar har i norske område og utnyttinga av desse. Kommentarane til kvoteutnyttinga omfattar berre åra 2012 og 2013.

I dei neste avsnitta vert omgrepet «felles forvaltning» nytta om ein del sentrale fiskebestandar. Felles forvaltning tyder at to eller fleire land/samanslutningar av land har avtala å forvalte ein bestand saman, fordi bestanden finst i sonene til fleire land. Dette inneber at det i dei årlege kvoteforhandlingane vert avtalt ein totalkvote for bestanden, og så vert totalkvoten delt mellom dei aktuelle avtalepartane.

5.2 Norsk utnytting av kvotar

I avsnitt 5.2 og 5.3 er kvotane henta frå dei årlege kvoteavtalane, med eventuelle oppdateringar. Fangsttala er baserte på landings- og sluttsetelregisteret i Fiskeridirektoratet, Fiskeridirektoratets kvotekontroll eller Fiskeridirektoratets register for elektroniske fangst- og aktivitetesdata. Rapporterte fangsttal frå fiskefelta kan avvike frå tala i landings- og sluttsetelstatistikken som viser utlossa kvanta. Symbolet (–) i tabellane tyder anten ingen fangst eller ingen kvote.

Noreg – Russland

Fellesbestandane

Noreg og Russland har felles forvaltning av artane torsk, hyse, blåkveite og lodde. Noreg sine kvotar (etter overføringar til tredjeland) og fangstar av desse bestandane går fram av tabell 5.1. Delar av dei norske kvotane for desse bestandane kan fiskast i russisk økonomisk sone, sjå tabell 5.2.

Kommentarar til oversikta

Kvotetala inneheld kvotar avsett til forsking. For åra 2012 og 2013 vart det avsett 7 000 tonn torsk til forskings- og forvaltningsformål. Avtalen for 2012 og 2013 opna vidare for å avsetje høvesvis 4 000 og 3 000 tonn hyse til forskings- og forvaltningsformål. I 2012 sette Noreg av 2 000 tonn hyse, og 2 000 tonn gjekk såleis inn i disponibel kvote for norske fartøy. I 2012 vart det overført 30 000 tonn lodde frå Russland til Noreg i byte mot 10 000 tonn norsk vårgytande sild.

Noreg hadde ikkje bilateral avtale med Færøyane i 2012 og 2013, og EU hadde ikkje noko av interesse å byte mot torsk og hyse frå Barentshavet. Difor vart det både i 2012 og 2013 tilbakeført torsk og hyse til den nasjonale kvoten frå kvoten som Den blanda norsk-russiske fiskerikommisjonen hadde sett av til tredjeland. Det vart tilbakeført 17 399 tonn og 25 600 tonn torsk i høvesvis 2012 og 2013, og 5200 tonn og 2953 tonn hyse i 2012 og 2013 til nasjonal kvote. Torskekvoten nord om 62°N vart ikkje oppfiska i 2012 og 2013. Den uregistrerte delen av rekreasjonsfisket er lagt til tala, og det ligg til grunn at heile avsetninga på 7000 tonn vart teken. Dermed enda utnyttingsgraden på 99,7 og 99,5 prosent.

Utnyttingsgraden for hyse var på om lag 100,9 prosent i 2012, medan den i 2013 var på 98,3 prosent. Loddekvoten vart godt nytta i 2012 og 2013.

Den blanda norsk-russiske fiskerikommisjonen fastsette totalkvotar for blåkveite på 18 000 tonn i 2012 og 19 000 tonn i 2013. Norsk kvote var på 9165 tonn i 2012 og 9675 tonn i 2013.

Trålarane og andre havfiskefartøy får tildelt kvotar praktisk talt utan overregulering, og dei held seg stort sett innanfor desse kvotane. Kystfiskeflåten består av mange fartøy som stadig vert meir effektive. Varierande grad av deltaking i fisket i kystflåten gjer det nødvendig å regulere fisket med såkalla overregulering. Overregulering er differansen mellom summen av maksimal-/fartøykvotane til dei enkelte fartøya og gruppekvoten. Overreguleringa vert uttrykt i prosent av gruppekvoten. Dersom summen av maksimal-/fartøykvotane er 13 000 tonn og gruppekvoten er 10 000 tonn, er overreguleringa 30 prosent. Fisket skal stoppast når gruppekvoten er teken. Tilgangen på fisk kan variere frå år til år, mellom anna på grunn av vêrforhold langs kysten. Dersom fiskeristyresmaktene bommar med graden av overregulering for kystfiskeflåten og ikkje greier å korrigere dette i tide, kan det føre til at dei fastsette kvotane vert overfiska. Ulike forhold kan òg føre til at kvotane ikkje vert fiska eller utnytta fullt ut.

Kommentarar til oversikta

Norske kvotar og fangstar i Russlands økonomisk sone (RØS) går fram av tabell 5.2. Med unntak av reker nytta Noreg lite av sonetilgangen i RØS i 2012 og 2013. Noreg kunne fiske heile loddekvoten i RØS.

Noreg – EU

Fellesbestandane

Noreg og EU har felles forvaltning av artane torsk, hyse, sei, kviting, raudspette og sild i Nordsjøen, sjå tabell 5.3. Delar av dei norske kvotane for konsumfiskbestandane kan fiskast i EU-sona av Nordsjøen, sjå tabell 5.4. Makrell er forvalta i eigen avtale mellom partane.

Kommentarar til oversikta

Norsk kvote og fangst inneheld kvantum som har å gjere med forsking. Fangsttala inneheld ikkje norsk bifangst frå industritrålfisket. Bifangstane varierer frå år til år i storleik og art.

Norske kvotar i EU sitt farvatn og tildelte kvotar frå EU i grønlandske farvatn (EUGRL), med tilhøyrande fangstar

Noreg fekk i 2012 og 2013 tildelt kvotar av blåkveite og kveite for fiske i grønlandsk sone både av EU og Grønland.

For desse artane er det i denne meldinga rekna at kvoten frå Grønland vert utnytta først (sjå tabell 5.7). Eventuelle fangstar ut over kvotane frå Grønland vert avrekna mot Noreg sine kvotar tildelte av EU (sjå tabell 5.4).

Kommentarar til oversikta

Noreg sine kvotar i EU-farvatn og tildelte kvotar frå EU i grønlandske farvatn, med tilhøyrande fangstar, går fram av tabell 5.4. Sidan 2009 har Noreg fiska tobis i EU-sona i byte mot torskekvote i Barentshavet.

I 2012 og 2013 kunne Noreg fiske høvesvis 68 og 64 prosent av totalkvoten på kolmule ut frå kyststatsavtalen i EU-sona og ut frå eit kvantum forhandla fram i den bilaterale avtalen mellom Noreg og EU.

Blålange, lange, brosme, pigghå, brugde og håbrann kunne fiskast i Nordsjøen og vest av 4°V. Blåkveite kunne fiskast i ICES-område IIa og VI. Kombinertkvoten gjaldt linefiske etter havmus, mora, skjelbrosme, isgalt og skolest i ICES-område Vb, VI og VII.

Kvoten «andre artar» i område IV omfattar fiske på artar det ikkje er fastsett kvotar for til Noreg i EU-sona.

Når det gjeld dei tildelte kvotane i grønlandske farvatn, vert desse slått saman med kvotane som Noreg får tildelt av Grønland. I denne meldinga vert den norske fangsten avrekna motkvoten tildelt frå EU til sist, etter at kvoten tildelt av Grønland er fiska.

Noreg – EU (Sverige – Danmark), om fisket i Skagerrak/Kattegat

Torsk, raudspette og reker kan fiskast i Skagerrak. Dei andre artane i Skagerrakavtalen kan fiskast både i Skagerrak og Kattegat.

Kommentarar til oversikta

Norske kvotar og fangstar i Skagerrak/Kattegat går fram av tabell 5.5. Dei viktigaste fiskeria for Noreg i Skagerrak er fisket etter reker. Fangstane av torsk i tabellen omfattar berre fisket utanfor grunnlinja.

Desse kvotane vart fastsette i den bilaterale kvoteavtalen mellom Noreg og EU. I 2012 og 2013 var det høve for norske fartøy til å fiske inntil 3000 tonn makrell i Skagerrak.

Noreg – Færøyane

Kommentarar til oversikta

Norske kvotar og fangstar i færøysk sone går fram av tabell 5.6.

Grunna usemje i makrellforvaltninga vart det ikkje inngått ein bilaterale avtale mellom Noreg og Færøyane i 2011, 2012 og 2013. Det vart like fullt inngått kyststatsavtale om forvaltning av kolmule. Noreg fikk høve til å fiske 16 302 tonn kolmule i 2012. I 2013 fekk norske fartøy ikkje tilgang til å fiske kolmule i færøysk sone, det vart grunngjeve med at Noreg ikkje gav færøyske fartøy tilgang til å fiske makrell i Noregs økonomiske sone.

Norske fartøy fiska ikkje kolmule i færøysk sone i 2012.

Noreg – Grønland

Kommentarar til oversikta

Noreg sine kvotar og fangstar i grønlandsk sone i 2012 og 2013 går fram av tabell 5.7. I tillegg kan norske fartøy fiske i grønlandsk sone på kvote tildelt av EU (sjå tabell 5.4).

Det deltok tre trålarar og eitt linefartøy i fisket etter blåkveite ved Vest-Grønland både i 2012 og 2013. I fisket etter blåkveite ved Aust-Grønland deltok to linefartøy og to trålarar i 2012, medan to linefartøy og ein trålar deltok i 2013.

Noreg fekk rekekvote frå EU i 2012 og 2013, men kvoteutnyttinga vart svært dårleg (sjå tabell 5.4). I 2012 og 2013 fekk Noreg også uer- og torskekvote.

Kvoten på uer er delt i botnlevande og pelagisk uer. Den pelagiske uerkvoten frå Grønland og EU kan fiskast i internasjonalt farvatn. Denne kvoten vart godt utnytta (sjå tabell 5.16).

I fisket etter kveite ved Aust-Grønland er det berre høve til å fiske med line. To fartøy deltok i fisket i 2012.

Dei tre siste åra vart torskekvoten godt utnytta.

Noreg – Island, om fisket etter botnfisk og lodde i islandsk sone

Kommentarar til oversikta

Noreg sine kvotar og fangstar i islandsk sone går fram av tabell 5.8. I tillegg til kvoten på 500 tonn botnfisk hadde norske fartøy òg høve til å ha inntil 25 prosent bifangst av andre artar. Noreg utnytta botnfiskkvotane ved Island godt i både 2012 og 2013.

Forvaltninga av norsk vårgytande sild

Noreg sine kvotar og fangstar av norsk vårgytande sild går fram av tabell 5.9, 5.10, 5.11 og 5.12.

Kommentarar til oversikta (tabellane 5.9, 5.10, 5.11 og 5.12)

I november 2008 vart kyststatane EU, Færøyane, Island, Noreg og Russland einige om å innføre kvotefleksibilitet over årsskiftet for 2008. Det vart høve til å føre over inntil 10 prosent av ubrukt kvote til neste år. Det vart òg høve til å forskottere inntil 10 prosent på neste års kvote. Alt fiske utover kvote skulle trekkjast frå kvoten neste år. Denne ordninga er seinare ført vidare.

Hausten 2012 kravde Færøyane ein høgare del av totalkvoten. Det førte til brot i forhandlingane om norsk vårgytande sild. Etter fleire forhandlingsrundar skreiv dei andre partane under ein firepartsavtale for 2013. Der sette dei av eit kvantum til Færøyane i samsvar med deira del av kvoten i tidlegare år. Færøyane fastsette ein eigen kvote som tilsvara 17 prosent av totalkvoten på 619 000 tonn. Færøyane har dei siste åra fiska eit vesentleg høgre kvantum i si eiga sone enn tidlegare år. I 2012 fiska dei berre 3368 tonn i NØS. I 2013 hadde dei ikkje tilgang til norske farvatn.

I 2012 og 2013 fiska islandske fartøy ikkje sild i norske farvatn.

Noreg fiska i 2012 heile 19 267 tonn meir enn den norske kvoten på 471 734 tonn (etter overføring og fleksibilitet). Dette kvantumet vart trekt frå norsk kvote for 2013. I 2013 fiska Noreg heile 36 549 tonn sild i internasjonalt farvatn, mot 4 315 tonn i 2012.

Det russiske hovudfisket føregjekk i vernesona rundt Svalbard i 2012 og 2013.

EU og Island har overført unytta kvote til 2012 og 2013, medan Færøyane og Noreg begge åra fiska på forskot.

Forvaltninga av lodde ved Island, Grønland og Jan Mayen

I følgje den gjeldande trepartsavtalen for lodde ved Island, Grønland og Jan Mayen varer sesongen for loddefisket frå 20. juni til 30. april. Det er likevel ikkje tillete for norske fartøy å drive fiske etter 15. februar i islandsk sone.

Kommentarar til oversikta

Noreg sine kvotar og fangstar på lodde i sesongane 2012/2013 og 2013/2014 går fram av tabell 5.13.

For sesongen 2012/2013 vart førebels TAC fastsett til 300 000 tonn 2. november 2012. Norsk kvote var samansett av 24 000 tonn frå trepartsavtalen, der 8400 tonn kunne fiskast i Islands økonomiske sone (IØS), og 26 111 tonn frå avtalen mellom Noreg og Island om fisket i Barentshavet. 6. februar 2013 vart TAC auka frå 300 000 tonn til 450 000 tonn lodde. Norsk kvote auka då med 12 000 tonn der 4200 tonn kunne fiskast i IØS. 12. februar vart TAC auka igjen, til 570 000 tonn. Den norske kvoten auka då til totalt 71 711 tonn lodde, der 42 071 kunne fiskast i IØS.

76 fartøy deltok i fisket i IØS i januar og februar 2013. Det vart fiska totalt 40 603 tonn lodde sesongen 2012/2013.

For sesongen 2013/2014 vart førebels TAC fastsett til 160 000 tonn 15. oktober 2013. Norsk kvote var samansett av 12 800 tonn frå trepartsavtalen, der 4480 tonn kunne fiskast i IØS, og 34 921 tonn frå avtalen mellom Noreg og Island om fisket i Barentshavet. I tillegg fekk Noreg et kompensasjonstillegg på 1468 tonn frå førre sesong, der alt kunne fiskast i IØS.Til samen kunne Noreg fiske 49 189 tonn lodde, der 40 869 tonn kunne fiskast i IØS.

Det vart eit dårleg fiske denne vinteren. Berre 6 fartøy fekk fangst, og dei fiska totalt 6 175 tonn.

Forvaltninga av kolmule

Noreg sine kvotar og fangstar av kolmule går fram av tabell 5.14.

Kommentarar til oversikta

I 2012 og 2013 fiska norske fartøy kolmule i EU-sona, internasjonalt farvatn og i NØS. Noreg kan overføre 10 prosent av den norske kyststatsdelen inkludert ei overføring på 0,5 prosent frå EU. For 2012 utgjorde dette 438 tonn.

Forvaltninga av makrell

Noreg sine kvotar og fangstar av makrell går fram av tabell 5.15.

Kommentarar til oversikta

I 2012 og 2013 vart kyststatane EU, Noreg, Island og Færøyane ikkje einige om forvaltning av makrell. Noreg og EU hadde difor ein bilateral avtale om forvaltning av makrell desse åra. Frå og med 2011 vart det innført kvotefleksibilitet over årsskiftet i fisket etter makrell. Noreg fiska 5 567 tonn meir enn den norske kvoten på 170 542 tonn (etter overføring og fleksibilitet) i 2012. Dette kvantumet vart trekt frå kvoten i 2013. I 2013 fiska Noreg heile 16 824 tonn meir enn kvoten på 147 788 tonn (etter overføring og fleksibilitet).

Norsk fiske i Irmingerhavet

Kommentarar til oversikta

Oversikta inkluderer kvotar og fangst på kvotar tildelt av EU og Grønland, jf. tabell 5.4 og 5.7. Noreg sine kvotar og fangstar i Irmingerhavet går fram av tabell 5.16. Tala inkluderer ikkje norsk fiske i Smotthavet (internasjonalt farvatn i ICES-område IIa). Fisket etter uer i Irmingerhavet var ikkje kvoteregulert før i 1996. Ved utrekninga av fangstuttaket av uer i Irmingerhavet nytta norske fiskarar i 2007 norske omrekningsfaktorar som låg noko høgre enn det andre land i NEAFC nytta. For 2008 vedtok NEAFC ein felles faktor på 1,7.

Norsk fiske i det nordvestlege Atlanterhavet

Kommentarar til oversikta

Noreg sine kvotar og fangstar i det nordvestlege Atlanterhavet går fram av tabell 5.17. Etter elleve års moratorium vart det i 2010 opna for torskefiske i underområde 3M. I 2012 og 2013 var torskekvoten 859 og 1305 tonn. I 2000 fiska norske fartøy for første gong uer i NAFO-underområde 1F. Det er ikkje fastsett uerkvote i dette området. Noreg har òg høve til å fiske mellom anna blåkveite i NAFO-underområde 3LMNO under «others-kvoten».

Rekefisket i NAFO tok til våren 1993, då norske reketrålarar saman med reketrålarar frå Færøyane og Grønland starta fiske på rekefelta ved Flemish Cap. Rekefisket ved Flemish Cap utvikla seg på 1990-talet til å verte eit viktig driftsalternativ for rekeflåten ved sida av fisket ved Grønland. Rekefisket vart innsatsregulert i 1996. Omfanget av dette fisket har vorte mindre. Samstundes har talet på norske trålarar med reketråling som einaste driftsalternativ gått sterkt attende. På grunnlag av bestandssituasjonen vart det i 2011 innført forbod mot å fiske reker i NAFO-underområde 3M. Dette forbodet gjeld framleis.

I 2012 var den norske rekekvoten i 3L 133 tonn, i 2013 vart kvoten redusert til 96 tonn. Ingen fartøy har fiska reker i 3L i 2012 og 2013.

5.3 Utanlandsk utnytting av kvotar i norske havområde i 2012 og 2013

Russland – Noreg

Fellesbestandane

Noreg og Russland har felles forvaltning av torsk, hyse, blåkveite og lodde i Barentshavet. Oversikta for 2012 og 2013 viser Russland sine kvotar og fangstar av desse bestandane etter overføring frå Russland til Noreg, men før kvotetildeling frå Russland til tredjeland (sjå tabell 5.18).

Kommentarar til oversikta

Tala i tabell 5.18 inneheld murmansktorsk, kvote disponibel for forskings- og forvaltningsformål og overført tredjelandskvote. For åra 2012 og 2013 vart det sett av ein kvote på 21 000 tonn murmansktorsk og 7000 tonn torsk til forskings- og forvaltningsformål. I tillegg overførte Russland i 2013 6751 tonn torsk og 343 tonn hyse frå avsett tredjelandskvote til nasjonal kvote. Fangsttala er førebelse og rapporterte frå russiske styresmakter til norske styresmakter. Blåkveitebestanden vart fordelt i 2010, her manglar fangsttal for 2013.

Kommentarar til oversikta

Russland sine kvotar og fangstar i norske havområde går fram av tabell 5.19. Av torskekvoten i NØS i 2012 og 2013 vart høvesvis 72 prosent og 99 prosent fiska. I 2012 fiska Russland 90 prosent av hysekvoten sin, medan dei i 2013 hadde ei utnytting på 64 prosent.

Kvoten for snabeluer og uer kunne berre nyttast til bifangst i 2012 og 2013, medan steinbitkvoten skulle dekkje både direktefiske og bifangst. Av totalkvoten på 14 250 tonn sei kunne inntil 6500 tonn fiskast i eit direktefiske i 2013. Kolmulekvoten og sildekvoten i NØS nord for 62°N kunne òg fiskast i fiskerisona ved Jan Mayen.

Kvoten av andre artar for 2012 og 2013 er ikkje spesifisert.

EU – Noreg

Fellesbestandane

I Nordsjøen har Noreg og EU felles forvaltning av torsk, hyse, sei, kviting, raudspette, sild og makrell. Delar av EU sine kvotar på konsumartane kan fiskast i NØS, sjå tabell 5.20. EU sine kvotar og fangstar av desse bestandane etter overføring frå Noreg til EU, men før kvotetildeling frå EU til tredjeland i 2012 og 2013, går fram av tabell 5.20. EU utveksla ikkje fangsttal i forhandlingane hausten 2013. Fangsttala for 2013 er difor ukjende.

Kvoten for sild og makrell omfattar Nordsjøen og Skagerrak.

Kommentarar til oversikta

EU sine kvotar og fangstar i norske jurisdiksjonsområde går fram av tabell 5.21. I åra 2012 og 2013 har EU nytta torske-, sei- og hysekvotane nord for 62°N godt. EU fiska 99 prosent av torskekvoten i 2012 og 2013.

EU sin kvote av norsk vårgytande sild nord for 62°N kunne fiskast i område under norsk jurisdiksjon nord for 62°N.

EU sin makrellkvote nord for 62°N kunne òg fiskast sør for 62°N i ICES-område IVa i Nordsjøen i 2013. EU sine kvotar av uer, blåkveite og samlekvoten for andre artar nord for 62°N er bifangstkvotar.

I 2013 kunne EU fiske 113 630 tonn kolmule i NØS og i fiskerisona ved Jan Mayen gjennom kolmuleavtalen. I tillegg kunne EU (Sverige) fiske 800 tonn industrifisk sør for 62°N.

EU sine fangstar i NØS sør for 62°N, rekna i prosent deira samla kvotar, var i 2012 og 2013 slik: for torsk 31 og 30 prosent, for hyse 20 og 19 prosent, for sei 30 og 29 prosent, for kviting 5 prosent i begge åra og for raudspette 13 og 15 prosent.

EU utnytta 77 og 79 prosent av kvoten på andre artar i Nordsjøen i 2012 og 2013.

Færøyane – Noreg

Kommentarar til oversikta

Færøyane sine kvotar og fangstar i norske havområde går fram av tabell 5.22. På grunn av usemje om makrell vart det ikkje inngått kvoteavtalar mellom Færøyane og Noreg for 2012 og 2013. Færøyane hadde høve til å fiske kolmule og norsk vårgytande sild gjennom fempartsavtalen og «kolmuleavtalen» i 2012. Færøyane ville ikkje inngå ein fempartsavtale om norsk vårgytande sild for 2013. I tillegg ville dei ikkje inngå ein avtale med Noreg om fiske i kvarandes sone for kolmule i 2013. Som følgje av dette hadde difor ikkje Færøyane høve til å fiske i norske havområde i 2013.

Grønland – Noreg

Kommentarar til oversikta

Grønland sine kvotar og fangstar i norske havområde går fram av tabell 5.23. Grønland nytta kvotane sine godt i 2012 og 2013.

Grønland overførte torske- og hysekvotar tildelte av Russland til NØS på 5300 tonn og 1500 tonn i 2012. I 2013 overførte Grønland 5900 tonn torsk og 530 tonn hyse frå Russland til NØS. Grønland fekk høve til å fiske 2350 tonn norsk vårgytande sild nord for 62°N i 2012 etter å ha fått kvote overført frå Færøyane.

Island – Noreg

Island fekk ein torskekvote i NØS nord for 62°N på 6388 tonn i 2011 og 6835 tonn i 2012 som eit resultat av Smottholsavtalen. Sjå tabell 5.24.

Kommentarar til oversikta

Island kunne fiske til saman 120 868 tonn og 89 817 tonn norsk vårgytande sild i 2012 og 2013 i fiskerisona ved Jan Mayen. Av desse kunne 22 491 tonn og 16 713 tonn fiskast i NØS nord for 62°N. Island fiska ikkje norsk vårgytande sild i fiskerisona ved Jan Mayen eller i NØS i 2012 og 2013.

I 2012 og 2013 nytta Island 99 prosent av torskekvoten i NØS. Bifangst av hyse er auka noko i 2013 samanlikna med 2012.

EU (Sverige – Danmark) – Noreg, om fisket i Skagerrak/Kattegat

Torsk, raudspette og reker kan berre fiskast i Skagerrak. For dei andre artane gjeld kvotane både i Skagerrak og den nordlege delen av Kattegat.

Kommentarar til oversikta

EU sine kvotar og fangstar i Skagerrak/Kattegat går fram av tabell 5.25. Det er i hovudsak Danmark og Sverige som fiskar på desse kvotane, men for enkelte artar har òg andre EU-land mindre kvotar.

Sverige – Noreg

Kommentarar til oversikta

Sverige sine kvotar og fangstar i norske havområde går fram av tabell 5.26. Industrifiskkvoten til Sverige omfatta kolmule, augepål, tobis, brisling og hestmakrell. Av dette kunne det fiskast maksimalt 400 tonn hestmakrell. I tabellen er fangstane av augepål, kolmule, tobis og hestmakrell samla under industrifisk. I 2012 fiska svenske fartøy 749 tonn industrifisk, medan dei i 2013 fiska 178 tonn.

I samband med at Sverige vart medlem i EU frå 1. januar 1995, fekk svenske fartøy høve til å fiske i NØS i Nordsjøen på EU sine kvotar av torsk, hyse, sei, kviting, makrell og sild i medhald av avtalen mellom EU og Sverige.

I hovudsak er det svenske fisket retta mot kvotane deira av torsk, sei, makrell, sild og reker.

Rekefisket ved Svalbard

I 1996 vart rekefisket ved Svalbard regulert ved å setje grenser for innsatsen i fisket. Etter forskriftene kan berre nasjonar som har drive eit tradisjonelt fiske etter reker ved Svalbard delta i dette fisket med eit avgrensa tal på fartøy (Canada, Færøyane, Grønland, Island, EU, Noreg og Russland). For å motverke at rekefisket ekspanderer, vart rekefisket frå 1997 for dei aktuelle landa òg regulert med fiskedøgn. Av same årsak vart maksimalt tal tilletne fiskedøgn redusert med 30 prosent frå 1. januar 2006.