1 Hovudinnhaldet i proposisjonen

Proposisjonen inneheld framlegg til endringar i lov 4. februar 1960 nr 1 om boligbyggelag, lov 4. februar 1960 nr 2 om borettslag og lov 23. mai 1997 nr 31 om eierseksjoner.

Det blir gjort framlegg om å endre burettslagslova, slik at mellom anna kommune, fylkeskommune og stat har rett til å overta inntil 10 prosent av partane i laget.

Det blir gjort framlegg om å endre bustadbyggjelagslova, slik at juridiske personar, som får rett til å overta partar i tilknytte burettslag, også skal ha rett til å eige partar i bustadbyggjelaget.

Det blir gjort framlegg om å endre eigarseksjonslova,slik at kommunens vedtak om å gje løyve til seksjonering m.m. først skal sendast til tinglysing etter at klagefristen for leigarane av bustad er ute, og deretter inntil eventuelle klager som er sett fram innan dette tidspunktet, er avgjort. Vidare blir det gjort framlegg om å lovfeste ein heimel for å kunne registrere eigarseksjonssameige - som var seksjonert før 1. januar 1998 - i Føretaksregisteret.