1 Innleiing

Samferdselspakke for Kristiansandsregionen, fase 1 blei vedtatt av Stortinget i 2009 gjennom handsaminga av St.prp. nr. 98 (2008–2009) Om utbygging og finansiering av Samferdselspakke for Kristiansandsregionen, fase 1, jf. Innst. nr. 82 S (2009–2010). Gjennom handsaminga av Prop. 156 S (2012–2013) slutta Stortinget seg i 2013 til innføring av tidsdifferensierte bompengetakstar, jf. Innst. 434 S (2012–2013). Samferdselspakka omfattar prosjekt og tiltak for om lag 2,3 mrd. kr, rekna om til 2017-prisnivå. Etter prognosen vil pakka vere nedbetalt tidleg i 2018.

Kristiansand kommune ønskjer no å forlengje innkrevjinga i to år fram til tidleg i 2020, eller til den eventuelt blir avløyst av ei ny bompengepakke for Kristiansandsregionen. Samstundes har lokale styresmakter slutta seg til endringar i takst- og rabattstrukturen i tråd med det som er lagt til grunn i Prop. 1 S Tillegg 2 (2015–2016), jf. Innst. 13 S (2015–2016). Midlane er planlagt nytta til planlegging av ei ny bompengepakke og grunnerverv. I tillegg er det aktuelt å prioritere ombygging av E18 Håneskrysset og ulike sykkel- og kollektivtrafikktiltak.

Med bakgrunn i dette legg Samferdselsdepartementet fram forslag om at dagens innkrevjingsordning i Kristiansandsregionen blir forlengja med inntil to år. I tillegg blir takst- og rabattstrukturen justert.