7 Merknadar til dei enkelte føresegnene

Til naturskadeforsikringslova § 3

Departementet foreslår endringar i forskriftsheimelen om ansvarsgrense i andre ledd. Heimelen skal gjere det mogleg å gi forskriftsføresegner som endrar ansvarsgrensa automatisk. Føresegnene kan mellom anna innebere at ansvarsgrensa heilt eller delvis blir knytt til indekser, modelleringar eller andre eksterne berekningar. Departementet viser som døme til forslaget frå Finanstilsynet om å knyte ansvarsgrensa til kapitalkravberekningar som Det europeiske forsikringstilsynet gjer etter Solvens II-regelverket. Nærare bakgrunn går fram av punkt 3.

Til naturskadeforsikringslova § 4

Nytt femte ledd i § 4 svarer til lovforslaget i høyringsnotatet § 13. Føresegna legg Norsk naturskadepool under tilsvarande kontrollregime som andre Finanstilsynet fører tilsyn med, sjå finanstilsynslova § 3 første ledd og ny finanstilsynslov § 1-3 første og andre ledd. At tilsynet skal førast etter reglane i finanstilsynslova, gir Finanstilsynet verkemiddel til å følgje opp brot på pliktene til poolen, jf. finanstilsynslova §§ 4 flg. og ny finanstilsynslov kapittel 4. Forslaget er omtalt nærare i punkt 4.

Departementet foreslår å gjere noverande femte ledd til nytt sjette ledd.

Til tvangsfullbyrdingslova § 5-1

Departementet gjer i andre ledd tredje punktum framlegg om at juristar kan vere prosessfullmektigar i tvangsfullbyrdingssaker for namsmannen. Endringa kjem av at rettshjelparordninga tok slutt 1. januar 2025, og at det difor ikkje lenger gir meining at rettshjelparar kan vere prosessfullmektigar. Framlegget er nærare omtalt i punkt 5.

Til tvangsfullbyrdingslova § 6-2

Framlegget om å endre andre punktum svarer til framlegget til endringar i tvangsfullbyrdingslova § 5-1, sett bort frå at det gjeld saker for tingretten, ikkje namsmannen. Departementet viser til merknaden til endringane i tvangsfullbyrdingslova § 5-1.