1 Innleiing

1.1 Hovudinnhaldet i meldinga

Fiskeridepartementet legg med dette fram melding om gjennomføring av lov 14 desember 1951 nr 3 om omsetning av råfisk (råfisklova). Meldinga inneheld også rapport om fiskeeksporten og saker som er av særleg interesse å leggje fram for Stortinget. Meldinga omfattar perioden 1995 og 1996.

Den førre meldinga om gjennomføring av råfisklova blei lagt fram for Stortinget som St meld nr 17 (1995-96) Om gjennomføring av råfisklova i 1993 og 1994.

Fiskeridepartementet orienterte i den førre meldinga om langsiktige leveringsavtaler for makrell som blei inngått for hausten 1995. Departementet legg med dette også fram evalueringa av avtalene, slik Næringskomiteen ba om då denne meldinga blei handsama, jf Innst S nr 117 (1995-96).

1.2 Tidlegare meldingar

St meld nr 17 (1995-96) inneheldt rapport om verksemda i dei salslaga og salsorganisasjonane som hadde einerett til omsetning i første hand av fisk med heimel i råfisklova. Det blei også gitt rapport om fiskeeksporten. I tidlegare Stortingsmeldingar er det gitt utførleg oversikt over omsetningssystemet. Meldingane inneheldt også saker som har vore av særleg interesse å leggje fram for Stortinget.

1.3 Status i lovverket

Det er ikkje skjedd endringar i salslagsstrukturen i meldingsperioden. Det eksisterer i dag difor seks salslag med omsetningsrett etter råfisklova.

I den førre meldinga blei det vist til at råfisklova § 4 har blitt endra slik at salslaga ikkje lenger har heimel til å godkjenne førstehandskjøparar av fisk. Endringa i lova blei ikkje iverksett då Stortinget ønska ei nærare vurdering av behovet for alternative ordningar. Resultatet av desse vurderingane var at lov om registrering som kjøpar i første hand av råfisk o.a. blei vedteke. Formålet med lova er å etablere ei tilsynsordning med omsetningsledda i førstehandsomsetninga av fisk og fiskevarer. Det blei sett på som den beste løysinga at forskrifter til lov om registrering som kjøpar i første hand av råfisk o.a. blei utarbeidd før denne lova og endringa av råfisklova blei sett i verk. Lovene og forskriftene tek til å gjelde 1 januar 1998.