2 Utval av inntekter

2.1 Skattar og avgifter frå Fastlands-Noreg

Statsrekneskapen for 1998 viser at samla skattar og avgifter frå Fastlands-Noreg utgjorde 357,4 mrd kroner. Sterkare auke i den økonomiske aktiviteten og i sysselsettinga enn lagt til grunn hausten 1997, har ført til at skatte- og avgiftsinntektene vart 11,3 mrd høgare enn i vedteke budsjett for 1998. Skatte- og avgiftsinntektene vart knapt 0,7 mrd høgare enn lagt til grunn i Nysaldert budsjett for 1998.

Tabell 2.1 viser at dei samla skatte- og avgiftsinntektene i statsrekneskapen har auka frå 325,0 mrd kroner i 1997 til 357,4 mrd kroner i 1998, ein auke på 32,4 mrd kroner eller 10 pst.

Skattar på formue og inntekt utgjorde 81,2 mrd kroner i 1998, ein auke på 21,5 pst eller 14,4 mrd kroner frå året før. Auken skuldast i stor grad utviklinga i fellesskatten, som steig med 23,7 pst til 66,1 mrd kroner i 1998. Auken kjem mellom anna av ein reduksjon i skattøyren for kommunar og fylkeskommunar og motsvarande auke i satsen for fellesskatt. Satsen for fellesskatt for forskottspliktige skattytarar vart auka frå 9,75 i 1997 til 11,0 pst i 1998. Satsen for fellesskatt frå etterskottspliktige skattytarar vart auka frå 20,75 pst til 21,25 pst.

Skatt og avgift til folketrygda, trygdeavgift og arbeidsgjevaravgift, utgjorde 107,3 mrd kroner i 1998, og svarar til ein auke på 9,3 pst frå året før.

Inntektene frå meirverdi- og investeringsavgifta utgjer ei av dei viktigaste inntektskjeldene til staten og steig med 7,5 pst til 110,6 mrd kroner i 1998.

Andre særavgifter og tollinntekter utgjorde til saman 58,3 mrd kroner i 1998, som svarar til ein auke på 2,1 pst frå 1997.

2.2 Skattar og avgifter frå petroleumsverksemda

Dei samla innbetalte skattane og avgiftene frå petroleumsverksemda i 1998, utanom CO₂avgifta, vart i nysalderingsproposisjonen rekna til 24 450 mill kroner. Det faktiske rekneskapstalet for 1998 er 24 372 mill kroner. Rekneskapstala for betalte direkte skattar vart om lag som rekne til i nysalderingsproposisjonen, mens betalt produksjonsavgift vart om lag 250 mill kroner lågare. Betalt arealavgift vart om lag 200 mill kroner høgare enn rekne til. Innbetalingane dei ti første månadene av 1998 og overslag for innbetalingane dei to siste månadene vart brukt til utrekningane.

Inntektene frå avgift på utslepp av CO₂ i petroleumsverksemda var i nysalderingsproposisjonen rekne til 3 200 mill kroner. Rekneskapstalet for 1998 er 3 229 mill kroner.

2.3 Inntekter frå Statens direkte deltaking i petroleumsverksemda

Inntektene frå Statens direkte deltaking i petroleumsverksemda er i hovudsak renter og avskriving på kapitalen og vart i nysalderingsproposisjonen rekna til 22 145 mill kroner. Det tilsvarande rekneskapstalet for 1998 er 23 115 mill kroner. Avviket kjem i all hovudsak av at avskrivingane vart høgare enn rekna med.