5 Fisket etter avtalane i 2007 og 2008

I omtalen av fisket etter avtalane for 2007 og 2008 er hovudvekta lagt på i kva grad Noreg og dei partane som får tildelt kvotar i norske område, faktisk utnyttar desse kvotane. Først presenterer vi dei norske kvotane i sonene til andre statar og utnyttinga av desse, jf. kapittel 5.1 nedanfor. Deretter, i kapittel 5.2, presenterer vi kvotane andre statar har i norske område og utnyttinga av desse. Kommentarane til kvoteutnyttinga omfattar berre åra 2007 og 2008.

I dei neste avsnitta vert omgrepet «felles forvaltning» nytta om ein del sentrale fiskebestandar. Felles forvaltning tyder at to eller fleire land/samanslutningar av land har avtala å forvalte ein bestand saman, fordi bestanden finst i sonene til fleire land. Dette inneber at det i dei årlege kvoteforhandlingane vert avtalt ein totalkvote for bestanden, som vert fordelt på dei aktuelle avtalepartane.

5.1 Norsk utnytting av kvotar

I kapittel 5.1 og 5.2 er kvotane henta frå dei årlege kvoteavtalane, med eventuelle oppdateringar. Fangsttala er baserte på landings- og sluttsetelregisteret i Fiskeridirektoratet eller på det fartøya har rapportert fiska frå dei ulike jurisdiksjonsområda, anten til Fiskeridirektoratet eller til ansvarlege i tredjeland, det vil seie styresmaktene i kyststaten. Rapporterte fangsttal frå fartøy på fiskefelta kan avvike frå tala i landings- og sluttsetelstatistikken som viser utlossa kvanta. Symbolet (–) i tabellane tyder anten ingen fangst eller ingen kvote.

5.1.1 Noreg – Russland

5.1.1.1 Fellesbestandane

Noreg og Russland har felles forvaltning av artane torsk, hyse og lodde. Noreg sine kvotar (etter overføringar til tredjeland) og fangstar av desse bestandane går fram av tabell 5.1. Delar av dei norske kvotane for desse bestandane kan fiskast i russisk økonomisk sone, sjå tabell 5.2.

Oversikta ovanfor syner at torskekvotane nord om 62ºN er noko overfiska begge åra, med utnyttingsgrad på vel 110 % i 2007 og 107 % i 2008. Utnyttingsgraden for hyse var på om lag 96 % i 2007 og 95 % i 2008. Bakgrunnen for dette er samansett. Trålarane og andre havfiskefartøy har fastsette kvotar praktisk talt utan overregulering, og dei held seg stort sett innanfor desse kvotane. Kystfiskeflåten består av mange fartøy som stadig vert meir effektive. Varierande grad av deltaking i fisket i kystflåten gjer det nødvendig å regulere fisket med såkalla overregulering. Overregulering er differansen mellom summen av maksimalkvotane og gruppekvoten. Overreguleringa vert uttrykt i prosent av gruppekvoten. Når eit fiskeri er regulert med maksimalkvotar er summen av maksimalkvotane større enn gruppekvoten. Differansen vert omtalt som overregulering. Dersom summen av maksimalkvotane er 13 000 tonn og gruppekvoten er 10 000 tonn, er overreguleringa 30 %. Tilgangen på fisk kan variere frå år til år, mellom anna på grunn av vêrforhold langs kysten. Dersom fiskeristyresmaktene bommar med graden av overregulering for kystfiskeflåten og ikkje greier å korrigere dette i tide, kan det føre til at dei fastsette kvotane vert overfiska. Ulike forhold kan også føre til at kvotane ikkje vert fiska eller utnytta fullt ut.

5.1.1.2 Kommentarar til oversikta

Noreg sine kvotar og fangstar i russisk økonomisk sone (RØS) går fram av tabell 5.2. Av dei norske fangstane nord om 62ºN i 2007 fiska Noreg 2,3 % av torskefangstane og 5,2 % av hysefangstane i RØS. Tilsvarande tal for 2008 var 0,7 % for torsk og 1,7 % for hyse. Noreg tek altså små fangstar av torsk og hyse i RØS sett i høve til dei totale norske fangstane.

I 2007 deltok fem reketrålarar i fisket etter reker i RØS, medan to deltok i 2008. Når det gjeld grønlandssel var det ingen norske fartøy som gikk til Austisen for å fangste i 2008.

5.1.2 Noreg – EU

5.1.2.1 Fellesbestandane

Noreg og EU har felles forvaltning av artane torsk, hyse, sei, kviting, raudspette, sild og makrell i Nordsjøen, sjå tabell 5.3. Delar av dei norske kvotane for konsumfiskbestandane kan fiskast i EU si sone av Nordsjøen, sjå tabell 5.4.

Noreg sine kvotar av torsk, sei, raudspette, makrell og sild vart godt utnytta dei to åra. Dei store makrellfangstane i nordsjøområdet må sjåast i samanheng med at Noreg hadde høve til å overføre inntil 100 000 tonn av makrellkvoten nord om 62ºN til fiske i Nordsjøen (ICES-område IVa). Likeins kunne makrellkvoten vest av 4ºV på 10 200 tonn i 2007 og 9300 tonn i 2007, fiskast i den nordlege delen av Nordsjøen. Dette forklarer også den låge utnyttinga av den norske makrellkvoten vest av 4ºV (sjå tabell 5.4).

Noreg fiska ikkje norsk vårgytande sild (NVG-sild) i Nordsjøen i 2007 eller 2008.

Makrell- og sildekvotane vert fordelte mellom ringnotfartøya, trålarane og kystfartøya. Fangsttala inneheld ikkje norsk bifangst frå industritrålfisket. Bifangstane varierer frå år til år i storleik og art.

5.1.2.2 Norske kvotar i EU sitt farvatn (EUF) og tildelte kvotar frå EU i grønlandske farvatn (EUGRL), med tilhøyrande fangstar

Noreg fekk i 2007 og 2008 tildelt kvotar av blåkveite, kveite og uer for fiske i grønlandsk sone både av EU og Grønland. For desse artane er det i denne meldinga rekna at EU-kvoten vert utnytta først. Noreg nyttar desse kvotane i såpass stor grad at med denne føresetnaden kan talet for fangst i enkelte tilfelle vere lik kvotetala slik dei er viste i tabell 5.4. Eventuelle fangstar ut over EU-kvotane vert avrekna mot Noreg sine kvotar tildelte av Grønland (sjå tabell 5.6).

5.1.2.3 Kommentarar til oversikta

Noreg sine kvotar i EU-farvatn og tildelte kvotar frå EU i grønlandske farvatn, med tilhøyrande fangstar, går fram av tabell 5.4. Fleire av desse kvotane, som torsk og sei, kan også fiskast i norsk sone. I EU-sona i Nordsjøen kunne norske fartøy berre fiske 1000 tonn augepål i 2007 og 2008 grunna dårleg bestandssituasjon. EU og Noreg vart i samband med kvoteforhandlingane for 2008 samde om å gjennomføre eit samordna forsøksfiske etter tobis for perioden 1. april til 6. mai 2008. Av ein kvote på 20 000 tonn i EU-sona fiska norske fartøy 21 835 tonn tobis i 2008.

Etter at kyststatane vart samde om forvaltning av kolmule i desember 2005, fekk Noreg auka tilgang i EU-farvatn. I tillegg til fiske i EU-sona, fiska norske fartøy desse åra kolmule i internasjonalt farvatn vest av Dei britiske øyane, i færøysk sone og i NØS sør om 62ºN. I følgje norske sluttseteltal fiska dei norske fartøya totalt 539 585 tonn kolmule i 2007 og 418 289 tonn i 2008 i desse områda.

Det var høve til å overføre 2000 tonn mellom kvotane for lange, brosme og blålange i 2007 og 2008. Desse kvotane kunne berre fiskast med line vest av 4ºV (ICES område Vb, VI og VII). I dette fiskeriet kunne norske fartøy ha bifangst av andre fiskeslag med inntil 25 % til kvar tid. Den totale bifangsten av andre fiskeslag var avgrensa til 2000 tonn i 2007 og 3000 tonn i 2008, og han vart rekna mot den totale kvoten av lange, blålange og brosme, som var på 9340 i 2007 og 9138 i 2008.

Blålange, lange, brosme, pigghå, brugde og håbrann kunne også fiskast i Nordsjøen. Kombinertkvoten gjaldt linefiske etter havmus, mora, skjelbrosme, isgalt og skolest.

100 % av uerkvoten vart overført til og fiska i internasjonalt farvatn. Kvoten «andre artar» i Nordsjøen omfattar fiske på artar det ikkje er fastsett kvotar for til Noreg i EU-sona.

Loddefisket ved Jan Mayen/Island/Grønland vert nærare omtala i punkt 5.1.6.

5.1.3 Noreg – Færøyane

5.1.3.1 Kommentarar til oversikta

Noreg sine kvotar og fangstar i færøysk sone går fram av tabell 5.5.

Fisket etter botnfisk kunne drivast med seigarn og line, men sei kunne også fiskast med trål. Kvoten av andre artar kunne berre fiskast som bifangst. Samla vart det fiska 3582 tonn botnfisk i færøysk sone i 2007, tilsvarande tal for 2008 var 2466 tonn botnfisk. Dette gjev ein utnyttingsgrad på om lag 69 % i 2007 og 46 % i 2008. Makrellkvota kan også fiskast i norske farvatn og er derfor ikkje utnytta i færøysona.

I 2008 var den norske utnyttinga av kvotane i færøysk sone endå lågare enn i 2007. Dette har mellom anna samanheng med høge torskekvotar i norsk sone og høge drivstoffutgifter som gjorde det dyrare for fartøya å gå så langt.

Norske ringnotfartøy brukar å fiske kolmule i færøysk sone mot slutten av kolmulesesongen, det vil seie i april/mai. Norske fartøy fiska 11 410 tonn i 2007 og 11 978 tonn i 2008.

5.1.4 Noreg – Grønland

5.1.4.1 Kommentarar til oversikta

Noreg sine kvotar og fangstar i grønlandsk sone i 2007 og 2008 går fram av tabell 5.6. I tillegg kan norske fartøy fiske i grønlandsk sone på kvote tildelt av EU (sjå tabell 5.4). Fisket etter blåkveite med trål ved Vest-Grønland måtte skje sør om 64º30ºN eller nord om 68ºN, og med ei avgrensing på seks fartøy i fiske samstundes i sona. Det deltok fem trålarar i fisket i 2007, medan berre tre trålarar deltok i 2008. I fisket etter blåkveite ved Aust-Grønland deltok to line fartøy og to trålarar i 2007, medan to line fartøy og to trålarar deltok i 2008.

I begge åra var det 17 fartøy som tilfredsstilte krava til deltaking i rekefisket ved Aust-Grønland (kvoten er tildelt av EU, sjå tabell 5.4). Maksimalt 15 fartøy kunne fiske etter reker samstundes i grønlandsk sone. Totalt fem fartøy deltok i rekefisket både i 2007 og 2008.

I 2007 vart det fiska 30 tonn uer av ein kvote på til saman 4042 tonn. Kvoten vart altså dårleg utnytta, noko som også var tilfellet i 2008 då det vart fiska berre 31 tonn uer av ein kvote på til saman 4200 tonn. Heile kvoten frå Grønland kunne fiskast i internasjonalt farvatn, medan halve kvoten frå EU kunne fiskast i internasjonalt farvatn (sjå kapittel 5.1.9).

I fisket etter kveite ved Aust-Grønland er det berre høve til å fiske med line. Både i 2007 og 2008 deltok to linefartøy. I begge åra kunne dei fiske fritt innanfor totalkvoten.

Før 2003 har det ikkje vore mogleg å utnytte torskekvoten som følgje av den dårlege bestandssituasjonen for torsk ved Grønland. I 2007 og 2008 vart desse kvotane godt utnytta.

5.1.5 Noreg – Island, om fisket etter botnfisk og lodde i islandsk sone

5.1.5.1 Kommentarar til oversikta

Noreg sine kvotar og fangstar i islandsk sone går fram av tabell 5.7. I tillegg til kvoten på 500 tonn botnfisk hadde norske fartøy også høve til å ha inntil 25 % bifangst av andre artar. Noreg utnytta botnfiskkvotane ved Island godt både i 2007 og i 2008.

5.1.6 Noreg – Grønland – Island: lodde ved Jan Mayen, Grønland og Island

I følgje den gjeldande trepartsavtalen (fiskeriavtalen) for lodde varer sesongen for loddefisket frå 20. juni til 30. april. Det er likevel ikkje tillete for norske fartøy å drive fiske etter 15. februar i islandsk sone.

5.1.6.1 Kommentarar til oversikta

Noreg sine kvoter og fangstar på lodde i sesongane 2007/2008 og 2008/2009 går fram av tabell 5.8.

ACFM tilrådde for sesongen 2007/2008 ein TAC på 308 000 tonn lodde under føresetnad av at fisket starta i byrjinga av november 2007. Det norske loddefisket vart opna 20. november 2007. Noreg hadde ein førebels kvote på totalt 39 125 tonn og heile kvoten kunne fiskast i Island si økonomiske sone (IØS). På grunn av at Island berre fann lite lodde i januar 2008, gjekk norske fartøy til Island først mot slutten av januar. Fiskeri- og landbruksministeriet på Island bestemte at det norske loddefisket kunne halde fram til og med 15. februar og at 40 norske fartøy kunne fiske i IØS samtidig.

Endeleg TAC for 2007/2008 vart seinare sett til 207 143 tonn lodde. Den norske totalkvoten for sesongen 2007/2008 vart då redusert frå 39 125 tonn til 31 056 tonn. Kvoten var samansett av 16 571 tonn frå trepartsavtalen og 14 485 tonn frå avtalen mellom Noreg og Island om fisket i Barentshavet. Heile kvoten kunne fiskast i IØS.

På grunn av låg gytebestand er det ikkje opna for loddefiske i 2008/2009.

Til saman vart det fiska 35 758 tonn lodde i sesongen 2007/2008 av totalt 50 ringnotfartøy. Overfisket på om lag 4700 tonn i 2007/2008 skal trekkjast frå den norske kvoten neste sesong. Fisket vart ikkje opna i 2008/2009.

Til og med 2004 har eit element i den årlege kvoteavtalen mellom Noreg og EU vore ei overføring av lodde i grønlandsk sone til Noreg. EU hadde ikkje nok loddekvote i 2004 til å oppfylle avtalen sin overfor Noreg. Noreg har dermed 7965 tonn lodde til gode frå 2004. Dersom EU igjen får tilgjengeleg loddekvote, skal det leggjast til rette for at norske fartøy kan fiske denne ved første høve.

5.1.7 Noreg – EU (Sverige – Danmark), om fisket i Skagerrak/Kattegat

Torsk, raudspette og reker kan fiskast i Skagerrak. Dei andre artane i Skagerrakavtalen kan fiskast både i Skagerrak og Kattegat.

5.1.7.1 Kommentarar til oversikta

Noreg sine kvotar og fangstar i Skagerrak/Kattegat går fram av tabell 5.9. Dei viktigaste fiskeria for Noreg i Skagerrak er fisket etter reker og sild. Fangstane av torsk i tabellen omfattar berre fisket utanfor grunnlinja. I 2007 vart det fiska 494 tonn torsk innanfor grunnlinja, medan det tilsvarande talet for 2008 var 379 tonn.

For sild og makrell vart kvotane fastsette i den bilaterale kvoteavtalen mellom Noreg og EU. I 2007 og 2008 var det høve for norske fartøy til å fiske inntil 3000 tonn makrell av kvota i Nordsjøen, i Skagerrak.

I 2007 vart sildekvoten delt med 3000 tonn til kystgruppa og det resterande kvantumet til ringnotgruppa. Same fordelinga gjaldt i 2008. Kystbrislingflåten fiska om lag 42 % i 2007 og 23 % i 2008 av brislingkvoten, og kystreketrålarane tok rekekvoten.

5.1.8 Norsk fiske i det nordvestlege Atlanterhavet

5.1.8.1 Kommentarar til oversikta

Noreg sine kvotar og fangstar i det nordvestlege Atlanterhavet går fram av tabell 5.10. Det har ikkje vore fastsett loddekvote i NAFO-underområde 3NO sidan 1992. Då hadde Noreg ein loddekvote på 9000 tonn. Dei seinaste åra har det også vore forbod mot torskefiske. I 2000 fiska norske fartøy for første gong uer i NAFO-underområde 1F. Det er ikkje fastsett uerkvote i dette området. Noreg har også høve til å fiske mellom anna blåkveite i NAFO-underområde 3LMNO under «others-kvoten».

Rekefisket i NAFO tok til våren 1993, då norske reketrålarar saman med reketrålarar frå Færøyane og Grønland starta fiske på rekefelta ved Flemish Cap. Rekefisket ved Flemish Cap utvikla seg på 1990-tallet til å verte eit viktig driftsalternativ for rekeflåten ved sida av fisket ved Grønland. Rekefisket vart innsatsregulert i 1996. Omfanget av dette fisket har vorte mindre då tal på norske trålarar med reketråling som einaste driftsalternativ i mellomtida har gått sterkt attende. Både i 2007 og 2008 hadde norske fartøy høve til å fiske reker i 1985 døgn i NAFO-underområde 3M. Dette fisket kunne drivast med opptil 32 fartøy. Norske fartøy hadde i tillegg høve til å fiske 245 tonn i 2007 og 284 tonn i 2008 i område 3L.

I 2007 fiska ein reketrålarar i 3M til saman 1982 tonn. I 2008 fiska eitt fartøy 451 tonn. I 2007 fiska eitt norsk fartøy 246 tonn i 3L, medan eitt norsk fartøy fiska 146 tonn i same område i 2008.

5.1.9 Norsk fiske i Irmingerhavet

5.1.9.1 Kommentarar til oversikta

Noreg sine kvotar og fangstar i Irmingerhavet går fram av tabell 5.11. Tala inkluderer ikkje norsk fiske i Smotthavet (internasjonalt farvatn i ICES-område IIa). Fisket etter uer i Irmingerhavet var ikkje kvoteregulert før i 1996. Ved berekning av fangstuttak på uer i Irmingerhavet nytta norske fiskarar i 2007 norske omrekningsfaktorar som låg noko høgre enn det andre land i NEAFC nytta. For 2008 vedtok NEAFC ein felles faktor på 1,7.

Norske fangstar gjekk ned frå 4340 tonn i 2007 til 486 tonn i 2008. Årsaka til dette var redusert deltaking på grunn av høge drivstoffprisar, og at det vart funne lite uer.

Det har utvikla seg eit større fiske etter snabeluer i internasjonalt farvatn i ICES statistikkområde II (Smotthavet), og fartøy frå Noreg har òg delteke i dette fisket. I 2007 rapporterte norske fartøy 1813 tonn og i 2008 778 tonn frå dette området.

5.1.10 Norsk vårgytande sild

Noreg sine kvotar og fangstar av norsk vårgytande sild går fram av tabell 5.12.

5.1.10.1 Kommentarar til oversikta (tabellane 5.12, 5.13 og 5.14)

18. januar 2007 vart det underteikna ein kyststatsavtale mellom EU, Færøyane, Island, Noreg og Russland om forvaltning av norsk vårgytande sild for 2007. Noreg hadde ein kvote på 780 800 tonn i 2007.

For 2008 vart det skrive under på ein kyststatsavtale som gav ein totalkvote på 1 518 000 tonn. Kyststatane vart også einige om å innføre kvotefleksibilitet over årsskiftet for 2008. Det vart høve til å føre over inntil 10 % av ubrukt kvote til neste år. Det vart også høve til å forskottere inntil 10 % på neste års kvote. Alt fiske utover kvote skal trekkjast frå kvoten neste år.

I 2007 nytta ikkje Noreg kvoten sin fullt ut, utnyttingsgraden låg på 99,8 %. I 2008 vart det fiska 35 623 tonn meir enn den norske kvoten på 925 980 tonn. Dette kvantumet skal trekjast frå norsk kvote for 2009. Både i 2007 og 2008 vart kvoten fiska i NØS, bortsett frå små kvantum i internasjonalt farvatn og ved Jan Mayen.

I 2007 fiska russarane eit betydeleg kvantum norsk vårgytande sild i internasjonalt farvatn. Det russiske fisket i område under norsk fiskerijurisdiksjon for 2007 vart stoppa 22. november 2007.

Islendingane fiska 104 404 tonn og 127 918 tonn sild i 2007 og 2008 i si eiga sone. Norske styresmakter stoppa det islandske fisket i NØS nord om 62ºN 16. november 2007 og 1. desember 2008. Island fiska ikkje sild i Svalbardsona i 2007 og 2008.

Færøyane utnytta 97 % av kvoten for 2007 og 95 % av kvoten for 2008, medan EU sin utnyttingsgrad låg på 99 % i 2007 og 98 % i 2008. EU sitt fiske etter norsk vårgytande sild i område under norsk fiskerijurisdiksjon for 2007 vart stoppa 5. desember 2007. Færøyane sitt fiske etter norsk vårgytande sild i NØS nord for 62ºN vart stoppa 8. desember 2008.

5.2 Utanlandsk utnytting av kvotar i norske havområde i 2007 og 2008

5.2.1 Russland – Noreg

5.2.1.1 Fellesbestandane

Noreg og Russland har felles forvaltning av torsk, hyse og lodde i Barentshavet. Oversikta for 2007 og 2008 viser Russland sine kvotar og fangstar av desse bestandane etter overføring frå Russland til Noreg, men før kvotetildeling frå Russland til tredjeland (sjå tabell 5.15). Russisk forskingsfangst går ikkje fram av tala.

5.2.1.2 Kommentarar til oversikta

Russland sine kvotar og fangstar i norske havområde går fram av tabell 5.16. Av torskekvoten i NØS i 2007 vart 31 % fiska. Tilsvarande tal for 2008 var 38 %. Russland hadde ei utnytting av sin kvote av hyse i NØS på 66 % i 2007 og på 70 % i 2008.

Snabeluer- og uerkvotane kunne berre nyttast til bifangst i 2007 og 2008, medan steinbitkvoten skulle dekkje både direkte fiske og bifangst. I 2007 vart det opna for eit direktefiske etter sei på 5000 tonn innanfor kvoten på 20 000 tonn. I 2008 kunne russiske fartøy fiske 5000 tonn sei innanfor kvoten på 15 000 tonn i eit direktefiske. Kolmulekvoten kunne også fiskast i fiskerisona ved Jan Mayen. Russland sin sildekvote i NØS nord om 62ºN kunne også fiskast i fiskerisona ved Jan Mayen.

Kvoten av andre artar for 2007 og 2008 er ikkje spesifisert.

5.2.2 EU – Noreg

5.2.2.1 Fellesbestandane

I Nordsjøen har Noreg og EU felles forvaltning av torsk, hyse, sei, kviting, raudspette, sild og makrell. Delar av EU sine kvotar på konsumartane kan fiskast i NØS, sjå tabell 5.18. EU sine kvotar og fangstar av desse bestandane etter overføring frå Noreg til EU, men før kvotetildeling frå EU til tredjeland i 2007 og 2008, går fram av tabell 5.17.

Kvoten for sild og makrell omfattar Nordsjøen og Skagerrak. Med omsyn til makrell er EU og Noreg samde om ei fleksibel ordning som gjer det mogleg for EU å fiske 105 000 tonn av makrellkvoten i EU-sona i Nordsjøen i staden for vest av 4ºV.

5.2.2.2 Kommentarar til oversikta

EU sin kvotar og fangstar i norske jurisdiksjonsområde går fram av tabell 5.18. Frå og med 1998 har EU ein kvote av torsk nord om 62ºN som tilsvarer 4,14 % av TAC for nordaustarktisk torsk. I åra 2007 og 2008 har EU nytta torske-, sei- og hysekvotane nord om 62ºN godt.

EU sin sildekvote nord om 62ºN kunne også fiskast i fiskerisona ved Jan Mayen.

EU sin makrellkvote nord om 62ºN kunne også fiskast sør om 62ºN i ICES-område IVa i 2007 og 2008. Dette forklarer avvika mellom kvote og fangsttal for Nordsjøen. EU sin kvote av uer, blåkveite og samlekvoten for andre artar nord om 62ºN er bifangstkvotar.

EU sin kolmulekvote bestod av kvantum gjennom EU-avtalen og kolmuleavtalen. I 2007 kunne EU fiske 1000 tonn gjennom EU-avtalen nord for 62ºN og i fiskerisona ved Jan Mayen, 311 100 tonn gjennom kolmuleavtalen (NØS og i fiskerisona ved Jan Mayen). I tillegg kunne EU fiske 19 800 tonn sør for 62ºN. I 2008 kunne EU fiske 228 089 tonn gjennom kolmuleavtalen i hele NØS og i fiskerisona ved Jan Mayen. I tillegg kunne EU fiske 8800 tonn sør for 62ºN.

EU sine fangstar i NØS sør om 62ºN som del av deira samla fangstar i høve til kvote, utgjer i 2007 og 2008 desse prosentane: for torsk 29 % og 31 %, for hyse 28 % og 32 %, for sei 23 % og 35 %, for kviting 5 % og 7 % og for raudspette 12 % og 11 %.

EU utnytta 67 % av kvoten på andre artar i Nordsjøen i 2007 og 87 % i 2008.

5.2.3 Færøyane – Noreg

5.2.3.1 Kommentarar til oversikta

Færøyane sine kvotar og fangstar i norske havområde går fram av tabell 5.19. Færøyane sine kvotar på torsk, hyse, sei og uer nord om 62ºN er samansett av kvotane frå Noreg og tildelingar frå Russland. Etter avtale med Noreg kan delar av Færøyane sine kvotar i russisk økonomisk sone (RØS) fiskast i NØS. I 2007 utgjorde kvotane frå Noreg 1800 tonn torsk, 1217 tonn hyse, 1010 tonn sei og 100 tonn andre artar, medan kvotane frå Noreg i 2008 var på 1854 tonn torsk, 1340 tonn hyse, 1550 tonn sei og 100 tonn andre artar. Differansen mellom kvotane i oversikta i tabell 5.19 og kvotane frå Noreg syner altså det kvantum Færøyane fekk fiske i NØS av kvotane dei hadde i russisk økonomisk sone. Både i 2007 og 2008 har Færøyane fiska kvotane av torsk, hyse og sei i NØS nord om 62ºN.

Færøyane kunne fiske totalt 39 000 tonn og 46 252 sild tonn i norsk havområde i 2007 og 2008. Av desse 29 000 tonn og 34 392 tonn nord for 62ºN.

I 2007 og 2008 kunne 30 000 tonn og 23 010 tonn av kolmulekvoten fiskast nord for 62ºN og i fiskerisona ved Jan Mayen.

Makrellkvoten til Færøyane kunne også fisk­ast i NØS i den nordlege delen av Nordsjøen (ICES sitt område IVa). I praksis har kvoten dei siste åra vorte fiska i Nordsjøen.

Færøyane sin seikvote sør om 62ºN inkluderer bifangst av sei i andre fiskeri. Det same gjeld for sildekvoten. I 2007 fiska Færøyane ingenting av seikvoten sin, medan i 2008 utnytta dei 24 % av kvoten.

Kvoten på hestmakrell kan også fiskast nord om 62ºN.

5.2.4 Grønland – Noreg

5.2.4.1 Kommentarar til oversikta

Grønland sine kvotar og fangstar i norske havområde går fram av tabell 5.20. Grønland har nytta torske- og hysekvotane godt i 2007 og 2008. Grønland fiska 64 % av seikvoten i 2008.

Grønland overførte torske- og hysekvotar tildelte frå Russland til NØS tilsvarande 3025 tonn i 2007 og 3100 tonn i 2008.

I 2007 fiska to fartøy og i 2008 fiska eitt fartøy botnfisk i NØS i Nordsjøen.

5.2.5 Island – Noreg

Island fekk ein torskekvote i NØS nord om 62ºN på 3792 tonn i 2007 og 3820 tonn i 2008 som eit resultat av Smottholsavtalen. Sjå tabell 5.21.

5.2.5.1 Kommentarar til oversikta

Island kunne fiske til saman 151 168 tonn og 220 262 tonn sild i 2007 og 2008 i fiskerisona ved Jan Mayen. Av desse kunne 34 560 tonn og 40 986 tonn fiskast i NØS nord av 62ºN.

5.2.6 EU (Sverige – Danmark) – Noreg, om fisket i Skagerrak/Kattegat

Torsk, raudspette og reker kan berre fiskast i Skagerrak. For dei andre artane gjeld kvotane både Skagerrak og Kattegat.

5.2.6.1 Kommentarar til oversikta

EU sine kvotar og fangstar i Skagerrak/Kattegat går fram av tabell 5.22. Det er i hovudsak Danmark og Sverige som fiskar på desse kvotane, men for enkelte artar har også andre EU-land mindre kvotar.

Tabell 5.22 syner at EU nyttar dei fleste kvotane i Skagerrak/Kattegat godt. På autonomt grunnlag kvoteregulerer EU også andre bestandar enn dei det er fastsett kvotar på gjennom avtalen om regulering av fiskebestandane i Skagerrak/Kattegat. Desse bestandane er tunge, skolest, lysing og sjøkreps.

5.2.7 Sverige – Noreg

5.2.7.1 Kommentarar til oversikta

Sverige sine kvotar og fangstar i norske havområde går fram av tabell 5.23. Industrifiskkvoten til Sverige omfatta kolmule, augepål, tobis, brisling og hestmakrell, av dette kunne det fiskast maksimalt 400 tonn hestmakrell. I tabellen er fangstane av augepål, kolmule, tobis og hestmakrell samla under industrifisk. I 2007 fiska svenske fartøy berre 442 tonn industrifisk, medan dei i 2008 fiska 756 tonn.

I samband med at Sverige vart medlem i EU frå 1. januar 1995, fekk svenske fartøy høve til å fiske i NØS i Nordsjøen på EU sine kvotar av torsk, hyse, sei, kviting, makrell og sild i medhald av avtalen mellom EU og Sverige.

I hovudsak er det svenske fisket retta mot kvotane deira av torsk, sei, makrell, sild og reker.

5.2.8 Rekefisket ved Svalbard

I 1996 vart rekefisket ved Svalbard regulert ved å setje grenser for innsatsen i fisket. Etter forskriftene kan berre nasjonar som har drive eit tradisjonelt fiske etter reker ved Svalbard delta i dette fisket med eit avgrensa tal på fartøy (Canada, Færøyane, Grønland, Island, EU, Noreg og Russland). For å motverke at rekefisket ekspanderer, vart rekefisket frå 1997 for dei aktuelle landa også regulert med fiskedøgn. Av same årsak vart maksimalt tal tilletne fiskedøgn redusert med 30 % frå 1. januar 2006.