5 Mearkkašumit láhkaevtohusa iešguđet mearrádusaide

§:i 1, § 22 vuosttaš lađđasii, § 23 vuosttaš lađđasii, § 25 nuppi lađđasii ja § 29 nuppi lađđasii

Evttohuvvo rievdadit mearrádusaid doahpaga Finnmárkku fylka geavaheami čájehan dihtii geográfalaš guovllu Finnmárku. Evttohus mearkkaša ahte lága ortnet váldoáššis jotkojuvvo go Romssa fylka ja Finnmárku fylka ovttastahttojuvvojit. Lága geográfalaš doaibmaguovlu bisuhuvvo seammalágánin go dat ovdal ge lei.

Lága namma rievdaduvvo seamma láhkai. Lága oanehis namma rievdaduvvo nu ahte dat čállojuvvo stuorra bustávain, Giellaráđi rávvagiid mielde.

§:i 2

Vuosttaš lađđasii lea lasihuvvon dakkár aiddostahttin ahte Finnmárku galgá áddejuvvot dan guovlun mii lei Finnmárkku fylka suoidnemánu 1. b. 2006, go lága eanaš oassi biddjojuvvui fápmui, ja Finnmárkkuopmodat válddii badjelasas Statsskoga opmodagaid Finnmárkkus. Dat leat Álttá, Bearalvági, Báhcavuona, Gáŋgaviikka, Ákŋoluovtta, Hámmárfeastta, Guovdageainnu, Kárášjoga, Fálesnuori, Gilevuona, Davvesiidda, Láhpi, Muosáha, Unjárgga, Davvenjárgga, Porsáŋggu – Porsanki, Mátta-Várjjaga, Deanu, Čáhcesullo ja Várggáid gielddat/suohkanat.

§ 7 nuppi lađđasii, § 7 guđat lađđasii, § 10 goalmmát lađđasii, § 10 guđat lađđasii, § 16 vuosttaš lađđasii, § 16 viđat lađđasii ja § 31 nuppi lađđasii

Dálá lágas leat muhtun bargamušat ja doaimmat čadnojuvvon Finnmárkku fykkadiggái. Evttohus mearkkaša ahte dát biddjojuvvojit ođđa fylkkadiggái. Dat mearkkaša earret eará ahte ođđa fylkkadiggi galgá, dihto diliin, dohkkehit Finnmárkkuopmodaga stivramearrádusaid eanaluobaheami birra, nu go lea válddahuvvon §10, guđat lađđasis. Rievdadusat dagahit rievdadusa otná dili ektui.

§ 7 nuppi lađđasa hárrái dat mearkkaša ahte olles ođđa fylkkadiggi lea mielde válljemin ovddasteddjiid Finnmárkkuopmodaga stivrii. Dat mearkkaša dan ge ahte ovddeš Romssa fylkka áirasat šaddet leat mielde mearrideamen geat galget leat Finnmárkkuopmodaga stivrras. Stivralahtut galget ain ássat Finnmárkkus.

Evttohus mearkkaša dan ge ahte ođđa fylkkadiggi oažžu bargamuššan nammadit ovtta lahtu gozihanlávdegoddái, gč. § 16 vuosttaš lađđasa. Nuppi guokte lahtu nammadit Sámediggi ja Gonagas (Gielda- ja ođasmahttindepartemeanta cuoŋománu 8. b. 2011 mannosaš gonagaslaš resolušuvnna nr. 387 vuođul). Dasto galgá gozihanlávdegoddi sáddet iežas raportta ođđa fylkkadiggái, gč. § 16 viđat lađđasa.

§:i 15

Finnmárkkuopmodaga doaimma ulbmil ii leat doaibmat badjebáhcagiin, muhto jus dat dáhpáhuvvá, de sáhttá stivra mearridit juohkit doaimma olles badjebáhcaga dahje badjebáhcaga ossiid. Ovddeš mearrádusa vuođul lei badjebáza sáhttit mannat fylkkagildii, Sámediggái dahje álbmogii ávkkálaš ulbmiliidda mat bohtet fylkka ássiide buorrin. Láhkarievdadus mearkkaša ahte Romssa ja Finnmárkku fylkkagielda sáhttá váldit vuostá vejolaš badjebáhcaga, jus Finnmárkkuopmodaga stivra dan mearrida. Jus fylkkagielda lea badjebáhcaga vuostáiváldi, de lea čielga gáibádus ahte ruđat galget boahtit geográfalaš guovllu Finnmárkku ássiide buorrin. Stivra dat mearrida galgá go badjebáza juhkkojuvvot, ja gii dahje geat ruđaid galget vuostáiváldit.

§ 18 nuppi lađđasii ja § 46 vuosttaš lađđasii

Evttohus sisttisdoallá ahte ođđa fylkkamánneámmát šaddá váiddaorgánan go gáibádus geahčadit Finnmárkkuopmodaga áššebáhpáriid biehttaluvvo, gč. § 18 nuppi lađđasa, ja Finnmárkkukommišuvnna áššebáhpáriid, gč. § 46 vuosttaš lađđasa. Romssa ja Finnmárkku ođđa fylkkamánneámmát lea jo ásahuvvon, ođđajagimáu 1. b. 2019 rájes, ja láhkamearrádusa rievdadeapmi heivehuvvo dasa.